ಡಿ. 3: ಮೂಡಬಿದಿರೆ ವಿದ್ಯಾಗಿರಿಯಲ್ಲಿ ಆಳ್ವಾಸ್‌ ಉದ್ಯೋಗ ಸಿರಿ

Team Udayavani, Nov 30, 2017, 11:35 AM IST

ಮೂಡಬಿದಿರೆ: ವರ್ಷದಿಂದ ವರ್ಷಕ್ಕೆ ಹೊಸ ಹೊಸ ಆಯಾಮ ಪಡೆದುಕೊಳ್ಳುತ್ತಿರುವ ಆಳ್ವಾಸ್‌ ನುಡಿಸಿರಿ -ಕನ್ನಡ ನಾಡುನುಡಿ ಸಂಸ್ಕೃತಿಯ ರಾಷ್ಟ್ರೀಯ ಸಮ್ಮೇಳನಕ್ಕೆ ಈ ಬಾರಿ ಹೊಸದಾಗಿ ಸೇರ್ಪಡೆಯಾಗಿರುವ ಹಲವು ಅಂಶಗಳಲ್ಲಿ ಪ್ರಮುಖವಾಗಿರುವುದು ‘ಆಳ್ವಾಸ್‌ ಉದ್ಯೋಗ ಸಿರಿ’ ಉದ್ಯೋಗ ಮೇಳ ಡಿ. 3ರಂದು ವಿದ್ಯಾಗಿರಿಯ ಪಿ.ಜಿ. ಬ್ಲಾಕ್‌ನಲ್ಲಿ ಈ ಮೇಳ ನಡೆಯುತ್ತದೆ.

ಇದು ಎಸೆಸೆಲ್ಸಿ ವರೆಗೆ ಕನ್ನಡ ಮಾಧ್ಯಮದಲ್ಲಿ ಓದಿದವರಿಗೆ ಮತ್ತು ಅದರಾಚೆಗೆ ಹೆಚ್ಚಿನ ಶಿಕ್ಷಣ ಪಡೆದವರಿಗೆ ಮಾತ್ರ. (ಉಳಿದವರು ವರ್ಷಕ್ಕೊಮ್ಮೆ ನಡೆಯುವ ಆಳ್ವಾಸ್‌ ಪ್ರಗತಿ ಮೇಳ ಎಂಬ ಬೃಹತ್‌ ಉದ್ಯೋಗ ಮೇಳದಲ್ಲಿ ಪ್ರಯತ್ನಿಸಬಹುದು.)

ಯಾರು ಅರ್ಹರು?
ಎಸೆಸೆಲ್ಸಿವರೆಗೆ ಕನ್ನಡ ಮಾಧ್ಯಮದಲ್ಲೇ ಓದಿರಬೇಕು. ಮುಂದೆ ಐಟಿಐ, ಡಿಪ್ಲೊಮಾ, ಎಂಜಿನಿಯರಿಂಗ್‌, ಪಿ.ಜಿ. ಶಿಕ್ಷಣ ಪಡೆದಿದ್ದರೆ ಅದಕ್ಕೆ ತಕ್ಕ ಉದ್ಯೋಗಾವಕಾಶಗಳನ್ನು ಶೋಧಿಸಿ ತೋರಲಾಗುವುದು. ಈಗ ಕಾಲೇಜುಗಳಿಗೆ ಹೋಗುತ್ತಿರುವವರು ಅರ್ಹರಲ್ಲ.

ಏನೇನು ತರಬೇಕು?
ಅಭ್ಯರ್ಥಿಗಳು ತಮ್ಮ ಭಾವಚಿತ್ರ, ರೆಸ್ಯೂಮ್‌ನ ತಲಾ 5 ಪ್ರತಿ, ಕನ್ನಡ ಮಾಧ್ಯಮದಲ್ಲಿ ಶಿಕ್ಷಣ ಪಡೆದಿರುವುದರ ಪುರಾವೆಯಾಗಿ ಎಸೆಸೆಲ್ಸಿ ಅಂಕಪಟ್ಟಿ ಅಗತ್ಯ ತರಬೇಕು. ಹೆಚ್ಚಿನ ವಿದ್ಯಾರ್ಹತೆ ಇರುವವರು ಸಂಬಂಧಿತ ಅಂಕಪಟ್ಟಿಗಳ ಸಹಿತ ಡಿ. 3ರಂದು ಬೆಳಗ್ಗೆ 7.30ಕ್ಕೆ ವಿದ್ಯಾಗಿರಿಗೆ ಬರಬೇಕು. ಈಗಾಗಲೇ ಆನ್‌ಲೈನ್‌ ಮೂಲಕ ನೋಂದಣಿ ನಡೆಸಿದವರಿಗೆ ಮೊದಲಾಗಿ ಕಲರ್‌ ಕೋಡಿಂಗ್‌ ಒದಗಿಸಲಾಗುವುದು.

ಸ್ಥಳದಲ್ಲೇ ನೋಂದಣಿ ಮಾಡಿಸಲೂ ಅವಕಾಶವಿದೆ. 9.30ಕ್ಕೆ ಪುಟ್ಟ ಉದ್ಘಾಟನ ಕಾರ್ಯಕ್ರಮ ಇರುತ್ತದೆ. ನೋಂದಣಿ ಮಾಡಿಸಿಕೊಂಡು ಕಲರ್‌ ಕೋಡಿಂಗ್‌ ಪಡೆದುಕೊಂಡವರು ಸೂಕ್ತ ಕಂಪೆನಿಗಳ ಸಂದರ್ಶನ ಕೋಣೆಗೆ ಹೋಗಬೇಕು. ಉತ್ಪಾದನ ರಂಗದ ಕಂಪೆನಿಗಳು ಹೆಚ್ಚಿನ ಸಂಖ್ಯೆಯಲ್ಲಿ ಉದ್ಯೋಗ ಸಿರಿಯಲ್ಲಿ ಪಾಲ್ಗೊಳ್ಳುತ್ತಿವೆ. ಸೇಲ್ಸ್‌, ಐಟಿ, ಬ್ಯಾಂಕಿಂಗ್‌ ಸಹಿತ ಸುಮಾರು 80 ಕಂಪೆನಿಗಳು ಡಿ. 30ರಂದು ದಿನವಿಡೀ ಬಾಗಿಲನ್ನು ತೆರೆದಿರುತ್ತವೆ.

ಸಂಪೂರ್ಣ ಉಚಿತ
‘ಆಳ್ವಾಸ್‌ ಉದ್ಯೋಗ ಸಿರಿ’ ಉದ್ಯೋಗ ಮೇಳದಲ್ಲಿ ಪಾಲ್ಗೊಳ್ಳುವವರಿಗೆ ಯಾವುದೇ ಶುಲ್ಕ ಇಲ್ಲ. ನುಡಿಸಿರಿಯ ಊಟೋಪಹಾರದ ಸೌಕರ್ಯವೂ ಇದೆ. ಅನಿವಾರ್ಯವಾಗಿ ಮುನ್ನಾದಿನ ಬಂದರೆ ವಾಸ್ತವ್ಯಕ್ಕೂ ಏರ್ಪಾಡು ಮಾಡಲಾಗುವುದು ಎಂದು ಉದ್ಯೋಗ ಸಿರಿಯ ಸಮಗ್ರ ಉಸ್ತುವಾರಿ ನೋಡಿಕೊಳ್ಳುತ್ತಿರುವ ಆಳ್ವಾಸ್‌ ಶಿಕ್ಷಣ ಪ್ರತಿಷ್ಠಾನದ ಟ್ರಸ್ಟಿ ವಿವೇಕ ಆಳ್ವ ವಿವರಣೆ ನೀಡಿದ್ದಾರೆ.

ನೋಂದಣಿ ವಿವರಗಳಿಗಾಗಿ
www.alvasnudisiri.com 

ರಂಗಸಿರಿ 4 ದಿನ 5 ನಾಟಕ ಪ್ರದರ್ಶನ
ಆಳ್ವಾಸ್‌ ಶಿಕ್ಷಣ ಪ್ರತಿಷ್ಠಾನದ ಆಶ್ರಯದಲ್ಲಿ ನಾಲ್ಕು ದಿನ ನಡೆಯುವ ವಿದ್ಯಾರ್ಥಿಸಿರಿ ಮತ್ತು ನುಡಿಸಿರಿ ಸಾಹಿತ್ಯ-ಸಾಂಸ್ಕೃತಿಕ ಉತ್ಸವದಲ್ಲಿ ನಾಡೋಜ ಏಣಗಿ ಬಾಳಪ್ಪ ವೇದಿಕೆಯಲ್ಲಿ ಸಂಜೆ 6.30ರ ವೇಳೆಗೆ ‘ಆಳ್ವಾಸ್‌ ರಂಗಸಿರಿ’-ಐದು ನಾಟಕಗಳ ಪ್ರದರ್ಶನ ಏರ್ಪಡಿಸಲಾಗಿದೆ. ನ. 30ರಂದು ಆಳ್ವಾಸ್‌ ರಂಗ ಅಧ್ಯಯನ ಕೇಂದ್ರದವರು ವೈದೇಹಿ ರಚಿಸಿ , ಜೀವನ್‌ ರಾಂ ಸುಳ್ಯ ನಿರ್ದೇಶಿಸಿರುವ ‘ಧಾಂ ಧೂಂ ಸುಂಟರಗಾಳಿ’ (ಶೇಕ್ಸ್‌ಪಿಯರ್‌ನ ‘ಟೆಂಪೆಸ್ಟ್‌’ ಆಧಾರಿತ),  ಡಿ.1ರಂದು ನಟನ ಮೈಸೂರು ತಂಡದವರು ಮಂಡ್ಯ ರಮೇಶ್‌ ನಿರ್ದೇಶಿಸಿದ ‘ಸುಭದ್ರಾ ಕಲ್ಯಾಣ’, ಡಿ. 2ರಂದು ಅನನ್ಯ ಬೆಂಗಳೂರು ಇವರು ಸೇತುರಾಂ ರಚಿಸಿ ನಿರ್ದೇಶಿಸಿದ ‘ಅತೀತ’, ಅಂದು ರಾತ್ರಿ 8.20ರಿಂದ ಮಣಿಪಾಲದ ಸಂಗಮ ಕಲಾವಿದರು ಎಂ.ಗಣೇಶ್‌ ನಿರ್ದೇಶಿಸಿದ ‘ವಾಲಿವಧೆ’, ಡಿ. 3ರಂದು ಸಂಜೆ ಮೈಸೂರಿನ ಜಿ.ಪಿ.ಐ.ಇ.ಆರ್‌. ರಂಗ ತಂಡದವರು ಡಾ| ನಾ.ದಾಮೋದರ ಶೆಟ್ಟಿ ರಚಿಸಿ, ಮೈಮ್‌ ರಮೇಶ್‌ ನಿರ್ದೇಶಿಸಿರುವ ‘ಸಿರಿ’ ನಾಟಕ ಪ್ರದರ್ಶಿಸಲಿದ್ದಾರೆ.

ಕನ್ನಡಕ್ಕೆ ಬಲ
ಕನ್ನಡ ಮಾಧ್ಯಮದಲ್ಲಿ ಕಲಿತವರು ಮತ್ತು ಕಲಿಯುತ್ತಿರುವವರ ಮನೋಸ್ಥೈರ್ಯವನ್ನು ದೃಢಗೊಳಿಸುವ ಒಂದು ಪ್ರಯತ್ನ. ಇತರರಿಗಿಂತ ಕನ್ನಡ ಮಾಧ್ಯಮ ಕಲಿತವರು ಈ ನಾಡು, ನುಡಿ, ಸಂಸ್ಕೃತಿಯ ಕುರಿತಾಗಿ ಸುಭದ್ರ ನೆಲೆಗಟ್ಟನ್ನು ಹೊಂದಿರುತ್ತಾರೆ. ಅವರಿಗೆ ಉದ್ಯೋಗಾವಕಾಶ ಕಲ್ಪಿಸುವ ಮೂಲಕ ‘ನುಡಿಸಿರಿ’ ಔಚಿತ್ಯಪೂರ್ಣವಾಗಿ ನಡೆದಂತಾಗುತ್ತದೆ.
– ಡಾ| ಎಂ. ಮೋಹನ ಆಳ್ವ , ಅಧ್ಯಕ್ಷರು, ಆಳ್ವಾಸ್‌ ಶಿಕ್ಷಣ ಪ್ರತಿಷ್ಠಾನ