ಮೀನುಗಾರಿಕೆ ದೋಣಿಗಳಿಗೆ ಡೀಸೆಲ್‌, ಸೀಮೆಎಣ್ಣೆ

Team Udayavani, Jul 19, 2023, 6:36 AM IST

ಬೆಂಗಳೂರು ದಕ್ಷಿಣ ಕನ್ನಡ ಜಿಲ್ಲೆಯ ಕರಾವಳಿಯಲ್ಲಿ ಆರ್ಥಿಕ ಹಾಗೂ ಸಾಮಾಜಿಕವಾಗಿ ಹಿಂದುಳಿದಿರುವ ಮೊಗವೀರ ಸಮುದಾಯಕ್ಕೆ ಸೌಲಭ್ಯಗಳನ್ನು ಒದಗಿಸಬೇಕು ಎಂದು ಆಗ್ರಹಿಸಿದ ಬಿಜೆಪಿಯ ವೇದವ್ಯಾಸ ಕಾಮತ್‌, ಮೀನುಗಾರಿಕಾ ದೋಣಿಗಳಿಗೆ ಡೀಸೆಲ್‌ ಸಬ್ಸಿಡಿ ಹೆಚ್ಚಿಸಬೇಕು, ಹೆಚ್ಚುವರಿ ಸೀಮೆಎಣ್ಣೆ ನೀಡಬೇಕು ಎಂದು ಒತ್ತಾಯಿಸಿದರು.

ಗಮನ ಸೆಳೆಯುವ ಸೂಚನೆ ವೇಳೆ ಮಾತನಾಡಿದ ಅವರು, ಮೀನುಗಾ ರರ ರಕ್ಷಣೆಗಾಗಿ ಪ್ರತ್ಯೇಕ ಸಮುದ್ರ ಆ್ಯಂಬುಲೆನ್ಸ್‌ ವ್ಯವಸ್ಥೆ ಕಲ್ಪಿಸಬೇಕು. 3ನೇ ಮೀನುಗಾರಿಕ ಜಟ್ಟಿ ವಿಸ್ತರಣೆಗಾಗಿ 49 ಕೋ. ರೂ. ಕಾಮಗಾರಿ ಕೈಗೊಳ್ಳಲಾಗಿತ್ತು. ಅದೀಗ ಹಸಿರು ನ್ಯಾಯಾಧಿಕರಣದ ಮುಂದೆ ಇದ್ದು, ಸರಕಾರ ಮಧ್ಯಪ್ರವೇಶಿಸಿ ಕಾನೂನಾತ್ಮಕವಾಗಿ ಇತ್ಯರ್ಥಪಡಿಸ ಬೇಕು ಎಂದು ಆಗ್ರಹಿಸಿದರು.

ಇದಕ್ಕೆ ಉತ್ತರಿಸಿದ ಸಚಿವ ಮಂಕಾಳ ಸುಬ್ಬ ವೈದ್ಯ, 1.50 ಲಕ್ಷ ಲೀಟರ್‌ ಇದ್ದ ಡೀಸೆಲ್‌ ಅನ್ನು 2 ಲಕ್ಷ ಲೀಟರ್‌ಗೆ ಏರಿಕೆ ಮಾಡಲು ಬಜೆಟ್‌ನಲ್ಲಿ ನಿರ್ಧರಿಸಿದ್ದೇವೆ. ಇದಕ್ಕಾಗಿ 252 ಕೋಟಿ ರೂ. ವಾರ್ಷಿಕ ಬಜೆಟ್‌ ಅನ್ನೂ ಮೀಸಲಿಟ್ಟಿದ್ದೇವೆ. ತಿಂಗಳಿಗೆ 300 ಲೀಟರ್‌ನಂತೆ 10 ತಿಂಗಳ ಕಾಲ ಸೀಮೆಎಣ್ಣೆ ಕೊಡಲು ರಾಜ್ಯ ಸರಕಾರ ಸಿದ್ಧವಿದೆ. ಆದರೆ, ಇದಕ್ಕೆ ಅಗತ್ಯವಿರುವ ಹೆಚ್ಚುವರಿ ಸೀಮೆಎಣ್ಣೆಯನ್ನು ಕೇಂದ್ರ ಸರಕಾರ ನಿಗದಿಪಡಿಸಬೇಕಿರುವುದರಿಂದ ಒತ್ತಡ ಹಾಕುತ್ತೇವೆ. ಇಲ್ಲದಿದ್ದರೆ ಕೈಗಾರಿಕೆಗಳಿಂದ ಸೀಮೆಎಣ್ಣೆ ಖರೀದಿಸಿಯಾದರೂ ಕೊಡುತ್ತೇವೆ ಎಂದು ಭರವಸೆ ನೀಡಿದರು.

ಸಾಗರಮಾಲಾ ಯೋಜನೆ
2016-17ರಲ್ಲಿ ಸಾಗರಮಾಲಾ ಯೋಜನೆಯಡಿ 1,034 ಕೋಟಿ ರೂ.ಗಳ 26 ಕಾಮಗಾರಿಗಳನ್ನು ಕೈಗೊಂಡಿದ್ದರೂ, 1 ಕಾಮಗಾರಿ ಮಾತ್ರ ಶುರುವಾಗಿದೆ. ಸಿಆರ್‌ಝಡ್‌ ಕಾರಣ ನೀಡಿ ಎಲ್ಲ ಕಾಮಗಾರಿಗಳು ಹಾಗೆಯೇ ಉಳಿದಿವೆ. ಶೀಘ್ರದಲ್ಲೇ ಈ ಬಗ್ಗೆ ಕ್ರಮ ವಹಿಸುತ್ತೇವೆ. ಇನ್ನು ಕಡಲ್ಕೊರೆತ ತಡೆ ಕಾಮಗಾರಿಯ 55 ಕೋಟಿ ರೂ. ಬಿಡುಗಡೆ ಮಾಡಿಲ್ಲ ಎನ್ನುತ್ತೀರಿ. ಈಗಾಗಲೇ 20 ಕೋಟಿ ರೂ. ಇಟ್ಟಿದ್ದೇವೆ. ಅನುದಾನದ ಲಭ್ಯತೆ ಆಧರಿಸಿ ಉಳಿದ ಹಣ ಬಿಡುಗಡೆ ಮಾಡುತ್ತೇವೆ ಎಂದರು.

ಕಡಲ್ಕೊರೆತ: ಸಭೆ ನಡೆಸಿ
ಬಿಜೆಪಿಯ ಸುನಿಲ್‌ಕುಮಾರ್‌ ಮಧ್ಯಪ್ರವೇಶಿಸಿ, ನಿಮ್ಮ ಅನುದಾನಕ್ಕೆ ನಾವು ಕಾಯಬಹುದು, ಕಡಲ್ಕೊರೆತ ಕಾಯುವುದಿಲ್ಲ ಎನ್ನುತ್ತಿದ್ದಂತೆ, ಸ್ಪೀಕರ್‌ ಖಾದರ್‌ ಮಧ್ಯಪ್ರವೇಶಿಸಿ, ಕಡಲ್ಕೊರೆತ ತಡೆ ಸಂಬಂಧ ಸಿಎಂ ಜತೆಗೆ ಶಾಸಕರ ಸಭೆ ಆಯೋಜಿಸಿ ಎಂದು ಸೂಚಿಸಿದರು.