ಚಂದ್ರಯಾನ-2 ಯಶಸ್ಸಿನ ದಿಕ್ಸೂಚಿ, ವೈಫಲ್ಯವಲ್ಲ: ಡಾ| ಕಸ್ತೂರಿರಂಗನ್‌

Team Udayavani, Sep 29, 2019, 5:47 AM IST

ಮಂಗಳೂರು: ಇತ್ತೀಚೆಗೆ ಇಸ್ರೊ ನಡೆಸಿದ ಚಂದ್ರಯಾನ-2 ವಿಫಲ ಎಂದು ಭಾವಿಸಬಾರದು. ಇದು ನಮ್ಮ ಮುಂದಿನ ಯೋಜನೆಗಳಿಗೆ ಹಲವಾರು ಅನುಭವಗಳನ್ನು, ಹೊಸ ದಿಕ್ಸೂಚಿಗಳನ್ನು ನೀಡಿದ್ದು ಭವಿಷ್ಯದಲ್ಲಿ ಯಶಸ್ಸಿಗೆ ಮೆಟ್ಟಿಲಾಗಲಿದೆ ಎಂದು ಇಸ್ರೊ ಮಾಜಿ ಅಧ್ಯಕ್ಷ ಡಾ| ಕೆ. ಕಸ್ತೂರಿರಂಗನ್‌ ಅಭಿಪ್ರಾಯಪಟ್ಟರು.

ನಗರದ ಕಾರ್ಯಕ್ರಮವೊಂದರಲ್ಲಿ ಶನಿವಾರ “ಸ್ಪೇಸ್‌-ಆ್ಯನ್‌ ಇನೋಟಿವ್‌ ಫಾರ್‌ ಸರ್ವಿಂಗ್‌ ಮ್ಯಾನ್‌ಕೈಂಡ್‌’ ವಿಚಾರದಲ್ಲಿ ಅವರು ಉಪನ್ಯಾಸ ನೀಡಿದರು. ಚಂದ್ರಯಾನ-2 ಒಂದು ಕ್ಲಿಷ್ಟಕರ ಯೋಜನೆಯಾಗಿತ್ತು. ಇದರ ಹಿಂದೆ ವಿಜ್ಞಾನಿಗಳ ಬಹಳಷ್ಟು ಶ್ರಮವಿತ್ತು. ಚಂದ್ರನನ್ನು ತಲುಪಲು ಇನ್ನೇನು ಎರಡು ಕಿ.ಮಿ. ದೂರದಲ್ಲಿ ಯಶಸ್ಸಿನ ಸನಿಹದಲ್ಲಿರುವಾಗ ಹಿನ್ನಡೆ ಅನುಭವಿಸಬೇಕಾಯಿತು. ಇದು ನಿಶ್ಚಿತವಾಗಿಯೂ ಸೋಲು ಅಲ್ಲ ಎಂದರು.

ಆರ್ಯಭಟದಿಂದ ಹಿಡಿದು ಇತ್ತೀಚೆಗಿನ ಚಂದ್ರಯಾನ-2ರ ವರೆಗೆ ಬಾಹ್ಯಾಕಾಶ ಯೋಜನೆಗಳಿಗೆ ದೇಶದ ರಾಜಕೀಯ ವ್ಯವಸ್ಥೆ ಬೆಂಬಲವನ್ನು ನೀಡುತ್ತ ಬಂದಿದೆ. ಇದರ ಫಲವಾಗಿ ಬಾಹ್ಯಾಕಾಶ ಕ್ಷೇತ್ರದಲ್ಲಿ ಭಾರತ ಅತ್ಯುತ್ತಮ ಯಶಸ್ಸು ಕಾಣಲು ಸಾಧ್ಯವಾಯಿತು. ಚಂದ್ರಯಾನ-2ರ ನಿರ್ಣಾಯಕ ಕ್ಷಣಗಳಲ್ಲಿ ಮತ್ತು ಅದರ ಫಲಿತಾಂಶದ ಸಂದರ್ಭದಲ್ಲಿ ಪ್ರಧಾನಿ ಮೋದಿ ತನ್ನ ಬೆಂಬಲ ಮತ್ತು ಪ್ರೇರಣದಾಯಕ ಮಾತುಗಳಿಂದ ವಿಜ್ಞಾನಿ ಸಮುದಾಯವನ್ನು ಪ್ರೋತ್ರಾಹಿಸಿದರು ಎಂದು ಕಸ್ತೂರಿ ರಂಗನ್‌ ಹೇಳಿದರು.

ಹಲವಾರು ಸವಾಲುಗಳ ಮಧ್ಯೆಯೂ ಭಾರತದ ಬಾಹ್ಯಾಕಾಶ ಅದ್ಭುತ ಯಶಸ್ಸು ಸಾಧಿಸಿದೆ. ಈ ನಿಟ್ಟಿನಲ್ಲಿ ವಿಕ್ರಂ ಸಾರಾಭಾç, ಪ್ರೊ| ಸತೀಶ್‌ ಧವನ್‌, ಪ್ರೊ| ಯು.ಆರ್‌. ರಾವ್‌ ಅವರಂತ ಶ್ರೇಷ್ಠ ವಿಜ್ಞಾನಿಗಳು ಅಪಾರ ಕೊಡುಗೆ ನೀಡಿದ್ದಾರೆ. ಭವಿಷ್ಯದಲ್ಲಿ ಆನೇಕ ಮಹತ್ವದ ಯೋಜನೆಗಳನ್ನು ಇಸ್ರೊ ರೂಪಿಸಿದೆ. 2020ರಲ್ಲಿ ಸೂರ್ಯ ಗ್ರಹದ ಅಧ್ಯಯನಕ್ಕೆ ಆದಿತ್ಯ ಉಪಗ್ರಹ, ಜಿಎಸ್‌ಎಲ್‌ವಿ ಎಂಕೆ-3 2022 ರಲ್ಲಿ ಮಾನವಸಹಿತ ಗಗನಯಾನ ಮುಂತಾದ ಮಹತ್ತರ ಯೋಜನೆಗಳು ಪ್ರಗತಿಯಲ್ಲಿವೆ ಎಂದವರು ವಿವರಿಸಿದರು.

ಬಾಹ್ಯಾಕಾಶ ಎಂಬುದು ನಿಗೂಢವಾದುದು. ಅದೊಂದು ಅಚ್ಚರಿ. ಈವರೆಗೆ ಆಗಿರುವ ಸಂಶೋಧನೆ ಶೇ.4ರಷ್ಟು ಮಾತ್ರ. ಶೇ.96ರಷ್ಟು ಇನ್ನೂ ಬಾಕಿ ಇದೆ ಎಂದರು.

ಸೋಮಯಾನ ಯೋಜನೆ ಚಂದ್ರಯಾನ-1 ಆಯಿತು
ಚಂದ್ರಗ್ರಹ ಯೋಜನೆಯ ಪ್ರಸ್ತಾವನೆ ರೂಪಿಸಿ ಆಗ ಪ್ರಧಾನಿಯಾಗಿದ್ದ ವಾಜಪೇಯಿ ಅವರಿಗೆ ನೀಡಲಾಯಿತು. ಇದನ್ನು ಪರಿಶೀಲಿಸಿ, ಇದಕ್ಕೆ ಸೋಮಯಾನದ ಬದಲು ಚಂದ್ರಯಾನ ಎಂದು ಹೆಸರಿಟ್ಟರೆ ಚೆಂದ ಎಂದು ಸಲಹೆ ಮಾಡಿದರು ಎಂದು ಡಾ| ಕಸ್ತೂರಿರಂಗನ್‌ ಚಂದ್ರಯಾನ ಹೆಸರಿನ ರಹಸ್ಯವನ್ನು ಬಿಚಿrಟ್ಟರು.