ರತ್ನಾಕರವರ್ಣಿ ಸಾಹಿತ್ಯ ಅಹಿಂಸಾಪರ: ಮುನಿರಾಜ ರೆಂಜಾಳ

Team Udayavani, Jan 28, 2017, 11:22 PM IST

ಉಜಿರೆ: ರತ್ನಾಕರವರ್ಣಿ ಸಾಹಿತ್ಯವು ಅಹಿಂಸೆಯ ಮೌಲ್ಯ ಎತ್ತಿಹಿಡಿಯುತ್ತದೆ ಎಂದು ಮೂಡಬಿದಿರೆ ಜೈನ್‌ ಪ್ರೌಢಶಾಲೆಯ ಮುಖ್ಯೋಪಾಧ್ಯಾಯ ಮುನಿರಾಜ ರೆಂಜಾಳ ಅಭಿಪ್ರಾಯಪಟ್ಟರು. ಸಮ್ಮೇಳನದ ಎರಡನೇ ದಿನ ರತ್ನಾಕರವರ್ಣಿ ಕಾವ್ಯದಲ್ಲಿ ಧಾರ್ಮಿಕ ಶ್ರದ್ಧೆ  ವಿಷಯದ ಕುರಿತಾದ ಕವಿನಮನ ಕಾರ್ಯಕ್ರಮದಲ್ಲಿ ಅವರು ಮಾತನಾಡಿದರು. ಯುದ್ಧ ಸಮಯದಲ್ಲಿ ಶತ್ರುನಾಶಕ್ಕಿಂತ ಕರ್ಮ ನಾಶ ಮುಖ್ಯವಾಗುತ್ತದೆ. ಜಗಳ, ಗಲಭೆಗಳನ್ನು ಯುದ್ಧದ ಮೂಲಕವೇ ಬಗೆಹರಿಸಿಕೊಳ್ಳುವುದು ಹಿಂಸೆ. ರತ್ನಾಕರವರ್ಣಿ ಈ ನಿಲುವನ್ನು ತನ್ನ ಸಾಹಿತ್ಯದ ಮೂಲಕ ಸ್ಪಷ್ಟಪಡಿಸಿದ್ದಾನೆ ಎಂದರು.

ಅಹಿಂಸೆಯ ಮೌಲ್ಯ
ಭರತೇಶ ವೈಭವದಲ್ಲಿ ಯುದ್ಧವೇ ನಡೆಯುವುದಿಲ್ಲ. ಪಂಪನಿಗಿಂತ ರತ್ನಾಕರವರ್ಣಿ ಈ ವಿಷಯದಲ್ಲಿ ಹೆಚ್ಚು ಶ್ರೇಷ್ಠವಾಗಿ ನಿಲ್ಲುತ್ತಾನೆ. ಪಂಪಪುರಾಣದ ಭರತ ಬಾಹುಬಲಿಯ ಯುದ್ಧ ಹಿಂಸೆಯನ್ನು ಬಿಂಬಿಸುತ್ತದೆ. ಭರತೇಶ ವೈಭವದಲ್ಲಿ ಅಹಿಂಸೆಯ ಮೌಲ್ಯವಿದೆ ಎಂದು ಹೇಳಿದರು. ಹಿಂದೆಯೂ ಧರ್ಮ ಧರ್ಮಗಳ ನಡುವೆ ಅಸಮಾಧಾನಗಳಿದ್ದವು. 16ನೇ ಶತಮಾನದಲ್ಲಿ ದಾಸ ಪರಂಪರೆಯಿಂದ ಮೌಲ್ಯ ಕಳೆದುಕೊಳ್ಳುತ್ತಿದ್ದ ಜೈನ ಪರಂಪರೆಯನ್ನು ರತ್ನಾಕರವರ್ಣಿ ಸಾಹಿತ್ಯದ ಮೂಲಕ ಉತ್ತರಿಸಲು ಮುರಿದು ಕಟ್ಟುತ್ತಾನೆ. ಆತನ ಈ ನಿಲುವು ಕನ್ನಡ ಸಾಹಿತ್ಯದಲ್ಲಿ ಪ್ರಮುಖ ಎಂದು ಅಭಿಪ್ರಾಯಪಟ್ಟರು.

ಶೃಂಗಾರವೇ ಹೆಚ್ಚಿರುವ ಭರತೇಶ ವೈಭವವನ್ನು ಸ್ವಧರ್ಮವೇ ಧಿಕ್ಕರಿಸಿದಾಗ ರತ್ನಾಕರವರ್ಣಿಯು ತನ್ನ ಕೃತಿಯ ಕುರಿತು ನೀಡುವ ಸಮರ್ಥನೆ ಅತೀ ಮಹತ್ವವಾದದ್ದು. ಅಧ್ಯಾತ್ಮದ ಸಾಧನೆಗಾಗಿ ಈ ಕೃತಿಯನ್ನು ಬರೆದೆ. ಭರತೇಶ ವೈಭವವು ಭೋಗ-ಯೋಗದ ಸಮನ್ವಯವೇ ಹೊರತು ಶೃಂಗಾರ ಕಾವ್ಯವೇ ಅಲ್ಲ ಎಂದು ಹೇಳಿಕೊಳ್ಳುತ್ತಾನೆ ಎಂದರು.

– ಸುಷ್ಮಾ ಉಪ್ಪಿನ್‌