ಮಂಗಳೂರು ಧರ್ಮ ಪ್ರಾಂತದ ವಿಚಾರಣೆ ಮುಕ್ತಾಯ

ರೇಮಂಡ್‌ ಫ್ರಾನ್ಸಿಸ್‌ ಕಮಿಲ್ಲಸ್‌ಗೆ ಸಂತ ಪದವಿ

Team Udayavani, Jul 18, 2019, 5:20 AM IST

ವರದಿಯ ಪ್ರತಿಯನ್ನು ಅಧಿಕೃತ ದಾಖಲೆಗಳ ಪೆಟ್ಟಿಗೆಗಳಲ್ಲಿ ಇರಿಸಿ ಧರ್ಮಾಧ್ಯಕ್ಷರು ಮೊಹರು ಮಾಡಿದರು.

ಮಂಗಳೂರು: ದೇವರ ಸೇವಕ ರೇಮಂಡ್‌ ಫ್ರಾನ್ಸಿಸ್‌ ಕಮಿಲ್ಲಸ್‌ ಮಸ್ಕರೇನ್ಹಸ್‌ ಅವರನ್ನು ಪುನೀತ ಮತ್ತು ಸಂತ ಎಂದು ಪ್ರಕಟಿಸಲು ಧರ್ಮಕ್ಷೇತ್ರದ ಮಟ್ಟದಲ್ಲಿ ರಚಿಸಲ್ಪಟ್ಟ ಅಧಿಕೃತ ವಿಚಾರಣ ಸಮಿತಿಯ ಸಮಾರೋಪ ಅಧಿವೇಶನ ಬೆಂದೂರಿನ ಸಂತ ಸೆಬಾಸ್ಟಿಯನ್‌ ಚರ್ಚ್‌ನಲ್ಲಿ ಬುಧವಾರ ಜರಗಿತು.

ಅಧ್ಯಕ್ಷತೆ ವಹಿಸಿದ್ದ ಬಿಷಪ್‌ ವಂ| ಪೀಟರ್‌ ಪೌಲ್ ಸಲ್ಡಾನ್ಹಾ ಮಾತನಾಡಿ, ದೇವರ ಸೇವಕ ರೇಮಂಡ್‌ ಒಬ್ಬ ದೈವಭಕ್ತ. ತಮ್ಮ ಜೀವನವನ್ನು ಸಮಾಜದ ಒಳಿತಿಗಾಗಿ ಸಮರ್ಪಿಸಿದ ಮಹಾಪುರುಷರು. ಮಂಗಳೂರು ಧರ್ಮಪ್ರಾಂತದ ಚರಿತ್ರೆಯಲ್ಲಿ ಈ ದಿನ ವಿಶಿಷ್ಟ ಮೈಲುಗಲ್ಲು ಎಂದರು.

ವಂ| ಜೋನ್‌ ಬಾಪ್ಟಿಸ್ಟ್‌ ಸಲ್ಡಾನ್ಹಾ ಪ್ರಾರ್ಥನಾ ವಿಧಿ ನೆರವೇರಿಸಿದರು. ಬೆಥನಿ ಸಂಸ್ಥೆಯ ಮಹಾಮಾತೆ ಭ| ರೋಜ್‌ ಸೆಲಿನ್‌, ಬೆಂದೂರ್‌ ಧರ್ಮಕೇಂದ್ರದ ಪ್ರಧಾನ ಗುರು ವಂ| ವಿನ್ಸೆಂಟ್ ಮೊಂತೆರೊ ಮತ್ತಿತರರು ದೇವರ ಸೇವಕ ರೇಮಂಡರ ಸಮಾಧಿಯ ಮೇಲೆ ಹೂಗುಚ್ಛ ಇಟ್ಟು ಗೌರವ ಅರ್ಪಿಸಿದರು.

ನೋಟರಿ ವಂ| ನವೀನ್‌ ಪಿಂಟೊ ಅವರು,ಧರ್ಮಾಧ್ಯಕ್ಷರ ಪ್ರತಿನಿಧಿ ವಂ| ಹೆನ್ರಿ ಸಿಕ್ವೇರಾ ಅವರಿಗೆ ಅಧಿಕೃತ ದಾಖಲೆಗಳನ್ನು ಹಸ್ತಾಂತರಿಸಿದರು. ಪ್ರೊಮೋಟರ್‌ ಆಫ್‌ ಜಸ್ಟಿಸ್‌ ವಂ| ಜೋನ್‌ ಮೆಂಡೊನ್ಸಾದಾಖಲೆ ಪತ್ರಗಳನ್ನು ವ್ಯಾಟಿಕನ್‌ಗೆ ಕಳುಹಿಸಲು ಅಭ್ಯಂತರವಿಲ್ಲ ಎಂದು ಘೋಷಿಸಿದರು.

ಉಪ ನೋಟರಿ ವಂ| ವಿನ್ಸೆಂಟ್ ಸಲ್ಡಾನ್ಹಾ, ಪ್ರಕ್ರಿಯೆಯ ಪೋಸ್ಟುಲೇಟರ್‌ ಭ| ಲಿಲ್ಲಿಸ್‌ ಕಟಕಾಯಾಮ್‌, ದಸ್ತಾವೇಜುಗಳ ನಕಲುಕಾರಿಣಿ ಭ| ಮೊಲಿ ಶಾರೊನ್‌, ದಸ್ತಾವೇಜುಗಳನ್ನು ಅನುವಾದ ಮಾಡಿದ ಭ| ಹಿಲೆರಿಟಾ ಪ್ರಮಾಣವಚನ ಮಾಡಿದರು. ವರದಿಯ ಪ್ರತಿಯನ್ನು ಅಧಿಕೃತ ದಾಖಲೆಗಳ ಪೆಟ್ಟಿಗೆಗಳಲ್ಲಿ ಇರಿಸಿ ಧರ್ಮಾಧ್ಯಕ್ಷರು ಮೊಹರು ಮಾಡಿದರು. ಬಳಿಕ ಅವನ್ನು ಧರ್ಮಪ್ರಾಂತದ ದಸ್ತಾವೇಜು ಕೊಠಡಿಯಲ್ಲಿರಿಸಲು ಚಾನ್ಸಲರ್‌ ವಂ| ವಿಕ್ಟರ್‌ ಜಾರ್ಜ್‌ ಅವರಿಗೆ ಹಸ್ತಾಂತರಿಸಲಾಯಿತು.

ದಾಖಲೆಗಳ 15 ಕಟ್ಟುಗಳ 2 ಪ್ರತಿಗಳನ್ನು ಹೊಸದಿಲ್ಲಿಯ ವ್ಯಾಟಿಕನ್‌ ರಾಯಭಾರ ಕಚೇರಿಯ ನುನ್ಸಿಯೊ ಅವರ ಮೂಲಕ ಅಧ್ಯಯನಕ್ಕಾಗಿ ವ್ಯಾಟಿಕನ್‌ನಲ್ಲಿರುವ ‘ಕಾಂಗ್ರಿಗೇಶನ್‌ ಫಾರ್‌ ದ ಕಾಸಸ್‌ ಆಫ್‌ ದ ಸೈಂಟ್ಸ್‌’ ಸಮಿತಿಗೆ ಕಳುಹಿಸಲು ನೇಮಿಸಲ್ಪಟ್ಟ ಭ| ಲಿಲ್ಲಿಸ್‌ ಕಟಕಾಯಮ್‌ ಅವರಿಗೆ ನೀಡಲಾಯಿತು.

ನಿವೃತ್ತ ಧರ್ಮಾಧ್ಯಕ್ಷ ವಂ| ಅಲೋಶಿಯಸ್‌ ಡಿ’ಸೋಜಾ ಶುಭ ಹಾರೈಸಿದರು. ವಿಚಾರಣೆ, ಚಾರಿತ್ರಿಕ ಮತ್ತು ದೇವಶಾಸ್ತ್ರ ಸಮಿತಿಯ ಸದಸ್ಯರು, ಹಿಂದಿನ ಬೆಥನಿ ಮಹಾಮಾತೆಯರಾದ ಭ| ಜ್ಯೋತಿ, ಭ| ವಿಲ್ಬರ್ಟಾ, ಬೆಂದೂರು ಧರ್ಮಕೇಂದ್ರದ ಹಿಂದಿನ ಗುರುಗಳಾದ ವಂ| ಪೀಟರ್‌ ನೊರೊನ್ಹಾ, ವಂ| ಆಂತೊನಿ ಶೆರಾ, ಪ್ರಸ್ತುತ ಗುರು ವಂ| ವಿನ್ಸೆಂಟ್ ಮೊಂತೆರೊ ಅವರನ್ನು ಗೌರವಿಸಲಾಯಿತು. ಭ| ಲಿಲ್ಲಿಸ್‌ ಅವರನ್ನು ಸಮ್ಮಾನಿಸಲಾಯಿತು. ರೋಮನ್‌ ಪೋಸ್ಟುಲೇಟರ್‌ ಆಗಿ ನೇಮಕಗೊಂಡ ಭ| ಡೋನಾ ಸಾಂಕ್ತಿಸ್‌ ಅವರಿಗೆ ಶುಭ ಕೋರಲಾಯಿತು.

ರವಿವಾರದಂದು ಬೆಂದೂರಿನ ಸಂತ ಸೆಬಾಸ್ಟಿಯನ್‌ ಚರ್ಚ್‌ನಲ್ಲಿ ಕೃತಜ್ಞತಾ ಬಲಿಪೂಜೆ ಅರ್ಪಿಸುವ ಮೂಲಕ ಸಮಾರೋಪ ಅಧಿವೇಶನ ಆರಂಭವಾಗಿತ್ತು.