ಕಾಂಗ್ರೆಸ್‌ ಕಾರ್ಯಕರ್ತರ ಸಭೆ  “ನೈಜ ಕಾರ್ಯಕರ್ತರೇ ಪಕ್ಷದ ಆಸ್ತಿ’

Team Udayavani, Apr 26, 2017, 3:53 PM IST

ಬಂಟ್ವಾಳ:  ಕಳೆದ ಮೂರು-ನಾಲ್ಕು ವರ್ಷಗಳಿಂದೀಚೆಗೆ ಅನಂತಾಡಿಯಲ್ಲಿ ಅಭೂತಪೂರ್ವ ಅಭಿವೃದ್ಧಿ ಕೆಲಸಗಳಾಗಿದ್ದು, ಕ್ಷೇತ್ರದ ಶಾಸಕ ಬಿ.ರಮಾನಾಥ ರೈ ಅವರು ಈ ಎಲ್ಲ ಅಭಿವೃದ್ಧಿ ಕೆಲಸಗಳಿಗೆ ಕಾರಣಕರ್ತರಾಗಿದ್ದಾರೆ. 

ಕಾಂಗ್ರೆಸ್‌ ಪಕ್ಷವನ್ನು ವಲಯ ಮತ್ತು ಬೂತ್‌  ಮಟ್ಟದಲ್ಲಿ ಸಂಘಟಿಸುವ ಕೆಲಸ ನಿರಂತರವಾಗಿ  ನಡೆದಿದ್ದು  ಕಾಂಗ್ರೆಸ್‌ ಪಕ್ಷದ ಇತಿಹಾಸ ,  ಇದರ ಕ್ರಾಂತಿಕಾರಿ ಕಾಯ್ದೆಗಳು ಕರ್ನಾಟಕ ಮುಖ್ಯಮಂತ್ರಿ  ಬಿ. ಸಿದ್ದರಾಮಯ್ಯನವರ ಬಡವರ ಬಗ್ಗೆ ಜನಪರ ಕಾಳಜಿಯಿಂದ ಮಾಡಿರತಕ್ಕ ಕೆಲಸಗಳು, ಕ್ಷೇತ್ರದ ಶಾಸಕರು , ಸಚಿವರ ಅಭಿವೃದ್ಧಿ ಸಾಧನೆ  ಮತ್ತು  ಅವರ ಪ್ರಯತ್ನವನ್ನು ಕ್ಷೇತ್ರದ ಜನತೆಗೆ ತಿಳಿಸುವ ಕಾರ್ಯಕರ್ತರೇ ಕಾಂಗ್ರೆಸ್‌ ಪಕ್ಷದ ನಿಜವಾದ ಆಸ್ತಿ ಎಂದು ಪಾಣೆಮಂಗಳೂರು ಬ್ಲಾಕ್‌ ಕಾಂಗ್ರೆಸ್‌ ಅಧ್ಯಕ್ಷ ಬಿ.ಎಂ. ಅಬ್ಟಾಸ್‌ ಅಲಿ ಹೇಳಿದರು.

ಅವರು ಅನಂತಾಡಿ ವಲಯದಲ್ಲಿ ನಡೆದ  ಕಾಂಗ್ರೆಸ್‌  ಕಾರ್ಯಕರ್ತರ ಸಭೆಯಲ್ಲಿ ಮಾತನಾಡಿದರು.ಬಂಟ್ವಾಳ ತಾ| ಸ್ಥಾಯೀ  ಸಮಿತಿ ಮಾಜಿ ಅಧ್ಯಕ್ಷ ಮಾಧವ ಮಾವೆ  ಮಾತನಾಡಿ ಕಾಂಗ್ರೆಸ್‌ ಪಕ್ಷದ ಋಣ ಪ್ರತಿಯೊಬ್ಬ ಕಾರ್ಯಕರ್ತರ ಮೇಲಿದ್ದು ಪಕ್ಷ ಸಂಘಟಿಸುವ ಮುಖಾಂತರ  ಜನಪರ ಕೆಲಸ ಮಾಡಬೇಕೆಂದರು ಮತ್ತು ಸ್ಥಳೀಯ ಜಿ.ಪಂ. ಸದಸ್ಯರು ಮಾಡಿದ ಅಭಿವೃದ್ಧಿ ಕೆಲಸದ ಬಗ್ಗೆ ಮಾಹಿತಿ ನೀಡಿದರು.

ಸಭೆಯಲ್ಲಿ ಪಾಣೆಮಂಗಳೂರು ಬ್ಲಾಕ್‌ ಮಹಿಳಾ ಕಾಂಗ್ರೆಸ್‌ ಅಧ್ಯಕ್ಷ ಜಯಂತಿ , ವಲಯ ಕಾಂಗ್ರೆಸ್‌ ಅಧ್ಯಕ್ಷ  ಸತೀಶ್‌ ಪೂಜಾರಿ  ಮತ್ತಿತರರು ಉಪಸ್ಥಿತರಿದ್ದರು. ನಾರಾಯಣ ಸಾಲ್ಯಾನ್‌ ಪ್ರಾಸ್ತಾವಿಕವಾಗಿ ಮಾತನಾಡಿ , ಸತೀಶ್‌ ಸ್ವಾಗತಿಸಿ ವಂದಿಸಿದರು.