ಯುವಕನಿಗೆ ಗಂಭೀರ ಹಲ್ಲೆ: ಓರ್ವನ ಬಂಧನ

Team Udayavani, Aug 21, 2022, 12:21 AM IST

ಮಂಗಳೂರು: ನಗರದ ಹೊರವಲಯದ ವಳಚ್ಚಿಲ್‌ನಲ್ಲಿ ಯುವಕನ ಮೇಲೆ ಮಾರಕಾಸ್ತ್ರಗಳಿಂದ ದಾಳಿ ನಡೆಸಿದ ಘಟನೆ ಶುಕ್ರವಾರ ತಡರಾತ್ರಿ ಸಂಭವಿಸಿದೆ. ಮೊಹಮ್ಮದ್‌ ಆಸೀಫ್‌ (30) ಗಾಯಗೊಂಡವರು. ಪ್ರಕರಣಕ್ಕೆ ಸಂಬಂಧಿಸಿ ಆಸಿಕ್‌ನನ್ನು ಬಂಧಿಸಲಾಗಿದೆ.

ಕ್ರಿಮಿನಲ್‌ ಹಿನ್ನೆಲೆ
ಆಸಿಕ್‌ ಮತ್ತು ಮುಸ್ತಾಕ್‌ ಈ ಹಿಂದೆಯೂ ಕ್ರಿಮಿನಲ್‌ ಪ್ರಕರಣಗಳಲ್ಲಿ ಭಾಗಿಯಾಗಿದ್ದು, ಇಬ್ಬರ ಮೇಲೆ ಕಾಪು ಪೊಲೀಸ್‌ ಠಾಣೆಯಲ್ಲಿ 307 ಕೇಸು ದಾಖಲಾಗಿದೆ.

ಗಾಂಜಾ ಗ್ಯಾಂಗ್‌?
ವಳಚ್ಚಿಲ್‌ ವ್ಯಾಪ್ತಿಯಲ್ಲಿ ಯುವಕರ ತಂಡವೊಂದು ಗಾಂಜಾ ವ್ಯವಹಾರದಲ್ಲಿ ತೊಡಗಿದ್ದು, ಆ ಗ್ಯಾಂಗ್‌ನಲ್ಲಿ ಆಸಿಕ್‌ ಮತ್ತು ಮುಸ್ತಾಕ್‌ ಕೂಡ ಇದ್ದರೆಂದು ತಿಳಿದುಬಂದಿದೆ. ಈ ಬಗ್ಗೆ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ. ಮಂಗಳೂರು ಗ್ರಾಮಾಂತರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ಮೊಬೈಲ್‌ ವಿಚಾರ
ವಳಚ್ಚಿಲ್‌ ನಿವಾಸಿ ಮಿಫಾಹ್‌ನ ಮೊಬೈಲ್‌ ಅನ್ನು ಆಸಿಕ್‌ ಪಡೆದಿದ್ದ. ಅದನ್ನು ವಾಪಸ್‌ ಕೇಳಿದಾಗ ಉಡಾಫೆಯಿಂದ ಉತ್ತರಿಸಿದ್ದ. ಅದನ್ನು ಮಿಫಾಹ್‌ ತನ್ನ ಮಾವ ಆಸೀಫ್‌ ಅವರ ಬಳಿ ಹೇಳಿದ್ದಾನೆ. ಆಸೀಫ್ ಮೊಬೈಲ್‌ ಬಗ್ಗೆ ಆಸಿಕ್‌ನಲ್ಲಿ ಕೇಳಿದ್ದು, ಈ ವೇಳೆ ಮಾತಿಗೆ ಮಾತು ಬೆಳೆದು ಆಸಿಕ್‌ ಮತ್ತು ಮುಸ್ತಾಕ್‌ ಸೇರಿ ಆಸೀಫ್ ಮೇಲೆ ಮಾರಕಾಸ್ತ್ರಗಳಿಂದ ಮಾರಣಾಂತಿಕವಾಗಿ ಹಲ್ಲೆ ನಡೆಸಿದ್ದಾರೆ.