ರಂಗಭೂಮಿಯಿಂದ ಹೊಸ ಪ್ರತಿಭೆಗಳಿಗೆ ಪ್ರೋತ್ಸಾಹ

Team Udayavani, May 3, 2018, 3:06 PM IST

ಪ್ರಸ್ತುತ ತುಳು, ಕನ್ನಡ ಚಿತ್ರರಂಗದಲ್ಲಿ ಹೆಸರು ಮಾಡಿರುವ ಅನೇಕ ಹಿರಿಯ ನಟರು ರಂಗಭೂಮಿಯಿಂದಲೇ ಹೋದವರು. ಇನ್ನೂ ತುಳು ರಂಗಭೂಮಿಯಿಂದ ಅನೇಕ ಪ್ರತಿಭೆಗಳಿಗೆ ಪ್ರೋತ್ಸಾಹ ದೊರೆತಿದೆ. ಪ್ರಸ್ತುತ ಅವರು ಉತ್ತಮ ಸ್ಥಾನದಲ್ಲಿದ್ದಾರೆ ಎಂಬುದು ಹಿರಿಯ ರಂಗಕರ್ಮಿ ವಿ.ಜಿ. ಪಾಲ್‌ ಅವರ ಮನದಾಳದ ಮಾತು.

ಕಳೆದ 57 ವರ್ಷಗಳಿಂದ ತುಳು ರಂಗಭೂಮಿ ಹಾಗೂ ಚಿತ್ರರಂಗದಲ್ಲಿ ತಮ್ಮದೇ ಆದ ಛಾಪು ಮೂಡಿಸಿರುವ ಪಾಲ್‌, ಬೊಕ್ಕಪಟ್ಣ ನಿವಾಸಿ. 1960ರಲ್ಲಿ ವಿಶುಕುಮಾರ್‌ ಅವರ ‘ಕಲ್ಜಿಗದ ಕುರುಕ್ಷೇತ್ರ’ ನಾಟದ ಮೂಲಕ ಬಣ್ಣ ಹಚ್ಚಿದ ಇವರು, ಮತ್ತೆ ಹಿಂತಿರುಗಿ ನೋಡಲೇ ಇಲ್ಲ. ರಂಗಭೂಮಿ ಮಾತ್ರವಲ್ಲದೆ ತುಳು ಸಿನೆಮಾ, ಕನ್ನಡ- ತುಳು ಕಿರುತೆರೆ ಚಿತ್ರ, ವೀಡಿಯೋ ಚಿತ್ರ, ಸಾಕ್ಷ್ಯಚಿತ್ರಗಳಲ್ಲೂ ನಟಿಸಿದ್ದಾರೆ. ಸುಮಾರು 50ಕ್ಕೂ ಹೆಚ್ಚು ಧ್ವನಿ ಸುರುಳಿಗೆ ಕಂಠದಾನ ಮಾಡಿದ್ದಾರೆ. ನೂರಕ್ಕೂ ಅಧಿಕ ಸಮ್ಮಾನಗಳು ಅವರನ್ನು ಅರಸಿ ಬಂದಿವೆ. ಅಭಿನಯದ ಮೂಲಕ ಕಲಾಭಿಮಾನಿಗಳ ಗಮನ ಸೆಳೆದಿದ್ದ ಪಾಲ್‌, ಅವರು ನಿರ್ದೇಶನದಲ್ಲೂ ಸೈ ಅನಿಸಿಕೊಂಡವರು. 

ರಂಗಭೂಮಿ ಚಟುವಟಿಕೆಗಳು ಹಿಂದೆ ಹೇಗಿತ್ತು, ಈಗ ಹೇಗಿವೆ?
ಪ್ರಸ್ತುತ ರಂಗಭೂಮಿ ಪ್ರದರ್ಶನಗಳು ಹೆಚ್ಚಾಗಿವೆ. ಹಿಂದೆ ಕೆ.ಎನ್‌. ಟೇಲರ್‌, ಸಂಜೀವ ದಂಡಕೇರಿ ಸಹಿತ ಕೆಲವು ನಾಟಕಕಾರರ ಸೀಮಿತ ನಾಟಕಗಳು ಪ್ರದರ್ಶನಗೊಳ್ಳುತ್ತಿದ್ದವು. ಆದರೆ ಈಗ ದ.ಕ. ಜಿಲ್ಲೆಯಲ್ಲಿ ಸುಮಾರು 40ರಷ್ಟು ನಾಟಕ ತಂಡಗಳು ಕಾರ್ಯಾಚರಿಸುತ್ತಿವೆ. ಇದರಿಂದ ಉದಯೋನ್ಮುಖ ಕಲಾವಿದರಿಗೆ ಉತ್ತಮ ವೇದಿಕೆ ದೊರೆಯುತ್ತಿದೆ. ವರ್ಷದ 9 ತಿಂಗಳು ಕೂಡ ವಿವಿಧ ತಂಡಗಳಿಂದ ನಾಟಕಗಳು ಜರಗುತ್ತಿವೆ.

ರಂಗಭೂಮಿಗೆ ಕಲಾವಿದರ ಕೊರತೆ ಕಾಡುತ್ತಿದೆಯೇ?
ಖಂಡಿತವಾಗಿಯೂ ಇಲ್ಲ. ಹೊಸ ಪ್ರತಿಭೆಗಳು ಹೊರ ಹೊಮ್ಮುತ್ತಿದ್ದಾರೆ. ಆದರೆ ಅವಕಾಶಗಳ ಸಂಖ್ಯೆ ಕಡಿಮೆಯಾಗಿರಬಹುದು.

ಮಂಗಳೂರಿನಲ್ಲಿ ರಂಗಭೂಮಿಗೆ ಪ್ರೋತ್ಸಾಹ ಹೇಗಿದೆ?
ಹಿಂದೆ ಬಹುತೇಕ ನಾಟಕಗಳು ನಗರದ ಪುರಭವನದಲ್ಲೇ ನಡೆಯುತ್ತಿದ್ದವು. ಆದರೆ ಈಗ ಇಲ್ಲಿ ಕಡಿಮೆಯಾಗಿವೆ. ಇದರ ಬದಲು ವಿವಿಧ ಧಾರ್ಮಿಕ ಕ್ಷೇತ್ರ, ಸಾಂಸ್ಕೃತಿಕ ಕಾರ್ಯಕ್ರಮಗಳಲ್ಲಿ ನಾಟಕಗಳಿಗೆ ಹೆಚ್ಚಿನ ಆದ್ಯತೆ ನೀಡಲಾಗುತ್ತಿದೆ.

ಸಿನೆಮಾ ರಂಗದಿಂದ ರಂಗಭೂಮಿಗೆ ಹಿನ್ನಡೆಯಾಗಿದೆಯೇ?
ತುಳು ಸಿನೆಮಾ ನಾಟಕ ಕಲಾವಿದರನ್ನು ಸೆಳೆಯುತ್ತಿದೆ. ಇವೆರಡನ್ನೂ ಹೊಂದಿಸಲು ಹರಸಾಹಸ ಪಡುವ ಕಲಾವಿದರು ನಾಟಕದಿಂದ ಹಿಂದೆ ಸರಿಯುತ್ತಿದ್ದಾರೆ. ಆದರೆ ಸಂಪೂರ್ಣ ಹಿನ್ನಡೆಯಾಗಿದೆ ಎಂದು ಹೇಳಲು ಸಾಧ್ಯವಿಲ್ಲ.

ಪ್ರಸ್ತುತ ನಾಟಕ ರಚನೆಕಾರರ ಸಂಖ್ಯೆ ಕಡಿಮೆಯಾಗಿದೆಯಾ?
ಹೌದು. ಪ್ರಸ್ತುತ ಹೊಸ ರಚನೆಕಾರರಿಗೆ ಅವಕಾಶ ಕೊಡಬೇಕು. ತುಳು ಸಂಘಟನೆಗಳು ವಿವಿಧ ಕಾರ್ಯಕ್ರಮಗಳನ್ನು ಆಯೋಜಿಸುವ ಮೂಲಕ ತುಳು ನಾಟಕ ರಚನೆಗೆ ಅವಕಾಶ ಕಲ್ಪಿಸಬೇಕು.

ಪ್ರಜಾ ಶೆಟ್ಟಿ