‘ಗಾಂಧೀ ತತ್ವ ಗಳು ಅಜರಾಮರ’

Team Udayavani, Oct 3, 2017, 11:06 AM IST

ಮಹಾನಗರ : ಶಾಂತಿ- ಸೌಹಾರ್ದವನ್ನು ಜಗತ್ತಿಗೆ ಸಾರಿದ ಮಹಾತ್ಮಾ ಗಾಂಧೀಜಿ ಅವರ ತತ್ವಗಳು ಎಂದೆಂದಿಗೂ ಅಜರಾಮರ ಎಂದು ಮೇಯರ್‌ ಕವಿತಾ ಸನಿಲ್‌ ಹೇಳಿದರು.

ಮಹಾನಗರ ಪಾಲಿಕೆ, ರೋಟರಿ ಕ್ಲಬ್‌ ಮಂಗಳೂರು ಸೆಂಟ್ರಲ್‌ ಹಾಗೂ ರೋಟರ್ಯಾಕ್ಟ್ ಕ್ಲಬ್‌ ಮಂಗಳೂರು ಸಿಟಿ ಆಶ್ರಯದಲ್ಲಿ ಗಾಂಧೀ ಜಯಂತಿ ಹಿನ್ನೆಲೆಯಲ್ಲಿ ಸೋಮವಾರ ಪಾಲಿಕೆ ಆವರಣದಲ್ಲಿರುವ ಗಾಂಧೀ ಪ್ರತಿಮೆಗೆ ಮಾಲಾರ್ಪಣೆ ನಡೆಸಿ ಅವರು ಮಾತನಾಡಿದರು.

‘ಗಾಂಧೀಜಿಯವರ ಆದರ್ಶ ಜೀವನವೇ ನಮ್ಮೆಲ್ಲರಿಗೆ ಮಾದರಿ. ಅವರ ಒಂದೊಂದು ತತ್ವ ಹಾಗೂ ಅವರು ನಡೆದು ಬಂದ ಹೆಜ್ಜೆಗಳು ನಮ್ಮ ಮುಂದಿನ ಭವಿಷ್ಯಕ್ಕೂ ಆಧಾರವಾಗುತ್ತವೆ. ಈ ನೆಲೆಯಲ್ಲಿ ಗಾಂಧೀ ತತ್ವ ಮತ್ತು ಆದರ್ಶಗಳು ನಮ್ಮ ಮಕ್ಕಳಿಗೆ ಬೆಳಕಾಗಲಿ’ ಎಂದರು.

ಉಪಮೇಯರ್‌ ರಜನೀಶ್‌ ಕಾಪಿಕಾಡ್‌, ಮುಖ್ಯ ಸಚೇತಕ ಎಂ. ಶಶಿಧರ ಹೆಗ್ಡೆ, ಆರೋಗ್ಯ ಸ್ಥಾಯೀ ಸಮಿತಿ ಅಧ್ಯಕ್ಷೆ ನಾಗವೇಣಿ, ಆಯುಕ್ತ ಮಹಮ್ಮದ್‌ ನಝೀರ್‌, ರೋಟರಿ ಕ್ಲಬ್‌ ಮಂಗಳೂರು ಸೆಂಟ್ರಲ್‌ ಅಧ್ಯಕ್ಷ ರೇಮಂಡ್‌ ಡಿ’ಕುನ್ಹಾ, ಉಪಾಧ್ಯಕ್ಷ ರಾಜ್‌ಗೋಪಾಲ್‌ ರೈ, ರೋಟರ್ಯಾಕ್ಟ್ ಅಧ್ಯಕ್ಷೆ ಪವಿತ್ರಾ ಆಚಾರ್‌, ರೋಟರಿ ಮಾಜಿ ಗವರ್ನರ್‌ ಡಾ| ದೇವದಾಸ್‌ ರೈ, ಪೊಂಪೈ ಪ್ರೌಢಶಾಲೆ ಶಿಕ್ಷಕಿ ಡೋರಿನ್‌ ಫೆರ್ನಾಂಡಿಸ್‌ ಮುಂತಾದವರಿದ್ದರು.