RCB ತಂಡಕ್ಕೆ ಹಾಂಗ್ಯೋ ಐಸ್‌ಕ್ರೀಮ್‌ ಪಾಲುದಾರ

Team Udayavani, Jan 27, 2024, 12:19 AM IST

ಮಂಗಳೂರು: ಬೆಂಗಳೂರು ರಾಯಲ್‌ ಚಾಲೆಂಜರ್ಸ್‌ನ ಅಧಿಕೃತ ಐಸ್‌ಕ್ರೀಮ್‌ ಪಾಲುದಾರನಾಗಿ ಕರಾವಳಿಯ ಹಾಂಗ್ಯೊ ಐಸ್‌ಕ್ರೀಂ ಸೇರ್ಪಡೆಯಾಗಿದೆ.

ಐಪಿಎಲ್‌ ಸೀಸನ್‌ 2024ಕ್ಕೆ ರಾಯಲ್‌ ಚಾಲೆಂಜರ್ಸ್‌ ಜತೆಯಲ್ಲಿ ಹಾಂಗ್ಯೋ ಐಸ್‌ಕ್ರೀಮ್‌ ಹೊಸ ಹೆಜ್ಜೆಯನ್ನಿಡಲಿದೆ. ಬೆಂಗಳೂರಿನಲ್ಲಿ ಈ ಕುರಿತ ಒಡಂಬಡಿಕೆಯೊಂದಕ್ಕೆ ಎರಡೂ ಸಂಸ್ಥೆಗಳ ಮುಖ್ಯಸ್ಥರು ಸಹಿ ಹಾಕಿದ್ದಾರೆ.

ಕರ್ನಾಟಕ ಕರಾವಳಿಯ ಐಸ್‌ಕ್ರೀಮ್‌ ಅದ್ಭುತವು ಕ್ರಿಕೆಟ್‌ ಮ್ಯಾಜಿಕ್‌ ತಂಡದೊಂದಿಗೆ ಸೇರಿಕೊಂಡಿದ್ದು, ಇದು ಮೈದಾನದ ಒಳ-ಹೊರಗೆ ಹೊಸ ಉತ್ಸಾಹ, ಸಂತಸವನ್ನು ಪಸರಿಸಲಿದೆ ಎಂದು ಸಂಸ್ಥೆಯ ಮುಖ್ಯಸ್ಥರು ಅಭಿಪ್ರಾಯಪಟ್ಟಿದ್ದಾರೆ.

ಆರ್‌ಸಿಬಿ ಜತೆ ರೋಮಾಂಚಕ ಪಯಣ ಆರಂಭಿಸುತ್ತಿದ್ದು, ಇದು ಉದ್ಯಮದಲ್ಲಿ ಹೊಸ ಭಾಷ್ಯ ಬರೆಯಲಿದೆ. ಕ್ರಿಕೆಟ್‌ ಸ್ಫೋಟಕ ಆಟದೊಂದಿಗೆ ಹಾಂಗ್ಯೋ ಐಸ್‌ ಕ್ರೀಮ್‌ನ ಆಹ್ಲಾದಕರ ಐಸ್‌ಕ್ರೀಂಗಳು ಸಂಭ್ರಮದ ವಾತಾವರಣಕ್ಕೆ ಕಾರಣವಾಗಲಿದೆ ಎಂದು ಹಾಂಗ್ಯೋ ಐಸ್‌ಕ್ರೀಮ್ಸ್‌ ಕಂಪೆನಿ ಪ್ರಕಟನೆ ತಿಳಿಸಿದೆ.

ಈ ಒಡಂಬಡಿಕೆ ವೇಳೆ ಹಾಂಗ್ಯೊ ಬಿಸಿನೆಸ್‌ ಡೆವಲಪ್‌ಮೆಂಟ್‌ ಮುಖ್ಯಸ್ಥ ಸಂಕೀರ್ಣ ಪ್ರದೀಪ್‌ ಪೈ, ನೀಮಾ ಪೈ, ಶ್ರೀನಿವಾಸ್‌ ಜೆ. ಪೈ ಹಾಗೂ ಶ್ರೀಕೃಷ್ಣ ಜೆ. ಪೈ ಉಪಸ್ಥಿತರಿದ್ದರು.

ಟಾಪ್‌ ಬ್ರ್ಯಾಂಡ್ ಗಳಲ್ಲಿ ಹಾಂಗ್ಯೋ
ಹಾಂಗ್ಯೋ ಐಸ್‌ಕ್ರೀಮ್‌ ಪ್ರಸ್ತುತ ಐಸ್‌ಕ್ರೀಮ್‌ನ ಅಗ್ರ ಬ್ರ್ಯಾಂಡ್ ಗಳಲ್ಲಿ ಒಂದಾಗಿದೆ. ಅದು 3 ದಶಲಕ್ಷ ಗ್ರಾಹಕರನ್ನು ಸಂತೃಪ್ತಗೊಳಿಸಿದೆ. ದಿನಕ್ಕೆ 1.2 ಲಕ್ಷ ಲೀ.ಗಳಷ್ಟು ಉತ್ಪಾದನ ಸಾಮರ್ಥ್ಯವನ್ನು ಹೊಂದಿದೆ. 30 ಸಾವಿರ ರಿಟೇಲ್‌ ಶಾಪ್‌ಗ್ಳು, 330 ಚಾನೆಲ್‌ ಪಾಲುದಾರರು ಮತ್ತು ಸಾವಿರಕ್ಕೂ ಹೆಚ್ಚು ಜನರಿಗೆ ಉದ್ಯೋಗದಾತನಾಗಿ ಯಶಸ್ಸು ಕಂಡಿದೆ.

ಸಣ್ಣ ಪಟ್ಟಣವೊಂದರಲ್ಲಿ ನೆಚ್ಚಿನ ಐಸ್‌ಕ್ರೀಮ್‌ ತಾಣವಾಗಿ ಹುಟ್ಟಿಕೊಂಡು, ಕಠಿನ ಪರಿಶ್ರಮದಿಂದ ಉದ್ಯಮ ದೈತ್ಯನಾಗಿ ವಿಕಸನಗೊಳ್ಳುವವರೆಗಿನ ಹಾಂಗ್ಯೋ ಐಸ್‌ ಕ್ರೀಮ್‌ ಪಯಣ, ಕ್ರಿಕೆಟ್‌ ಬಾಂಧವ್ಯದೊಂದಿಗೆ ಹೊಸ ದಾರಿಗೆ ಹೊರಳಲಿದೆ.