ಸಮಾಜದ ಹಿತಚಿಂತನೆಯಿಂದ ದೇವರ ಅನುಗ್ರಹ: ಪರ್ತಗಾಳಿ ಶ್ರೀ

Team Udayavani, Mar 8, 2017, 11:17 AM IST

ಮಂಗಳೂರು: ನಮ್ಮ ಎಲ್ಲ ನಡೆ ನುಡಿಗಳು ಸಮಾಜದ ಹಿತಚಿಂತನೆಯಿಂದ ಕೂಡಿರಬೇಕು. ಆಗ ದೇವರ ಅನುಗ್ರಹ ಪ್ರಾಪ್ತವಾಗು
ತ್ತವೆ ಎಂದು ಶ್ರೀ ಸಂಸ್ಥಾನ ಗೋಕರ್ಣ ಪರ್ತಗಾಳಿ ಜೀವೋತ್ತಮ ಮಠಾಧೀಶ ಶ್ರೀ ವಿದ್ಯಾಧಿರಾಜತೀರ್ಥ ಶ್ರೀಪಾದ ವಡೇರ ಸ್ವಾಮೀಜಿ ಹೇಳಿದರು.

ಅವರು ಶ್ರೀ ವೀರ ವಿಟಲ ದೇವರ 357ನೇ ವರ್ಧಂತಿ ಉತ್ಸವ ಮತ್ತು ಪೂರ್ಣಪ್ರಜ್ಞ ವಸತಿ ನಿಲಯದ 5ನೇ ವಾರ್ಷಿಕೋತ್ಸವದ ಅಂಗವಾಗಿ ಮಂಗಳವಾರ ಶ್ರೀ ಮಠದ ಮಂಗಳೂರು ಮಠದಲ್ಲಿ ಜರಗಿದ ಧಾರ್ಮಿಕ ಸಭೆಯಲ್ಲಿ ಆಶೀರ್ವಚನ ನೀಡಿದರು.
ಉತ್ತಮ ಆಚಾರ, ವಿಚಾರ ಧಾರ್ಮಿಕತೆಯಿಂದ ಕೂಡಿದ ಸಂಸ್ಕಾರಯುತ ಬದುಕಿನಿಂದಾಗಿ ಜೀವನದಲ್ಲಿ ಧನ್ಯತೆ ಪ್ರಾಪ್ತವಾಗುತ್ತದೆ. ಗೌಡ ಸಾರಸ್ವತ ಸಮಾಜ ಉನ್ನತ ಸಂಸ್ಕೃತಿ, ಉತ್ಕೃಷ್ಟ ಚಿಂತನೆಯಿಂದ ಸಂಪನ್ನವಾದ ಸಂಸ್ಕಾರ ಭರಿತವಾದ ಸಮಾಜ ಎಂದು ಹೇಳಿದರು. ಸ್ವಾಮೀಜಿಯವರ ಶಿಷ್ಯ ಶ್ರೀ ವಿದ್ಯಾಧೀಶತೀರ್ಥ ಶ್ರೀಪಾದ ವಡೇರ ಸ್ವಾಮೀಜಿ ಉಪಸ್ಥಿತರಿದ್ದರು.

ಶ್ರೀ ಕೃಷ್ಣ ಮಿಲ್ಕ್ ಪ್ರೈ.ಲಿ.ನ ವ್ಯವಸ್ಥಾಪಕ ನಿರ್ದೇಶಕ ಹನುಮಂತ ಎಂ.ಪೈ ಮಾತನಾಡಿ, ಶ್ರೀ ವಿದ್ಯಾಧಿರಾಜತೀರ್ಥ ಶ್ರೀಪಾದ ವಡೇರ ಸ್ವಾಮೀಜಿ ಅವರ ನೇತೃತ್ವದಲ್ಲಿ ಸಮಾಜದಲ್ಲಿ ಹತ್ತಾರು ಸಾಮಾಜಿಕ ಬದಲಾವಣೆಯ ಕಾರ್ಯಗಳು ನಡೆದಿವೆ. ಸಮಾಜದ ಶಿಷ್ಯವೃಂದದ ಮೇಲೆ ಸ್ವಾಮೀಜಿಯರ ಪ್ರೀತಿಭರಿತ ಆಶೀರ್ವಾದ ನಮ್ಮೆಲ್ಲರನ್ನು ಪೋಷಿಸುತ್ತಿದೆ ಎಂದರು.

ಐಡಿಯಲ್‌ ಪ್ರಭಾಕರ ಕಾಮತ್‌, ಆರ್‌.ಆರ್‌. ಕಾಮತ್‌, ಬಸ್ತಿ ಶ್ರೀಪಾದ ಶೆಣೈ ಮುಂತಾದವರು ಉಪಸ್ಥಿತರಿದ್ದರು. ಎಸ್‌.ಪಿ. ಆಚಾರ್ಯ ಕಾರ್ಯಕ್ರಮ ನಿರೂ ಪಿಸಿದರು.