ಹಿಂದಿನಿಂದ ಬಂದ ಕಾರು ಢಿಕ್ಕಿಯಾಗಿ ಮುಂಬದಿ ಕಾರು ಪಲ್ಟಿ; ಸಂಪೂರ್ಣ ಜಖಂ

Team Udayavani, Dec 16, 2022, 10:19 PM IST

ಮಂಗಳೂರು: ರಾ.ಹೆ. 66ರ ಪಂಪ್‌ವೆಲ್‌ನಿಂದ ನಂತೂರಿನತ್ತ ಡಿಯೋನ್‌ ಜಾಯ್‌ ಅವರು ಚಲಾಯಿಸುತ್ತಿದ್ದ ಕಾರಿಗೆ ಹಿಂದಿನಿಂದ ಬಂದ ಕಾರು ಢಿಕ್ಕಿಯಾಗಿ ಜಾಯ್‌ ಅವರ ಕಾರು ರಸ್ತೆಯಲ್ಲಿ ಮಗುಚಿ ಬಿದ್ದು ಜಖಂಗೊಂಡಿದೆ.

ಶುಕ್ರವಾರ ಬೆಳಗ್ಗೆ 7.50ರ ವೇಳೆಗೆ ಘಟನೆ ಸಂಭವಿಸಿದೆ. ಹೆದ್ದಾರಿಯ ನಾಯಕ್‌ ಡೀಸೆಲ್ಸ್‌ ಶಾಪ್‌ ಬಳಿ ತಲುಪುತ್ತಿದ್ದಂತೆ ಎಡ ಹಿಂಭಾಗದಿಂದ ಆದಿತ್ಯ ಸುವರ್ಣ ಅವರು ದುಡುಕುತನ, ನಿರ್ಲಕ್ಷ್ಯತನದಿಂದ ಅಪಾಯಕಾರಿಯಾಗಿ ಚಲಾಯಿಸುತ್ತಾ ಓವರ್‌ಟೇಕ್‌ ಮಾಡುವ ಭರದಲ್ಲಿ ಹಿಂಭಾಗಕ್ಕೆ ಢಿಕ್ಕಿ ಹೊಡೆದಿದ್ದಾರೆ.

ಇದರಿಂದ ಜಾಯ್‌ ಅವರ ಕಾರು ಬಲಕ್ಕೆ ಚಲಿಸಿ ಡಿವೈಡರ್‌ ಹಾಗೂ ರೈಲಿಂಗ್‌ಗೆ ಢಿಕ್ಕಿಯಾಗಿ ರಸ್ತೆಗೆ ಮುಗುಚಿ ಬಿದ್ದಿದೆ. ಘಟನೆಗೆ ಸಂಬಂಧಿಸಿ ಕದ್ರಿ ಸಂಚಾರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. ಜಾಯ್‌ ಕಾಸರಗೋಡಿನಿಂದ ಪಡುಬಿದ್ರೆಗೆ ಹೋಗುತ್ತಿದ್ದರು.