ಪಣಂಬೂರು: ಕಂಟೈನರ್‌ ಸಾಗಾಟದ ಮೇಲೆ ಡಿಜಿಟಲ್‌ ಕಣ್ಣು!

Team Udayavani, Nov 22, 2018, 10:12 AM IST

ಪಣಂಬೂರು: ಇನ್ನು ಮುಂದೆ ಉದ್ಯಮಿಗಳು ತಮ್ಮ ಸರಕು ಸುರಕ್ಷಿತವಾಗಿದೆಯೋ ಎಂದು ಆತಂಕ ಪಡಬೇಕಿಲ್ಲ. ಕಂಟೈನರ್‌ ಸಾಗಾಟದ ಸುರಕ್ಷತೆ ಬಗ್ಗೆ ತಿಳಿಯಲು ಕಂಟೈನರ್‌ಗಳಿಗೆ ಡಿಜಿಟಲ್‌ ಕಂಟೈನರ್‌ ಟ್ರ್ಯಾಕಿಂಗ್‌ ಸಿಸ್ಟಮ್‌ ಅಳವಡಿಕೆಗೆ ಕೇಂದ್ರ ಸರಕಾರ ಕ್ರಮ ಕೈಗೊಂಡಿದ್ದು, ನವಮಂಗಳೂರು ಬಂದರು ಯೋಜನೆಯಲ್ಲಿ ಒಳಗೊಳ್ಳಲಿದೆ.

ನವಮಂಗಳೂರು ಬಂದರಿನಲ್ಲಿ ಬುಧವಾರ ನಡೆದ ಕಾರ್ಯಕ್ರಮದಲ್ಲಿ ಡಿಎಂಐಸಿಡಿಸಿಯ ಸಿಇಒ ಅಲ್ಕೇಶ್‌ ಕೆ. ಶರ್ಮ ನೂತನ ಲಾಜಿಸ್ಟಿಕ್‌ ಯೋಜನೆ ಉದ್ಘಾಟಿಸಿದರು. ಇದು ಕಂಟೈನರ್‌ಗಳು ಸುರಕ್ಷಿತವಾಗಿ ನಿಗದಿತ ಸ್ಥಳಕ್ಕೆ ಮುಟ್ಟಲು ಸಹಕಾರಿಯಾಗಲಿದೆ. ವೆಬ್‌ಸೈಟ್‌ ಮೂಲಕ ಪ್ರತಿಕ್ಷಣದ ಚಲನವಲನವನ್ನು ಪರಿಶೀಲಿಸಲಾಗುತ್ತದೆ.

ಡಿಎಲ್‌ಡಿಎಸ್‌ ಯೋಜನೆ ನ. 1ರಂದು ಚೆನ್ನೈ, ವಿಶಾಖಪಟ್ಟಣ, ಕೃಷ್ಣಪಟ್ಟಣ ಬಂದರಿನಲ್ಲಿ, ನ. 16ರಂದು ಕೊಚ್ಚಿನ್‌ ಬಂದರಿನಲ್ಲಿ ಜಾರಿಯಾಗಿದೆ. ದೇಶದ 16 ಬಂದರುಗಳಲ್ಲಿ ಡಿಎಲ್‌ಡಿಎಸ್‌ ಜಾರಿಯಾಗಲಿದೆ  ಎಂದರು.
ಸಿವಿಒ ಶ್ರೀಕೃಷ್ಣ ಕರತ್ತೂರಿ ಅವರು ಲಾಜಿಸ್ಟಿಕ್‌ ಡೇಟಾ ಸರ್ವೀಸ್‌ ಕಾರ್ಯಾಚರಣೆ ಬಗ್ಗೆ ಮಾಹಿತಿ ನೀಡಿದರು. ಎನ್‌ಎಂಪಿಟಿ ಟ್ರಾಫಿಕ್‌ ಮ್ಯಾನೇಜರ್‌ ವೈ.ಆರ್‌. ಬೆಳಗಲ್‌, ಡಿಎಲ್‌ಡಿಎಸ್‌ನ ಸಿಒಒ ಸುರ್ಜಿತ್‌ ಸರ್ಕಾರ್‌ ಉಪಸ್ಥಿತರಿದ್ದರು.

ಲಾಜಿಸ್ಟಿಕ್‌ ಡೇಟಾ ಬ್ಯಾಂಕ್‌
ಲಾಜಿಸ್ಟಿಕ್‌ ಡೇಟಾ ಬ್ಯಾಂಕ್‌ (ಎಲ್‌ಡಿಬಿ) ದೇಶದ ಶೇ. 70ರಷ್ಟು ಕಂಟೈನರ್‌ಗಳ ಡೇಟಾ ನಿರ್ವಹಣೆ ಮಾಡುತ್ತಿದೆ. ಸುಮಾರು 1 ಕೋಟಿ ಕಂಟೈನರ್‌ ಡೇಟಾ ನಿರ್ವಹಣೆಯನ್ನು ಎಲ್‌ಡಿಬಿ ವ್ಯವಸ್ಥೆ ಮಾಡುತ್ತಿದೆ. ನೂತನ ವ್ಯವಸ್ಥೆಯಿಂದ ಕಂಟೈನರ್‌ಗಳ ಸುರಕ್ಷತೆ ಹೆಚ್ಚಲಿದೆ ಮಾತ್ರವಲ್ಲದೆ ಕ್ಲಪ್ತ ಸಮಯಕ್ಕೆ ಮುಟ್ಟುವಂತೆ ನಿಗಾ ವಹಿಸಬಹುದಾಗಿದೆ. ಪ್ರತೀ ಕಂಟೈನರ್‌ಗೂ ಡಿಜಿಟಲ್‌ ಟ್ರಾಕಿಂಗ್ ಯಂತ್ರ ಅಳವಡಿಕೆಗೆ ಕೇವಲ 147 ರೂ. ವೆಚ್ಚ ತಗಲುತ್ತದೆ. ಈಗ ದೇಶದ ಮಾತ್ರವಲ್ಲದೆ ವಿದೇಶದಿಂದ ಬರುವ ಕಂಟೈನರ್‌ಗಳಿಗೂ ಇದನ್ನು ಅಳವಡಿಸಿ ಆಮದು ವಸ್ತುಗಳ ಸುರಕ್ಷತೆ ಕಾಪಾಡಬಹುದಾಗಿದೆ, ದುರ್ಬಳಕೆಯನ್ನು ತಡೆಯಬಹುದು.