ಅಕಾಲಿಕ ಮಳೆ ತಂದ ಸಂಕಷ್ಟ: ರಸ್ತೆಯೆಲ್ಲಾ ಕೆಸರುಮಯ, ಸಂಚಾರಕ್ಕೆ ತೊಂದರೆ

Team Udayavani, Jan 7, 2021, 9:54 AM IST

ಮಂಗಳೂರು: ಬಂಗಾಲಕೊಲ್ಲಿ, ಅರಬ್ಬಿ ಸಮುದ್ರದಲ್ಲಿ ಮೇಲ್ಮೈ ಸುಳಿಗಾಳಿ ಉಂಟಾಗಿರುವ ಕಾರಣ ಕರಾವಳಿ ಭಾಗದಲ್ಲಿ ಬುಧವಾರ ಸಂಜೆ ಮತ್ತು ರಾತ್ರಿ ಭಾರಿ ಮಳೆಯಾಗಿದೆ. ಆದರೆ ಅಕಾಲಿಕ ಮಳೆಯ ಕಾರಣ ಹಲವೆಡೆ ರಸ್ತೆಗಳಲ್ಲಿ ಕೆಸರು ತುಂಬಿದ್ದು, ಸಂಚಾರ ದುಸ್ತರವಾಗಿದೆ.

ಮಂಗಳೂರು ನಗರದ ಅಲ್ಲಲ್ಲಿ ಒಳಚರಂಡಿ ಕಾಮಗಾರಿ ನಡೆಯುತ್ತಿದ್ದು ಬುಧವಾರ ಸುರಿದ ಅಕಾಲಿಕ‌ ಮಳೆಗೆ ರಸ್ತೆ ಬದಿ ಕೆಸರು ತುಂಬಿ ಸುಗಮ ವಾಹನ ಸಂಚಾರಕ್ಕೆ ತೊಂದರೆ ಉಂಟಾಯಿತು. ಕೆಸರಿನಲ್ಲಿ ಬಸ್ ಚಕ್ರ ಹೂತುಹೋದ ಘಟನೆಯೂ ನಡೆಯಿತು.

ಕಟೀಲು- ಬಜ್ಪೆ ರಾಜ್ಯ ಹೆದ್ದಾರಿಯಲ್ಲಿ ಗುಡ್ಡದ ಮಣ್ಣು ರಸ್ತೆಗೆ ಕುಸಿದ ಕಾರಣ ಸಂಚಾರ ಅಸ್ತವ್ಯಸ್ತವಾಯಿತು. ರಸ್ತೆಯ ತುಂಬೆಲ್ಲಾ ಕೆಸರು ತುಂಬಿದ್ದು, ದ್ವಿಚಕ್ರ ವಾಹನ ಸವಾರರು ಜಾರಿ ಬಿದ್ದ ಘಟನೆಯೂ ನಡೆಯಿತು.

ಇದನ್ನೂ ಓದಿ:ಕಟಪಾಡಿ: ಕಾರು ಮತ್ತು ಟ್ಯಾಂಕರ್ ನಡುವೆ ಅಪಘಾತ

ಅಣೆಕಟ್ಟುಗಳು ಭರ್ತಿಯಾಗಿ ಹಲವೆಡೆ ನದಿ ನೀರು ಭತ್ತದ ಗದ್ದೆಗೆ ನುಗ್ಗಿದೆ. ಶಿಬರೂರಿನಲ್ಲಿ ಕಿಂಡಿ ಅಣೆಕಟ್ಟಿಗೆ ಹಲಗೆ ಹಾಕಿ ಮುಚ್ಚಿದ ಕಾರಣ ನದಿ ನೀರು ಸಮೀಪದ ಗದ್ದೆಗಳಿಗೆ ನುಗ್ಗಿದ್ದು, ಹಾನಿಯುಂಟಾಗಿದೆ.