ಕನಸು ಕೂಡ ಕಂಡಿರಲಿಲ್ಲ…

Team Udayavani, Jan 27, 2020, 7:06 AM IST

ತನಗೆ ಲಭಿಸಿರುವ ಪ್ರಶಸ್ತಿ - ಪುರಸ್ಕಾರ, ಸ್ಮರಣಿಕೆಗಳ ಜತೆಗೆ ಅಕ್ಷರ ಸಂತ ಹರೇಕಳ ಹಾಜಬ್ಬ.

ಉಳ್ಳಾಲ: ಇಂಥ ಪ್ರಶಸ್ತಿ ಬರುತ್ತದೆ ಎಂದು ಕನಸು ಕೂಡ ಕಂಡಿರಲಿಲ್ಲ. ನನಗೆ ಈ ಪ್ರಶಸ್ತಿ ಲಭ್ಯವಾಗಲು ಎಲ್ಲರ ಸಹಕಾರ ಕಾರಣ. ಈ ಬಡವನಿಗೆ ಪ್ರಶಸ್ತಿ ಸಿಕ್ಕಿದ್ದು ಖುಷಿ ಕೊಟ್ಟಿದೆ. ಮುಂದಿನ ದಿನಗಳಲ್ಲಿ ಸರಕಾರಿ ಪ.ಪೂರ್ವ ಕಾಲೇಜು ಸ್ಥಾಪನೆ ನನ್ನ ಕನಸು…

ಹರೇಕಳ ಹಾಜಬ್ಬ ಅವರು ಪದ್ಮ ಪ್ರಶಸ್ತಿಗೆ ಪ್ರತಿಕ್ರಿಯಿಸಿದ್ದು ಹೀಗೆ.

ಶನಿವಾರ ಮಧ್ಯಾಹ್ನ ರೇಶನ್‌ಗಾಗಿ ಸಾಲು ನಿಂತಿದ್ದಾಗ ಒಂದು ಕರೆ ಬಂತು. ದಿಲ್ಲಿಯಿಂದ ಬಂದ ಕರೆ ಅದಾಗಿದ್ದು, ಅವರು ಹಿಂದಿಯಲ್ಲಿ ಮಾತನಾಡಿದ ಕಾರಣ ನನಗೆ ಅರ್ಥ ಆಗಲಿಲ್ಲ. ನನ್ನ ಹತ್ತಿರವಿದ್ದ ಒಬ್ಬರಿಗೆ ಮಾತನಾಡಲು ಹೇಳಿದೆ. ಪ್ರಶಸ್ತಿ ಬಂದ ವಿಚಾರ ತಿಳಿದು ಗಾಬರಿಯಾಯಿತು. ಶಾಸಕ ಯು.ಟಿ. ಖಾದರ್‌ ಅವರೂ ಸಂಪರ್ಕಕ್ಕೆ ಸಿಗಲಿಲ್ಲ. ರಾತ್ರಿ ಟಿ.ವಿ.ಯಲ್ಲಿಪ್ರಶಸ್ತಿ ಘೋಷಣೆಯಾದ ವಿಚಾರ ನೋಡಿ ಹಿತೈಷಿಗಳು ದೂರವಾಣಿ ಕರೆ ಮಾಡಿದರು. ನಾನು ಆ ಸಂದರ್ಭದಲ್ಲಿ ಬಸ್‌ನಲ್ಲಿ ಮನೆಗೆ ಬರುತ್ತಿದ್ದೆ. ಸಹಾಯಕ ಜಿಲ್ಲಾ ಆಯುಕ್ತರು ದೂರವಾಣಿ ಕರೆ ಮಾಡಿ ರವಿವಾರ ನೆಹರೂ ಮೈದಾನದಲ್ಲಿ ನಡೆಯುವ ಗಣರಾಜ್ಯೋತ್ಸವ ಕಾರ್ಯಕ್ರಮದಲ್ಲಿ ಸಮ್ಮಾನ ಮಾಡುವ ವಿಚಾರ ತಿಳಿಸಿದ್ದಾರೆ ಎಂದು ಹಾಜಬ್ಬ ಹೇಳಿದ್ದಾರೆ.