ಅಕ್ರಮ ಮರಳು ಸಂಗ್ರಹ, ಸಾಗಾಟ 

Team Udayavani, Feb 3, 2019, 1:00 AM IST

ಮಂಗಳೂರು: ಅಕ್ರಮವಾಗಿ ಮರಳುಗಾರಿಕೆ ನಡೆಸುತ್ತಿದ್ದ ಮತ್ತು ಕೇರಳ ರಾಜ್ಯಕ್ಕೆ ಸಾಗಿಸುತ್ತಿದ್ದ  ಮೂರು ಪ್ರತ್ಯೇಕ ಪ್ರಕರಣಗಳನ್ನು ಮಂಗಳೂರು ದಕ್ಷಿಣ ಉಪವಿಭಾಗದ ಸಹಾಯಕ ಪೊಲೀಸ್‌ ಆಯುಕ್ತರ ನೇತೃತ್ವದ ರೌಡಿ ನಿಗ್ರಹದಳ ಹಾಗೂ ಗ್ರಾಮಾಂತರ ಪೊಲೀಸರ ತಂಡ ಪತ್ತೆ ಹಚ್ಚಿದೆ.
 
ಮಂಗಳೂರು ತಾಲೂಕು ಉಳಾಯಿಬೆಟ್ಟು ಗ್ರಾಮದ ಖಾಸಗಿ ವ್ಯಕ್ತಿಯ ಜಾಗದಲ್ಲಿ,  ಫ‌ಲ್ಗುಣಿ ನದಿ ಮತ್ತು ನದಿಯ ತೀರದಲ್ಲಿ ಅಕ್ರಮವಾಗಿ ಮರಳು ದಂಧೆ ನಡೆಸುತ್ತಿರುವ ಬಗ್ಗೆ  ಖಚಿತ ಮಾಹಿತಿ ಪಡೆದ  ಮಂಗಳೂರು ದಕ್ಷಿಣ ಉಪವಿಭಾಗದ ಎಸಿಪಿ ರಾಮರಾವ್‌, ರೌಡಿ ನಿಗ್ರಹ ದಳದ ಸಿಬಂದಿ ಮತ್ತು  ಮಂಗಳೂರು ಗ್ರಾಮಾಂತರ ಠಾಣೆಯ ಇನ್ಸ್‌ಪೆಕ್ಟರ್‌ ಸಿದ್ದ ಗೌಡ ಎಚ್‌. ಭಜಂತ್ರಿ, ಪಿಎಸ್‌ಐ ವೆಂಕಟೇಶ ಐ., ಎಎಸ ಐ ಹರೀಶ್‌ ಮತ್ತು ಸಿಬಂದಿ ಹಾಗೂ  ಗಣಿ ಮತ್ತು ಭೂವಿಜ್ಞಾನ ಇಲಾಖೆಯ ಉಪ ನಿರ್ದೇಶಕರಾದ ಪದ್ಮಶ್ರೀ ಹಾಗೂ ಅಧಿಕಾರಿ ಮೂರ್ತಿ ಮತ್ತು ಸಿಬಂದಿ ಸಂಯುಕ್ತವಾಗಿ ದಾಳಿ ನಡೆಸಿದರು. ಸ್ಥಳ ದಿಂದ 42  ದೋಣಿಗಳು,5 ಟಿಪ್ಪರ್‌ ಲಾರಿಗಳು, 3 ಡೋಜರ್‌ ಮತ್ತು ದಕ್ಕೆಯಲ್ಲಿ  ಸಂಗ್ರಹಿಸಿಟ್ಟಿದ್ದ  ಮರಳನ್ನು ವಶಪಡಿಸಿಕೊಂಡಿದ್ದಾರೆ.ಇವುಗಳ  ಮೌಲ್ಯ ಸುಮಾರು 1 ಕೋಟಿ 20 ಲಕ್ಷ ರೂ. ಎಂದು ಅಂದಾಜಿಸಲಾಗಿದೆ .ತುಂಬೆಯಲ್ಲಿ ಮರಳು ತುಂಬಿಸಿದ ಒಂದು ಟಿಪ್ಪರ್‌ ಲಾರಿ ಪರವಾನಿಗೆ ಉಲ್ಲಂಘಿಸಿ ಅರ್ಕುಳದ ಕಡೆ ಬಂದ ಹಿನ್ನೆಲೆಯಲ್ಲಿ ಅದನ್ನು ವಶಪಡಿಸಿಕೊಂಡಿದ್ದಾರೆ. ಇದರ ಮೌಲ್ಯ 10,20,000 ರೂ. ಆಗಿರುತ್ತದೆ. 

ಮತ್ತೂಂದು  ಪ್ರಕರಣದಲ್ಲಿ ಅಕ್ರಮವಾಗಿ ಮರಳನ್ನು ಕೇರಳ ರಾಜ್ಯ ಕಡೆಗೆ ಸಾಗಿಸುತ್ತಿದ್ದ 5 ಟಿಪ್ಪರ್‌ಗಳನ್ನು ಮಂಗಳೂರು ದಕ್ಷಿಣ ಉಪವಿಭಾಗದ ಸಹಾಯಕ ಪೊಲೀಸ್‌ ಆಯುಕ್ತರು ರೌಡಿ ನಿಗ್ರಹದಳ ಸಿಬಂದಿ ವಶಪಡಿಸಿಕೊಂಡಿದ್ದಾರೆ.

ನಾಟೆಕಲ್‌ ಬಳಿ ಟಿಪ್ಪರ್‌ ಲಾರಿಯಲ್ಲಿ ಒಂದೇ ಪರವಾನಗಿ ಬಳಸಿ ಮರಳು ಸಾಗಾಟಕ್ಕೆ ಯತ್ನಿಸಲಾಗುತ್ತಿತ್ತು. ಅನಂತರ ಕಲ್ಕಟ್ಟ ಬಳಿ ಪರವಾನಗಿಯಿಲ್ಲದೆ ಮರಳು ಸಾಗಿಸುತ್ತಿದ್ದ ಟಿಪ್ಪರ್‌ ಲಾರಿ ಹಾಗೂ ಉಳ್ಳಾಲ ಠಾಣಾ ವ್ಯಾಪ್ತಿಯ ತಲಪಾಡಿ ದೇವಿಪುರದಲ್ಲಿ ನಿಗದಿತ ಪರವಾನಗಿಯಿಲ್ಲದೆ ಮರಳು ಸಾಗಾಟ ನಡೆಸುತ್ತಿದ್ದ ಟಿಪ್ಪರ್‌ ಲಾರಿಗಳನ್ನು ವಶಪಡಿಸಿಕೊಳ್ಳಲಾಗಿದೆ. ವಶಪಡಿಸಿದ ಸೊತ್ತುಗಳ ಒಟ್ಟು ಮೌಲ್ಯ 70 ಲ.ರೂ. ಎಂದು ಅಂದಾಜಿಸಲಾಗಿದೆ.ವಶಪಡಿಸಿಕೊಂಡ ಮರಳನ್ನು ಗಣಿ ಮತ್ತು ಭೂವಿಜ್ಞಾನ ಇಲಾಖೆ ಅಧಿಕಾರಿಗಳಿಗೆ ಹಸ್ತಾಂತರಿಸಲಾಗಿದೆ.