ನದಿ-ಕೊಳವೆಬಾವಿ ಬತ್ತಿದರೆ ಜಲಕ್ಷಾಮ!

Team Udayavani, Dec 22, 2017, 3:12 PM IST

ಪುತ್ತೂರು : ಕುಮಾರಧಾರಾ ನದಿ ಬತ್ತಿದರೆ 60 ಲಕ್ಷ ಲೀಟರ್‌ ನೀರಿಗೇನು ವ್ಯವಸ್ಥೆ ಅಂದರೆ, ನಗರಸಭೆ ಕೊಳವೆಬಾವಿ ಕಡೆ ಕೈ ತೋರಿಸುತ್ತಿದೆ. ಕೊಳವೆಬಾವಿಯೂ ಕೈ ಕೊಟ್ಟರೇನು ದಾರಿ ಅಂದರೆ, ನಗರ ಸಭೆಯ ಬಳಿ ಉತ್ತರವಿಲ್ಲ ! ದಿನವೊಂದಕ್ಕೆ 75 ಲಕ್ಷ ಲೀಟರ್‌ ನೀರು ಅಗತ್ಯವಿರುವ ನಗರಕ್ಕೆ ನೆಕ್ಕಿಲಾಡಿಯ ಕುಮಾರಧಾರಾ ಡ್ಯಾಂ ಪ್ರಮುಖ ಆಧಾರ. 60 ಲಕ್ಷ ಲೀಟರ್‌ ಡ್ಯಾಂನಿಂದ ಬಂದರೆ ಇನ್ನುಳಿದ 15 ಲಕ್ಷ ಲೀಟರ್‌ ನೀರನ್ನು 144 ಕೊಳವೆಬಾವಿಗಳು ಪೂರೈಸುತ್ತವೆ.

ನದಿಯ ಮಟ್ಟ ಹಾಗೂ ನೀರು ಹರಿವಿನ ಪ್ರಮಾಣ ಕುಸಿಯುತ್ತ ಸಾಗಿದ್ದು, ಡ್ಯಾಂ ನೀರನ್ನೇ ನಂಬಿ ಕೂರುವಂತಿಲ್ಲ. ವರ್ಷದಿಂದ ವರ್ಷಕ್ಕೆ ಅಂತರ್ಜಲ ಮಟ್ಟ ಕುಸಿಯುತ್ತಿರುವುದರಿಂದ ಕೊಳವೆಬಾವಿಗಳ ಮೇಲೂ ನಂಬಿಕೆ ಇಡುವಂತಿಲ್ಲ. ಹಾಗಾಗಿ ಬೇಸಗೆಯಲ್ಲಿ ನೀರಿನ ಬವಣೆಯ ಅಪಾಯ ಇದ್ದೇ ಇದೆ.

ನಗರಸಭೆಯ ನೀರು ಪೂರೈಕೆ
ನಗರದಲ್ಲಿ 53,061 ಜನಸಂಖ್ಯೆ ಇದೆ. 14,948 ಮನೆಗಳಿವೆ. ಮನೆ, ಗೃಹೇತರ, ವಾಣಿಜ್ಯ ಆಧಾರಿತ ಸೇರಿ 12,943 ನಳ್ಳಿ ಸಂಪರ್ಕ ಇವೆ. ಪ್ರಸ್ತುತ ಹೊಸ ನಳ್ಳಿ ಸಂಪರ್ಕಕ್ಕಾಗಿ 2 ಸಾವಿರ ಅರ್ಜಿಗಳು ಬಂದಿವೆ. ನೀರು ಪೂರೈಕೆಗೆ ಸಂಬಂಧಿಸಿ ನಗರವನ್ನು 8 ವಲಯವನ್ನಾಗಿ ವಿಭಜಿಸಲಾಗಿದೆ.  ಕ್ಕಮುಟ್ನೂರು, ಪಟ್ನೂರು, ಕರ್ಮಲ, ಸೀಟಿಗುಡ್ಡೆ, ಕಬಕ ಲಿಂಗದಗುಡ್ಡೆ, ಬಲಾ°ಡು, ಬೀರಮಲೆ ಭಾಗದಲ್ಲಿ 50 ಸಾವಿರ, 1 ಲಕ್ಷ, 2, 6, 9, 15 ಲಕ್ಷ ಲೀಟರ್‌ ನೀರು ಸಂಗ್ರಹವಾಗುವ ಟ್ಯಾಂಕ್‌ಗಳಿವೆ.

ಒಬ್ಬನಿಗೆ 15 ಲೀ. ಕೊರತೆ
ನಗರಕ್ಕೆ ಪ್ರತಿದಿನ ಬೇಕಾಗುವ ನೀರಿನ ಪ್ರಮಾಣ 7.5 ಎಂಎಲ್‌ಡಿ. 6.5 ಎಂಎಲ್‌ಡಿ ನೆಕ್ಕಿಲಾಡಿ ಡ್ಯಾಂನಿಂದ, 1.5 ಎಂಎಲ್‌ಡಿ ಕೊಳವೆಬಾವಿಯಿಂದ ಬಳಸಲಾಗುತ್ತಿದೆ. ನಿಯಮದ ಪ್ರಕಾರ ಪ್ರತಿ ವ್ಯಕ್ತಿಗೆ ದಿನವೊಂದಕ್ಕೆ 135 ಲೀಟರ್‌ ನೀರು ನೀಡಬೇಕು. ನಗರಸಭೆ ಈಗ ನೀಡುತ್ತಿರುವ ನೀರಿನ ಪ್ರಮಾಣ 120 ಲೀಟರ್‌ ಮಾತ್ರ. ಇಲ್ಲಿ ವ್ಯಕ್ತಿಯೊಬ್ಬನಿಗೆ 15 ಲೀಟರ್‌ ಕೊರತೆ ಇದೆ. ನಗರದ ಒಟ್ಟು ಜನಸಂಖ್ಯೆಯನ್ನು ಪರಿಗಣಿಸಿದರೆ ದಿನವೊಂದಕ್ಕೆ 7,95,915 ಲಕ್ಷ ಲೀಟರ್‌ ನೀರಿನ ಕೊರತೆಯಿದೆ. ನೀರಿನ ಅಭಾವ ತಪ್ಪಿಸಲು ಕುಡ್ಸೆಂಪ್‌ ಯೋಜನೆಯಡಿ 15 ಕೋಟಿ ರೂ. ವ್ಯಯಿಸಲು ಪ್ರಾಥಮಿಕ
ಸರ್ವೆ ಕಾರ್ಯ ನಡೆದಿದೆ. ವಿಪರ್ಯಾಸ ಅಂದರೆ ನೀರು ತರಲು ಉದ್ದೇಶಿಸಿರುವ ಕುಮಾರಧಾರಾ ನದಿಯ ನೆಕ್ಕಿಲಾಡಿ ಬಳಿ ಈ ಬೇಸಗೆ ಕಾಲದಲ್ಲಿ ನೀರಿದೆಯೋ ಎಂಬ ಚಿಂತನೆ ಮಾಡಿಲ್ಲ.

ಟ್ಯಾಂಕರ್‌ ಬಳಕೆ
ಅಭಾವವಿರುವ ಕೆಲವು ಪ್ರದೇಶಗಳಲ್ಲಿ ಎರಡು – ಮೂರು ದಿನಗಳಿಗೊಮ್ಮೆ ನಗರಸಭೆಯಿಂದ ನೀರು ಸರಬರಾಜು ಮಾಡಲಾಗಿತ್ತು. ನಗರದ ಸಾಮೆತ್ತಡ್ಕ, ಬನ್ನೂರಿನ ಆಶ್ರಯ ಕಾಲನಿ, ಮಚ್ಚಿಮಲೆ ಭಾಗಗಳಿಗೆ ನೀರಿನ ಹರಿವು ಸರಾಗವಿಲ್ಲದೆ ಈ ಕಡೆಗಳಿಗೆ ಟ್ಯಾಂಕರ್‌ಗಳಲ್ಲಿ ನೀರನ್ನು ಸರಬರಾಜು ಮಾಡಲಾಗಿತ್ತು.

ಮಳೆಯ ಸಂರಕಣೆಯಿಲ್ಲ
ಹೊಸ ಕಟ್ಟಡ ರಚನೆಯ ಸಂದರ್ಭದಲ್ಲಿ ಮಳೆ ಕೊಯ್ಲ ಪದ್ಧತಿ ಪಾಲಿಸಬೇಕು ಎಂಬುವುದು ಸರಕಾರದ ಕಡ್ಡಾಯ ಆದೇಶ. ವರ್ಷಕ್ಕೆ ನೂರಾರು ಹೊಸ ಕಟ್ಟಡ ನಿರ್ಮಾಣ ವಾಗುತ್ತಿದ್ದರೂ, ಮಳೆ ಕೊಯ್ಲು ಅಳವಡಿಸಿರುವುದು ಒಂದೆರಡು ಕಟ್ಟಡಗಳಲ್ಲಿ ಮಾತ್ರ. 144 ಕೊಳವೆಬಾವಿ ಇದ್ದರೂ, ಜಲ ಮರುಪೂರಣ ಘಟಕವೇ ಇಲ್ಲ. ಹಾಗಾಗಿ ಇಲ್ಲಿ ನೀರಿನ ಸಂರಕ್ಷಣೆಗೆ ಆದ್ಯತೆಯೇ ನೀಡಿಲ್ಲ.

ಕೊಳವೆಬಾವಿ ಇದೆ
ನಗರದಲ್ಲಿ 144 ಕೊಳವೆ ಬಾವಿ ಇದ್ದು, ನೀರಿನ ಪೂರೈಕೆಗೆ ಬಳಸಲು ಸಿದ್ಧವಾಗಿದೆ. ಹೊಸ ನಳ್ಳಿ ಸಂಪರ್ಕಕ್ಕಾಗಿ 2 ಸಾವಿರಕ್ಕೂ ಮಿಕ್ಕಿ ಅರ್ಜಿ ಬಂದಿದ್ದು, ಕನೆಕ್ಷನ್‌ಗೆ ಕ್ರಮ ಕೈಗೊಳ್ಳಲಾಗುವುದು. ಡ್ಯಾಂನಲ್ಲಿ ನೀರು ಕಡಿಮೆ ಆದರೂ, ನಗರಕ್ಕೆ ನೀರಿನ ಸಮಸ್ಯೆ ಬಾರದಂತೆ ನಗರಸಭೆ ಕೊಳವೆಬಾವಿ ವ್ಯವಸ್ಥೆಯನ್ನು ಹೊಂದಿದೆ.
– ರೂಪಾ ಶೆಟ್ಟಿ
ಪೌರಾಯುಕ್ತೆ, ನಗರಭೆ

ಕಿರಣ್‌ ಪ್ರಸಾದ್‌ ಕುಂಡಡ್ಕ