ಫೆ. 18, 19: ಧರ್ಮಸ್ಥಳ, ಸುಬ್ರಹ್ಮಣ್ಯ ದೇವಸ್ಥಾನಕ್ಕೆ ಶಾ ಭೇಟಿ?

Team Udayavani, Feb 8, 2018, 8:15 AM IST

ಸುಬ್ರಹ್ಮಣ್ಯ: ಭಾರತೀಯ ಜನತಾ ಪಕ್ಷದ ರಾಷ್ಟ್ರೀಯ ಅಧ್ಯಕ್ಷ ಅಮಿತ್‌ ಶಾ ಅವರು ಫೆ. 19ರಂದು ಶ್ರೀ ಕ್ಷೇತ್ರ ಧರ್ಮಸ್ಥಳ ಮತ್ತು ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ಕ್ಷೇತ್ರಕ್ಕೆ ಭೇಟಿ ನೀಡಲಿದ್ದಾರೆ. ಪಕ್ಷದ ಮೂಲಗಳು ಇದನ್ನು ಖಚಿತಪಡಿಸಿವೆ.

ಫೆ. 18ಕ್ಕೆ ಶ್ರೀ ಕ್ಷೇತ್ರ ಧರ್ಮಸ್ಥಳಕ್ಕೆ ಆಗಮಿಸಿ ಅಲ್ಲಿ ತಂಗುವ ಅವರು ಮರುದಿನ ಕುಕ್ಕೆ ಕ್ಷೇತ್ರಕ್ಕೆ ಆಗಮಿಸಿ ನಾಗ ಸಂಬಂಧಿ ವಿಶೇಷ ಸೇವೆ ಸಲ್ಲಿಸುವರು. ಬಳಿಕ  ಪಕ್ಷದ ಜಿಲ್ಲಾ ಮುಖಂಡರ ಸಭೆ ನಡೆಸುವರು ಎಂಬ ಮಾಹಿತಿ ಪಕ್ಷದ ಮೂಲಗಳಿಂದ ಲಭ್ಯವಾಗಿದೆ. ಒಂದು ಮೂಲದ ಪ್ರಕಾರ ಅವರು ಕುಕ್ಕೆಯಲ್ಲಿ ತಂಗುತ್ತಾರೆ ಎಂದೂ ಹೇಳಲಾಗುತ್ತಿದೆ.

ಅಮಿತ್‌ ಶಾ ಅವರು ಕುಕ್ಕೆ ಕ್ಷೇತ್ರಕ್ಕೆ ಮಾರ್ಚ್‌ನಲ್ಲಿ ಭೇಟಿ ನೀಡಲಿದ್ದಾರೆ ಎಂಬ ಮಾಹಿತಿ  ಸ್ಥಳೀಯ ನಾಯಕರಲ್ಲಿತ್ತು. ಆದರೆ ಇದೀಗ ದಿಢೀರ್‌ ಅವರ ಭೇಟಿ ರಾಜಕೀಯ ವಲಯದಲ್ಲಿ ತೀವ್ರ ಸಂಚಲನ ಮೂಡಿಸಿದೆ.

ಕ್ಷೇತ್ರ ಜತೆ ನಂಟು: ಅಮಿತ್‌ ಶಾ ಕುಟುಂಬಕ್ಕೂ ಕುಕ್ಕೆ ಸುಬ್ರಹ್ಮಣ್ಯಕ್ಕೂ ಹಿಂದಿನಿಂದಲೂ ನಂಟಿದೆ. ಅವರ ಸಹೋದರಿ ಎರಡು ವರ್ಷದ ಹಿಂದೆ ಕುಕ್ಕೆ ದೇಗುಲಕ್ಕೆ ಭೇಟಿ ನೀಡಿ ಸೇವೆ ಸಲ್ಲಿಸಿ ತೆರಳಿದ್ದರು.