ಸಂಪರ್ಕ ರಸ್ತೆಗಳಲ್ಲಿ ಸುಗಮ ಸಂಚಾರಕ್ಕೆ ‘ಸರ್ಕಲ್‌’ಗಳೇ ಅಡ್ಡಿ

Team Udayavani, Sep 20, 2018, 10:20 AM IST

ಸುಳ್ಯ : ನಗರದ ಮಧ್ಯ ಭಾಗದಲ್ಲಿ ಹಾದು ಹೋಗುವ ಮಾಣಿ-ಮೈಸೂರು ಹೆದ್ದಾರಿಯಿಂದ ಕವಲೊಡೆದು ವಿವಿಧ ಭಾಗಕ್ಕೆ ಸಂಪರ್ಕ ಕಲ್ಪಿಸುವ ತಿರುವು ರಸ್ತೆಗಳಲ್ಲಿ ಸರ್ಕಲ್‌ (ವೃತ್ತ) ಅವ್ಯವಸ್ಥೆ ಸಂಚಾರಕ್ಕೆ ಸಂಕಟ ತಂದೊಡ್ಡಿದೆ. ನಗರದೊಳಗೆ ಹಲವು ಭಾಗಕ್ಕೆ ಸಂಪರ್ಕಿಸುವ ಸಂದರ್ಭದಲ್ಲಿ ಸೂಕ್ತ ಸರ್ಕಲ್‌ ಇಲ್ಲದೆ ವಾಹನಗಳು, ಪಾದಚಾರಿಗಳಿಗೆ ತೊಂದರೆ ಉಂಟಾಗಿದೆ. ಸಿಗ್ನಲ್‌ ಸಹಿತ ಸುರಕ್ಷಿತ ಕ್ರಮ ಅನುಷ್ಠಾನಿಸಬೇಕು ಎನ್ನುವ ಬೇಡಿಕೆ ಹೆಚ್ಚಾಗಿದೆ.

ಸರ್ಕಲ್‌ ಸಮಸ್ಯೆ
ಮಡಿಕೇರಿಗೆ ಪರ್ಯಾಯ ಮಾರ್ಗವಾಗಿರುವ ಸುಳ್ಯ – ಆಲೆಟ್ಟಿ – ಭಾಗಮಂಡಲ – ಮಡಿಕೇರಿ ರಸ್ತೆ ನಗರದ ಗಾಂಧಿನಗರ ಮುಖ್ಯ ರಸ್ತೆಯಿಂದ ತಿರುವು ಪಡೆದುಕೊಳ್ಳುತ್ತದೆ. ಪ್ರಸ್ತುತ ಕೆಎಸ್‌ ಆರ್‌ಟಿಸಿ ಬಸ್‌ ಸಹಿತ ಹಲವು ವಾಹನಗಳು ಇದೇ ರಸ್ತೆಯಲ್ಲಿ ಸಂಚರಿಸುತ್ತಿವೆ. ಇಲ್ಲಿ ವೃತ್ತ ಇಲ್ಲದೆ ತಿರುವಿನಲ್ಲಿ ವಾಹನ ದಟ್ಟಣೆ ಹೆಚ್ಚಿದೆ. ನಗರದ ಹೃದಯ ಭಾಗದಿಂದ ಜೂನಿಯರ್‌ ಕಾಲೇಜು, ತಾ.ಪಂ. ಸಹಿತ ಹಲವು ಸರಕಾರಿ ಕಚೇರಿಗಳಿಗೆ ಸಂಪರ್ಕ ರಸ್ತೆಯಲ್ಲಿ ಸರ್ಕಲ್‌ ಇಲ್ಲ. ಸರಕಾರಿ ಬಸ್‌, ಖಾಸಗಿ ವಾಹನಗಳು ಗರಿಷ್ಠ ಸಂಖ್ಯೆಯಲ್ಲಿ ಸಂಚರಿಸುವ ಮುಖ್ಯ ರಸ್ತೆಯಿಂದ ಈ ರಸ್ತೆ ತಿರುವು ಪಡೆದುಕೊಳ್ಳುತ್ತದೆ. ಪ್ರತಿ ದಿನ ಇಲ್ಲಿ ಸಂಚಾರ ಸಿಬಂದಿ ಕಾರ್ಯನಿರ್ವಹಿಸುತ್ತಿದ್ದಾರೆ. ವೃತ್ತ ಇಲ್ಲದೆ ಆಗಾಗ್ಗೆ ಸಾಲು ವಾಹನ ನಿಲುಗಡೆ ಸಮಸ್ಯೆ ತಪ್ಪಿಲ್ಲ.

ಮಾರ್ಗಸೂಚಿ ಇಲ್ಲ
ಬೆಳ್ಳಾರೆ, ಸುಬ್ರಹ್ಮಣ್ಯ ಭಾಗದಿಂದ ನಗರವನ್ನು ಪ್ರವೇಶಿಸುವ ಪೈಚಾರು ಬಳಿ ಮಾರ್ಗಸೂಚಿ ವ್ಯವಸ್ಥೆ ಇಲ್ಲ. ಮೂರು ದಿಕ್ಕುಗಳಿಂದ ವಾಹನಗಳು ಏಕಾಏಕಿ ಪ್ರವೇಶಿಸುತ್ತವೆ. ಜ್ಯೋತಿ ಆಸ್ಪತ್ರೆ ತಿರುವು ಬಳಿ ಸರ್ಕಲ್‌ ಇದೆ. ಶಾಲೆ, ಆಸ್ಪತ್ರೆ ಸನಿಹದಲ್ಲಿರುವ ಕಾರಣ ಬೆಳಗ್ಗೆ ಹೊತ್ತು ಟ್ರಾಫಿಕ್‌ ಸಮಸ್ಯೆ ಇದ್ದದ್ದೆ. ಜಟ್ಟಿಪಳ್ಳ ತಿರುವು ಬಳಿ ಹೈಮಾಸ್ಟ್‌ ದೀಪದ ಕಂಬ ಇದ್ದರೂ ರಸ್ತೆಯ ಕೇಂದ್ರ ಭಾಗದಲ್ಲಿ ಇಲ್ಲದೆ ಪ್ರಯೋಜನಕ್ಕಿಲ್ಲದಂತಾಗಿದೆ.

ಅಧಿಕೃತ ಸರ್ಕಲ್‌ 4 ಮಾತ್ರ..!
ನಗರ ಪಂಚಾಯತ್‌ ವ್ಯಾಪ್ತಿಯಲ್ಲಿ ಇರುವ ಅಧಿಕೃತ ಸರ್ಕಲ್‌ಗ‌ಳ ಸಂಖ್ಯೆ 4. ಕುರುಂಜಿ, ವಿವೇಕಾನಂದ, ಚೆನ್ನಕೇಶವ, ಶಾಸ್ತ್ರಿ ವೃತ್ತಗಳು. ಇವುಗಳ ಅಭಿವೃದ್ಧಿಗೆ ನ.ಪಂ. ಯಾವುದೇ ಯೋಜನೆ ರೂಪಿಸಿಲ್ಲ. ಇವುಗಳಲ್ಲದೆ ನಗರದ ವಿವಿಧ ಭಾಗದಲ್ಲಿ ಸರ್ಕಲ್‌ ನಿರ್ಮಾಣ ಅಗತ್ಯವಿರುವ ತಿರುವುಗಳಿವೆ. ಅವುಗಳ ಸುಧಾರಣೆಗೆ ನ.ಪಂ. ಮುಂದಾಲೋಚನೆ ಮಾಡಬೇಕಿದೆ.

ಸಂಚಾರ ಠಾಣೆಯಿಲ್ಲ
ಸಂಚಾರ ನಿಯಂತ್ರಣಕ್ಕೆ ಅಗತ್ಯವಾಗಿ ಇರಬೇಕಾಗಿದ್ದ ಸಂಚಾರ ಠಾಣೆಯೇ ಇಲ್ಲಿಲ್ಲ. ಹಾಗಾಗಿ ನಗರ ಠಾಣಾ ಪೊಲೀಸರು, ಗೃಹರಕ್ಷಕ ಸಿಬಂದಿಗೆ ನಿಯಂತ್ರಣ ಜವಾಬ್ದಾರಿ ನೀಡಲಾಗಿದೆ. ರಾಷ್ಟ್ರೀಯ ಹೆದ್ದಾರಿ ಸೇರ್ಪಡೆಗೊಳ್ಳಲಿರುವ ಮಾಣಿ-ಮೈಸೂರು ರಸ್ತೆ ಹಾದು ಹೋಗಿರುವ ತಾಲೂಕಿನಲ್ಲಿ ಬೆಂಗಳೂರು, ಮೈಸೂರು, ಕೊಡಗು ಹಾಗೂ ಕೇರಳ ರಾಜ್ಯಗಳಿಂದ ನೂರಾರು ವಾಹನಗಳು ಸಂಚರಿಸುತ್ತಿವೆ.

ರಸ್ತೆ ದಾಟುವುದೇ ಸವಾಲು
ಜ್ಯೋತಿ ಸರ್ಕಲ್‌, ಜೂನಿಯರ್‌ ಕಾಲೇಜು ತಿರುವು ರಸ್ತೆ, ಗಾಂಧಿನಗರ ತಿರುವು ಬಳಿ ನೂರಾರು ವಿದ್ಯಾರ್ಥಿಗಳು ರಸ್ತೆ ದಾಟುತ್ತಾರೆ. ಬೆಳಗ್ಗೆ, ಸಂಜೆ ವೇಳೆ ರಸ್ತೆ ದಾಟುವ ಸಂದರ್ಭದಲ್ಲಿ ಯಾವುದೇ ಸುರಕ್ಷಿತ ಕ್ರಮಗಳು ಇಲ್ಲಿಲ್ಲ. ವಾಹನಗಳ ನಡುವೆ ನುಸುಳಿಕೊಂಡು ರಸ್ತೆ ದಾಟುವ ದೃಶ್ಯಗಳು ಕಂಡು ಬರುತ್ತವೆ. ಇಲ್ಲಿ ವಾಹನ/ಪಾದಚಾರಿ ಸಂಚಾರಕ್ಕೆ ನಿಯಮಗಳು ಇಲ್ಲ. ಬೆರಳೆಣಿಕೆಯ ಸಂಚಾರಿ ಸಿಬಂದಿಗೆ ಸಂಚಾರ ನಿಯಂತ್ರಣ ಸವಾಲೆನಿಸಿದೆ.

ಪ್ರಮುಖ ಸಂಪರ್ಕ ರಸ್ತೆಗಳು
. ಪೈಚಾರು-ಸೋಣಗೇರಿ ರಸ್ತೆ ( ಮೂರು ಮಾರ್ಗ)
. ಶಾಸ್ತ್ರಿ ವೃತ್ತ-ಚರ್ಚ್‌ ಶಾಲೆ ರಸ್ತೆ (ನಾಲ್ಕು ಮಾರ್ಗ)
. ಜಟ್ಟಿಪಳ್ಳ-ಕೊಡಿಯಾಲಬೈಲು ರಸ್ತೆ (ಮೂರು ಮಾರ್ಗ)
. ಶ್ರೀರಾಂಪೇಟೆ-ಜೂನಿಯರ್‌ ಕಾಲೇಜು ರಸ್ತೆ (ಮೂರು ಮಾರ್ಗ)
. ಗಾಂಧಿನಗರ-ನಾಗಪಟ್ಟಣ ರಸ್ತೆ (ಮೂರು ಮಾರ್ಗ)

ಬೇಡಿಕೆ ಬಂದಿಲ್ಲ
ನಗರ ಪಂಚಾಯತ್‌ ವ್ಯಾಪ್ತಿಯಲ್ಲಿ ನಾಲ್ಕು ಸರ್ಕಲ್‌ಗ‌ಳು ಇವೆ. ಬೇರೆ ಬೇಡಿಕೆ ಬಂದಿಲ್ಲ. ವೈಯಕ್ತಿಕವಾಗಿ ಅಭಿವೃದ್ಧಿಗೆ ಕ್ರಿಯಾಯೋಜನೆ ರೂಪಿಸಿಲ್ಲ. ಪ್ರತ್ಯೇಕವಾಗಿ ಮಾಸ್ಟರ್‌ ಪ್ಲಾನ್‌ ರೂಪಿಸುವ ಸಂದರ್ಭದಲ್ಲಿ ನಿರ್ದಿಷ್ಟ ನಿಯಮಾನುಸಾರ ಅಭಿವೃದ್ಧಿ ಮಾಡಬಹುದಾಗಿದೆ.
 – ಶಿವಕುಮಾರ್‌
 ಸುಳ್ಯ ನ.ಪಂ. ಎಂಜಿನಿಯರ್‌

ಕಿರಣ್‌ ಪ್ರಸಾದ್‌ ಕುಂಡಡ್ಕ