ಉಕ್ಕೇರಿದ ಕಡಲು: ಉಳ್ಳಾಲದಿಂದ ಗಂಗೊಳ್ಳಿಯವರೆಗೆ ಭೀತಿ

Team Udayavani, Dec 3, 2017, 6:00 AM IST

ಮಂಗಳೂರು/ಉಡುಪಿ: ಕರಾವಳಿ ಯಾದ್ಯಂತ ಶನಿವಾರ ರಾತ್ರಿ ಕಡಲು ಉಕ್ಕೇರಿದ್ದು, ಭಾರೀ ಗಾತ್ರದ ಅಲೆಗಳು ಸಮುದ್ರ ತೀರಕ್ಕೆ ಅಪ್ಪಳಿಸುತ್ತಿವೆ. ಹಲವು ಮನೆಗಳು, ದೋಣಿಗಳು ಅಪಾಯಕ್ಕೆ ಸಿಲುಕಿದ್ದು, ಸಮುದ್ರ ತೀರದ ಜನರು ಆತಂಕಿತಗೊಂಡಿದ್ದಾರೆ.

ಮಂಗಳೂರು ತಾಲೂಕಿನ ಉಳ್ಳಾಲದಿಂದ ಕುಂದಾಪುರ ತಾಲೂಕಿನ ಗಂಗೊಳ್ಳಿಯವರೆಗೆ ಸಮುದ್ರದಲ್ಲಿ ಬೃಹತ್‌ ಅಲೆಗಳು ಕಿನಾರೆಗೆ ಅಪ್ಪಳಿಸುತ್ತಿದೆ. ಇದುವರೆಗೆ ಕಂಡರಿಯದ ಕಡಲಬ್ಬರ ಕಂಡು ಜನರು ಭೀತಿಗೊಳಗಾಗಿದ್ದಾರೆ. ಸಮುದ್ರ ಉಬ್ಬರದ ಅವಧಿಯಲ್ಲಿಯೇ ಒಖೀ ಚಂಡಮಾರುತದಿಂದಾಗಿ ರಭಸವಾಗಿ ಗಾಳಿಯೂ ಬೀಸುತ್ತಿರುವುದು ಸಮಸ್ಯೆಗೆ ಕಾರಣವಾಗಿದೆ. ಸಮುದ್ರದಲ್ಲಿ ಆಗಾಗ್ಗೆ ಸುಳಿಗಾಳಿ ಬೀಸಿ ನೀರು ರಭಸವಾಗಿ ಕಿನಾರೆಗೆ ಅಪ್ಪಳಿಸುತ್ತಿದೆ. ಸಮುದ್ರ ಬದಿಯ ಮರಳನ್ನು ಕೂಡ ಸಮುದ್ರದೊಳಗೆ ಸೆಳೆಯುತ್ತಿದೆ ಎಂದು ಮೀನುಗಾರರು ತಿಳಿಸಿದ್ದಾರೆ.

ಹಿಂದೆ ಈ ರೀತಿ ಅಬ್ಬರಿಸಿಲ್ಲ: ಕಡಲ ಕಿನಾರೆಯಲ್ಲಿ ಮಳೆಗಾಲಕ್ಕೆ ಮೊದಲು ಮತ್ತು ಮಳೆಗಾಲದಲ್ಲಿ ಸಮುದ್ರ ಕೊರೆತ ಸಾಮಾನ್ಯ. ಆದರೆ ಶನಿವಾರ ರಾತ್ರಿ ಉಕ್ಕೇರಿದ ರೀತಿ ಸಮುದ್ರ ಈ ಹಿಂದೆ ಎಂದೂ ಉಕ್ಕೇರಿಲ್ಲ. ಮಳೆಗಾಲದಲ್ಲೂ ನೀರು ಇಷ್ಟೊಂದು ಮೇಲೆ ಬಂದಿಲ್ಲ ಎಂದು ಸ್ಥಳೀಯರು ತಿಳಿಸಿದ್ದಾರೆ. ಉಳ್ಳಾಲ ಬೀಚ್‌ ರೋಡ್‌ಗೆ ಇದೇ ಮೊದಲ ಬಾರಿಗೆ ನೀರು ಅಪ್ಪಳಿಸುತ್ತಿದೆ. ರಸ್ತೆ ಸಂಪರ್ಕ ಕಡಿತಗೊಳ್ಳುವ ಅಪಾಯವಿದೆ.

ಉಳ್ಳಾಲ ಪೆರಿಬೈಲ್‌ನಲ್ಲಿ ಭವಾನಿ ಅವರ ಮನೆಗೆ ನೀರು ಅಪ್ಪಳಿಸಿ ಹಾನಿಗೊಳಗಾಗಿದೆ. ರಾತ್ರಿ ಮನೆಮಂದಿಯನ್ನು ಬೇರೆಡೆಗೆ ಸ್ಥಳಾಂತರಿಸ ಲಾಯಿತು. ನ್ಯೂ ಉಚ್ಚಿಲದಲ್ಲಿ ನೀರು ಬಡಿದು ನಾಗರಾಜ್‌ ಅವರ ಮನೆಗೆ ಹಾನಿಯಾಗಿದೆ. ಈ ಪರಿಸರದ ಇತರ 8 ಮನೆಗಳು ಅಪಾಯದಲ್ಲಿವೆ.

ಕುಸಿದ ತಡೆಗೋಡೆ: ಉಳ್ಳಾಲದಲ್ಲಿ ರೆಸಾರ್ಟ್‌ ಒಂದರ ತಾತ್ಕಾಲಿಕ ತಡೆಗೋಡೆ ಕುಸಿದು ಬಿದ್ದಿದೆ. ಇಲ್ಲಿ ನಡೆಯುತ್ತಿದ್ದ ಸಮಾರಂಭವನ್ನು ಅರ್ಧ ದಲ್ಲಿಯೇ ರದ್ದುಗೊಳಿಸಲಾಗಿದೆ. ಅಲಂಕಾರದ ವಸ್ತುಗಳೆಲ್ಲ ಸಮುದ್ರ ಸೇರಿದೆ. 

ಉಚ್ಚಿಲದಿಂದ ಮೊಗವೀರಪಟ್ಣದವರೆಗೆ ಸಾವಿರಾರು ಜನರು ಮನೆ ಬಿಟ್ಟು ರಸ್ತೆ ಮೇಲೆ ನಿಂತಿದ್ದರು. ರಾತ್ರಿ 11.30ರ ವರೆಗೂ ಅಬ್ಬರ ಕಡಿಮೆ ಯಾಗಲಿಲ್ಲ. ಕೋಟೆಪುರದಲ್ಲಿ ಮೀನಿನೆಣ್ಣೆಯ ಕಾರ್ಖಾನೆ ಯಲ್ಲಿದ್ದ ಕಾರ್ಮಿಕರು ರಾತ್ರಿ 11 ಗಂಟೆ ಸುಮಾರಿಗೆ ಸುರಕ್ಷಿತ ಪ್ರದೇಶಕ್ಕೆ ಸ್ಥಳಾಂತರಿಸಲಾಯಿತು. ಎರಡು ದೋಣಿ ಸಮುದ್ರಪಾಲು: ಬೈಕಂಪಾಡಿ, ಚಿತ್ರಾಪುರ, ಪಣಂಬೂರು ಪರಿಸರದಲ್ಲಿಯೂ ಕಡಲು ಉಗ್ರವಾಗಿದೆ. ತಣ್ಣೀರುಬಾವಿಯಲ್ಲಿ ಎರಡು ನಾಡದೋಣಿಗಳು ಸಮುದ್ರ ಪಾಲಾಗಿವೆ. ಮೀನಕಳಿಯದಲ್ಲಿ ಸುಮಾರು 25 ಬೋಟ್‌ಗಳನ್ನು ಕಿನಾರೆಯಿಂದ ಮೇಲಕ್ಕೆ ತರಲಾಗಿದೆ.

ಆಪದ್ಭಾಂದವ ಜೆಸಿಬಿ: ಮೀನಕಳಿಯಲ್ಲಿದ್ದ ಸ್ಥಳೀಯರೋರ್ವರ ಜೆಸಿಬಿ ಕೂಡಲೇ ಧಾವಿಸಿ ಕಡಲ್ಕೊರೆತಕ್ಕಾಗಿ ಹಾಕಲಾಗಿದ್ದ ಕಲ್ಲುಗಳನ್ನು ತೆರವುಗೊಳಿಸಿ 12 ಬೋಟ್‌ಗಳನ್ನು ರಕ್ಷಿಸಿತು. ಇಲ್ಲಿ ಸಮುದ್ರ ಸುಮಾರು 200ರಿಂದ 250 ಮೀಟರ್‌ ಒಳಗೆ ಪ್ರವೇಶಿಸಿದೆ.  

ಪಣಂಬೂರು ಬೀಚ್‌ ಅಂಗಡಿಗಳಿಗೆ ನೀರು
ಪಣಂಬೂರು ಬೀಚ್‌ ಪ್ರದೇಶದಲ್ಲಿಯೂ ಸಮುದ್ರ ಉಕ್ಕೇರಿದ್ದು, ಬೀಚ್‌ ಬದಿಯಲ್ಲಿನ ಸರ್ಕಲ್‌ ವರೆಗೆ ನೀರು ಬಂದಿದೆ. ಅಂಗಡಿಗಳಿಗೂ ನೀರು ನುಗ್ಗಿದೆ. ಚಿತ್ರಾಪುರದಲ್ಲಿ ಪಿಶರೀಸ್‌ ರಸ್ತೆವರೆಗೆ ನೀರು ಬಂದಿದೆ. ಸಸಿಹಿತ್ಲು ಬೀಚ್‌ನಲ್ಲಿ ಕೂಡ ನೀರು ರಸ್ತೆ ಸಮೀಪಕ್ಕೆ ಬಡಿಯುತ್ತಿದೆ. ಇಲ್ಲಿದ್ದ ಹಲವಾರು ದೋಣಿಗಳನ್ನು ಕ್ರೇನ್‌ ಬಳಸಿ ಮೇಲಕ್ಕೆತ್ತಲಾಯಿತು. 

ಪಡುಬಿದ್ರಿ, ಕಾಪು, ಉದ್ಯಾವರ, ಮಲ್ಪೆ, ಗಂಗೊಳ್ಳಿಯಲ್ಲಿಯೂ ಸಮುದ್ರ ಉಕ್ಕೇರಿದೆ. ಇಲ್ಲಿಯೂ ಸಮುದ್ರ ಬದಿಯಲ್ಲಿದ್ದ ದೋಣಿಗಳನ್ನು ಮೇಲಕ್ಕೆತ್ತಲಾಗಿದೆ. ಇಲ್ಲಿನ ಜನರೂ ಆತಂಕಿತಗೊಂಡಿದ್ದಾರೆ. ಉಡುಪಿ ಜಿಲ್ಲಾ ಪೊಲೀಸ್‌ ವರಿಷ್ಠಾಧಿಕಾರಿ ಮತ್ತು ಜಿಲ್ಲಾಧಿಕಾರಿಯವರು ಉದ್ಯಾವರ ಪ್ರದೇಶಕ್ಕೆ ಭೇಟಿ ನೀಡಿ ಪರಿಸ್ಥಿತಿ ಮೇಲೆ ನಿಗಾ ಇರಿಸಿದ್ದಾರೆ. ಜನರನ್ನು ಸ್ಥಳಾಂತರಿಸಲೆಂದು ನಾಲ್ಕು ಬಸ್‌ಗಳನ್ನು ತಂದಿರಿಸಲಾಗಿತ್ತು. ಆದರೆ ಸ್ಥಳೀಯರು ಬೇರೆಡೆ ಸ್ಥಳಾಂತರಗೊಳ್ಳಲು ನಿರಾಕರಿಸಿದ್ದಾರೆ ಎಂದು ತಿಳಿದುಬಂದಿದೆ. ಕಾಪುವಿನಲ್ಲಿ ದೀಪಸ್ತಂಭದಲ್ಲಿಗೆ ಹೋಗುವ ದಾರಿ ಮುಳುಗಡೆಯಾಗಿದೆ.

ಈ ರೀತಿಯ ಅಬ್ಬರ ಕಂಡಿಲ್ಲ. ಇದೊಂದು ಸುನಾಮಿ ರೀತಿಯಂತಿದೆ. ಇನ್ನೇನು ಆಗುತ್ತದೆಯೋ ಗೊತ್ತಾಗದು. ಒಟ್ಟಾರೆ ಪರಿಸ್ಥಿತಿ ಬಿಗಡಾಯಿಸಿದೆ.
-ಎ.ಕೆ. ಮೊಹಿದ್ದೀನ್‌. ಉಳ್ಳಾಲದ ಸ್ಥಳೀಯ