ಮುಂದಿನ ವರ್ಷದಿಂದ ಮಂಗಳೂರು ದಸರಾ ಮೆರವಣಿಗೆ ಸ್ವರೂಪ ಬದಲು!

Team Udayavani, Oct 22, 2018, 11:42 AM IST

ಮಹಾನಗರ: ಮಂಗಳೂರು ದಸರಾ ಶೋಭಾಯಾತ್ರೆ ವೈಭವದಿಂದ ನಡೆದಿದ್ದು, ದೇಶ-ವಿದೇಶದ ಲಕ್ಷಾಂತರ ಮನಸೂರೆಗೊಳಿಸುವಲ್ಲಿ ಯಶಸ್ವಿಯಾಗಿದೆ. ಮುಂದಿನ ದಿನಗಳಲ್ಲಿ ಈ ಶೋಭಾಯಾತ್ರೆಯನ್ನು ಮತ್ತಷ್ಟು ವ್ಯವಸ್ಥಿತವಾಗಿ ನಡೆಸುವ ಉದ್ದೇಶದಿಂದ ದೇವಸ್ಥಾನ ಆಡಳಿತ ಮಂಡಳಿ ಮೆರವಣಿಗೆ ಸ್ವರೂಪದಲ್ಲಿ ಬದಲಾವಣೆ ಮಾಡಲು ನಿರ್ಧರಿಸಿದೆ.

ಜನಸಂಚಾರ ನಿಭಾಯಿಸುವುದು ಕಷ್ಟ
ಮಂಗಳೂರು ದಸರಾದ ಈ ಬಾರಿಯ ಶೋಭಾಯಾತ್ರೆ ವೈಭವವನ್ನು ತೆರೆದಿಡುವಲ್ಲಿ ಯಶಸ್ವಿಯಾಯಿತಾದರೂ, ಜನಸಾಗರ ಹಾಗೂ ಟ್ಯಾಬ್ಲೋಗಳ ಒತ್ತಡದಿಂದ ಮೆರವಣಿಗೆ ನಿರೀಕ್ಷಿತ ಸಮಯದಲ್ಲಿ ಮುಗಿಸಲು ಈ ಬಾರಿಯೂ ಸಾಧ್ಯವಾಗಿಲ್ಲ. ಈ ಬಾರಿ ಮೆರವಣಿಗೆ ಅವಧಿ 12 ಗಂಟೆಗೆ ಸೀಮಿತಗೊಳಿಸಿದ್ದರೂ, ಶುಕ್ರವಾರ ಸಂಜೆ 4ಗಂಟೆಗೆ ಹೊರಟ ಮೆರವಣಿಗೆ ಶನಿವಾರ ಬೆಳಗ್ಗಿನ ಜಾವ 6.30ರ ವರೆಗೆ ನಡೆಯುವ ಮೂಲಕ 14.30 ಗಂಟೆ ಸಮಯ ತಗುಲಿತು. ಅದರಲ್ಲೂ 1 ಕಿಲೋ ಮೀಟರ್‌ ಮೆರವಣಿಗೆ ತಲುಪಲು 8 ಗಂಟೆ ಅವಧಿ ತಲುಪಿದೆ. ಟ್ಯಾಬ್ಲೋ, ವಾಹನ, ಜನಸಂಚಾರವನ್ನು ನಿಭಾಯಿಸುವುದೇ ಪೊಲೀಸರಿಗೆ, ಸಂಘಕಟರಿಕೆಗೆ ದೊಡ್ಡ ತಲೆನೋವಾಗಿತ್ತು.

ಮಂಗಳೂರು ದಸರಾ ವೈಭವವನ್ನು ಎಲ್ಲರಿಗೆ ವೀಕ್ಷಿಸಲು ಅನುಕೂಲ ಮಾಡಿಕೊಡುವ ಉದ್ದೇಶದಿಂದ ಮೆರವಣಿಗೆಯನ್ನು ಈ ಬಾರಿ ಯಾವುದೇ ತೊಡಕಿಲ್ಲದೆ ಒಟ್ಟು ಸಮಯ 12 ಗಂಟೆಯೊಳಗೆ ಮುಗಿಸಬೇಕು ಎಂದು ದೇಗುಲದ ಆಡಳಿತ ಮಂಡಳಿ ನಿರ್ಧರಿಸಿತ್ತು. ಆದರೆ ಈ ಬಾರಿ ತಡವಾದ ಕಾರಣ ಮುಂದಿನ ವರ್ಷದಿಂದ ಶೋಭಾಯಾತ್ರೆ ಸ್ವರೂಪದಲ್ಲಿ ಬದಲಾವಣೆ ಮಾಡಲು ನಿರ್ಧರಿಸಲಾಗಿದೆ.

ಹಸಿರು ಕೊಡೆ, ಡೊಳ್ಳು ಕುಣಿತ ಸೇರಿದಂತೆ ರಾಜ್ಯದ ಎಲ್ಲ ಕಲಾ ತಂಡದ ಮೆರವಣಿಗೆ ಪ್ರಾರಂಭದಲ್ಲಿ ಸಾಗಲಿದೆ. ಅನಂತರ ನವದುರ್ಗೆಯರ ಸಹಿತ ಶ್ರೀ ಶಾರದೆ ದೇವರ ಮೂರ್ತಿಗಳು ಸಾಗಲಿದೆ. ಅನಂತರ ಬಗೆ ಬಗೆಯ ಟ್ಯಾಬ್ಲೋಗಳಿಗೆ ಅವಕಾಶ ನೀಡಲು ಚಿಂತಿಸಲಾಗಿದೆ. ಈ ಮೂಲಕ ಮೆರವಣಿಗೆಯನ್ನು ಆದಷ್ಟು ಬೇಗನೆ ಮುಗಿಸುವಂತೆ ಮಾಡುವುದು ಆಯೋಜಕರ ನಿರ್ಧಾರ. 

 ಡಿಜೆ, ಎಲ್‌ಇಡಿಗೆ ಕೊಕ್‌
ಮಂಗಳೂರು ದಸರಾ ಈಗಾಗಲೇ ಜನಪ್ರಿಯಗೊಂಡಿದ್ದು, ಲಕ್ಷಾಂತರ ಮಂದಿ ಭಾಗವಹಿಸುತ್ತಿದ್ದಾರೆ. ಈ ಮೆರವಣಿಗೆಯನ್ನು ಮತ್ತಷ್ಟು ಕ್ರೀಯಾತ್ಮಕವನ್ನಾಗಿಸುವ ಉದ್ದೇಶದಿಂದ ಮುಂದಿನ ವರ್ಷಗಳಲ್ಲಿ ಕ್ರಿಯಾಶೀಲ ಸ್ತಬ್ದಚಿತ್ರಗಳಿಗೆ ಮಾತ್ರ ಅವಕಾಶ ನೀಡಲಾಗುವುದು. ನಮ್ಮ ನೆಲದ ಸಂಸ್ಕೃತಿ, ಕಂಪನ್ನು ಪಸರಿಸುವ ತಂಡಗಳಿಗೆ ಮಾತ್ರ ಕಲಾಪ್ರರ್ಶನಕ್ಕೆ ಅವಕಾಶ. ಡಿಜೆ ಹಾಡು, ನೃತ್ಯ, ಎಲ್‌ಇಡಿ ಸ್ಕ್ರೀನ್‌ ಬಳಸಿದ ಟ್ಯಾಬ್ಲೋಗಳಿಗೆ ಅವಕಾಶ ನೀಡುವುದಿಲ್ಲ.
 - ಪದ್ಮರಾಜ್‌ ಆರ್‌.,
    ಕೋಶಾಧಿಕಾರಿ ಕುದ್ರೋಳಿ ಶ್ರೀ ಗೋಕರ್ಣನಾಥ ದೇವಸ್ಥಾನ