Heavy rain ಹಿಂಗಾರು: ಕರಾವಳಿಯಲ್ಲಿ ಅತ್ಯಧಿಕ ಮಳೆ!

Team Udayavani, Dec 5, 2024, 6:34 AM IST

ಮಂಗಳೂರು: ಕೆಲವು ದಿನಗಳಿಂದ ಬಿರುಸಿನಿಂದ ಕೂಡಿದ ಹಿಂಗಾರು ಮಳೆಯಾಗುತ್ತಿದ್ದು, ಒಂದು ವಾರದಲ್ಲಿ ರಾಜ್ಯದಲ್ಲೇ ಅತ್ಯಧಿಕ ಮಳೆ ಕರಾವಳಿ ಭಾಗದಲ್ಲಿ ಸುರಿದಿದೆ.

ನ.28ರಿಂದ ಡಿ.4ರ ವರೆಗೆ ದಕ್ಷಿಣ ಕನ್ನಡ ಜಿಲ್ಲೆಯಲ್ಲಿ 4.8 ಮಿ.ಮೀ. ಮಳೆ ಸುರಿಯಬೇಕು. ಆದರೆ 82.4 ಮಿ.ಮೀ. ಮಳೆಯಾಗಿ ವಾಡಿಕೆಗಿಂತ ಶೇ.1617ರಷ್ಟು ಅಧಿಕ ಸುರಿದಿದೆ. ರಾಜ್ಯದಲ್ಲೇ ಇದು ಅತ್ಯಧಿಕ.

ಉಡುಪಿ ಜಿಲ್ಲೆಯಲ್ಲಿ 5.8 ಮಿ.ಮಿ. ವಾಡಿಕೆ ಗುರಿಯಲ್ಲಿ 63.7 ಮಿ.ಮೀ. ಮಳೆಯಾಗಿದೆ. ರಾಜ್ಯಕ್ಕೆ ಹೋಲಿಸಿದರೆ ದಕ್ಷಿಣ ಒಳನಾಡಿನಲ್ಲಿ ವಾಡಿಕೆಗಿಂತ ಶೇ.813 ಹೆಚ್ಚಳ, ಉತ್ತರ ಒಳನಾಡಿನಲ್ಲಿ ಶೇ.16 ಹೆಚ್ಚಳ, ಮಲೆನಾಡಿನಲ್ಲಿ ಶೇ.528 ಮತ್ತು ಕರಾವಳಿಯಲ್ಲಿ ಶೇ.962ರಷ್ಟು ಮಳೆ ಹೆಚ್ಚಳವಾಗಿದೆ.

ಒಂದು ವಾರದ ಅವಧಿಯಲ್ಲಿ ದಕ್ಷಿಣ ಕನ್ನಡ ಜಿಲ್ಲೆಯ ಬೆಳ್ತಂಗಡಿಯಲ್ಲಿ ಶೇ.966, ಬಂಟ್ವಾಳದಲ್ಲಿ ಶೇ.1615, ಮಂಗಳೂರಿನಲ್ಲಿ ಶೇ.3023, ಪುತ್ತೂರಿನಲ್ಲಿ ಶೇ.669, ಸುಳ್ಯದಲ್ಲಿ ಶೇ.2755, ಮೂಡುಬಿದಿರೆ ಶೇ.1281, ಕಡಬ ಶೇ.2067, ಮೂಲ್ಕಿ ಶೇ.4933, ಉಳ್ಳಾಲ ಶೇ.3456, ಉಡುಪಿ ಜಿಲ್ಲೆಯ ಕಾರ್ಕಳದಲ್ಲಿ ಶೇ.726, ಕುಂದಾಪುರ ಶೇ.209, ಉಡುಪಿ ಶೇ.2641, ಬೈಂದೂರು ಶೇ.31, ಬ್ರಹ್ಮಾವರ ಶೇ.16550, ಕಾಪು ಶೇ.4695, ಹೆಬ್ರಿ ಶೇ.504 ರಷ್ಟು ವಾಡಿಕೆಗಿಂತ ಅಧಿಕ ಮಳೆಯಾಗಿದೆ.

ಯಥೇತ್ಛ ಹಿಂಗಾರು
ಕರಾವಳಿ ಭಾಗದಲ್ಲಿ ಈ ಬಾರಿ ಉತ್ತಮ ಹಿಂಗಾರು ಮಳೆ ಸುರಿದಿದೆ. ಹಿಂಗಾರು ಅವಧಿ ಮುಗಿಯಲು ತಿಂಗಳು ಬಾಕಿ ಇರುವಾಗಲೇ ವಾಡಿಕೆ ಮಳೆಯ ಗುರಿ ದಾಟಿದೆ. ಹಿಂಗಾರು ಅವಧಿಯ ಅ. 1ರಿಂದ ಡಿ. 4ರ ವರೆಗೆ ಕರಾವಳಿ ಭಾಗದಲ್ಲಿ ಒಟ್ಟು 174.1 ಮಿ.ಮೀ. ಮಳೆಯಾಗಬೇಕು, ಆದರೆ ಸದ್ಯ 228.7 ಮಿ.ಮೀ. ಮಳೆಯಾಗಿ ವಾಡಿಕೆಗಿಂತ ಶೇ.31ರಷ್ಟು ಮಳೆ ಹೆಚ್ಚು ಸುರಿದಿದೆ.

ದಕ್ಷಿಣ ಕನ್ನಡ ಜಿಲ್ಲೆಯಲ್ಲಿ ಶೇ.34, ಉಡುಪಿ ಜಿಲ್ಲೆಯಲ್ಲಿ ಶೇ.53 ಮತ್ತು ಉತ್ತರ ಕನ್ನಡ ಜಿಲ್ಲೆಯಲ್ಲಿ ಶೇ.57ರಷ್ಟು ಮಳೆ ಪ್ರಮಾಣ ಏರಿಕೆ ಕಂಡಿದೆ.

ದ.ಕ. ಜಿಲ್ಲೆಯಲ್ಲಿ ಸಾಧಾರಣ ಮಳೆ
ಮಂಗಳೂರು: ಎರಡು ದಿನಗಳಿಂದ ಬಿರುಸು ಪಡೆದಿದ್ದ ಮಳೆ ಬುಧವಾರ ತುಸು ಕ್ಷೀಣಿಸಿದೆ.

ಬೆಳಗ್ಗೆ ಮೋಡ ಮತ್ತು ಕೆಲವು ಕಡೆ ಸಾಧಾರಣ ಮಳೆಯಾಗಿದೆ. ಮಧ್ಯಾಹ್ನದ ಬಳಿಕ ಬಿಸಿಲಿನಿಂದ ಕೂಡಿದ ವಾತಾವರಣ ಇತ್ತು. ಭಾರತೀಯ ಹವಾಮಾನ ಇಲಾಖೆ ಮುನ್ಸೂಚನೆ ಪ್ರಕಾರ ಯಾವುದೇ ಅಲರ್ಟ್‌ ಘೋಷಣೆ ಮಾಡಲಾಗಿಲ್ಲ. ಆದರೆ ಜಿಲ್ಲೆಯ ಕೆಲವು ಕಡೆಗಳಲ್ಲಿ ಸಾಧಾರಣ ಮಳೆ ಸುರಿಯುವ ನಿರೀಕ್ಷೆ ಇದೆ.

ಮಂಗಳೂರಿನಲ್ಲಿ ತಾಪಮಾನದಲ್ಲಿ ಕಂಡಿದ್ದು, 29.2 ಡಿ.ಸೆ. ಗರಿಷ್ಠ ಉಷ್ಣಾಂಶ ದಾಖಲಾಗಿ ವಾಡಿಕೆಗಿಂತ 4.1 ಡಿ.ಸೆ. ಕಡಿಮೆ ಮತ್ತು 24.3 ಡಿ.ಸೆ. ಕನಿಷ್ಠ ತಾಪಮಾನ ದಾಖಲಾಗಿ ವಾಡಿಕೆಗಿಂತ 2.1 ಡಿ.ಸೆ.ಉಷ್ಣಾಂಶ ಅಧಿಕ ಇತ್ತು.