Mangaluru: ಅಗಾಧ ಸಂಗೀತ ಜ್ಞಾನಿ ಕದ್ರಿ ಗೋಪಾಲನಾಥ್‌

Team Udayavani, Dec 9, 2024, 12:31 AM IST

ಮಂಗಳೂರು: ಡಾ| ಕದ್ರಿ ಗೋಪಾಲನಾಥ್‌ ಅಕಾಡೆಮಿ ಫಾರ್‌ ಆರ್ಟ್ಸ್ ಸಂಸ್ಥೆ ವತಿಯಿಂದ ಡಾ| ಕದ್ರಿ ಗೋಪಾಲನಾಥ್‌ ಜೀವಮಾನ ಸಾಧನೆ ಶ್ರೇಷ್ಠ ಪ್ರಶಸ್ತಿಯನ್ನು ಮೋಹನ ವೀಣಾ ಸೃಷ್ಟಿಕರ್ತ ಹಾಗೂ ವಾದಕ, ಪದ್ಮಭೂಷಣ ಪುರಸ್ಕೃತ ಪಂಡಿತ್‌ ವಿಶ್ವ ಮೋಹನ್‌ ಭಟ್‌ ಅವರಿಗೆ ಉರ್ವಸ್ಟೋರ್‌ನ ಡಾ| ಬಿ.ಆರ್‌. ಅಂಬೇಡ್ಕರ್‌ ಭವನದಲ್ಲಿ ಶನಿವಾರ ಜರಗಿದ ಕಾರ್ಯಕ್ರಮದಲ್ಲಿ ಪ್ರದಾನಿಸಲಾಯಿತು.

ಪ್ರಶಸ್ತಿ ಸ್ವೀಕರಿಸಿ ಮಾತನಾಡಿದ ಅವರು, ಕದ್ರಿ ಗೋಪಾಲನಾಥರು ನಮ್ಮೆಲ್ಲರ ಹೃದಯದಲ್ಲಿ ಚಿರಸ್ಥಾಯಿಯಾಗಿದ್ದಾರೆ. ಸಂಗೀತ ಕ್ಷೇತ್ರದ ಅವರ ಸಾಧನೆಗೆ ಇಡೀ ಜಗತ್ತೇ ಶಿರ ಬಾಗುತ್ತದೆ. ಅಸಾಧಾರಣ ಸಂಗೀತ ಜ್ಞಾನ ಹೊಂದಿದ್ದ ಅವರು ಕಠಿನ ಎಂದು ಪರಿಗಣಿಸಲಾದ ಕರ್ನಾಟಕ ಸಂಗೀತವನ್ನು ಸ್ಯಾಕ್ಸೋಫೋನ್ ಮೂಲಕ ಸುಲಲಿತಗೊಳಿಸಿದವರು.

ಲಂಡನ್‌ನಲ್ಲಿ ಅವರ ಜತೆ ಜುಗಲ್‌ಬಂದಿ ನಡೆಸಿರುವುದು ನನಗೆ ಸಿಕ್ಕ ಸೌಭಾಗ್ಯ. ಕದ್ರಿ ಎಂಬ ಹೆಸರನ್ನು ಅವರು ಇಂದು ಜಗತ್ತಿಗೆ ಪರಿಚಯಿಸಿದ್ದಾರೆ ಎಂದರು.

ಕಟೀಲು ದೇಗುಲದ ಪ್ರಧಾನ ಅರ್ಚಕ ವೇ| ಶ್ರೀ ಹರಿನಾರಾಯಣ ಆಸ್ರಣ್ಣ ಮಾತನಾಡಿ, ಸಂಗೀತದಲ್ಲಿ ಅತ್ಯಂತ ಸಾಧನೆಯ ಜತೆಗೆ ವಿಶೇಷ ಚಮತ್ಕಾರ ಮಾಡಿದ ಮಹಾನ್‌ ವ್ಯಕ್ತಿ ಕದ್ರಿ ಗೋಪಾಲನಾಥರು. ನೋವು ನುಂಗಿ ಖುಷಿ ಹಂಚುವುದು ಅವರ ಶ್ರೇಷ್ಠತನವಾಗಿತ್ತು ಎಂದರು.

ಶಾಸಕ ವೇದವ್ಯಾಸ್‌ ಕಾಮತ್‌ ಮಾತನಾಡಿ, ದೇವಸ್ಥಾನ ಹಾಗೂ ಕದ್ರಿ ಗೋಪಾಲನಾಥರ ಸಾಧನೆಯಿಂದ ಕದ್ರಿ ಹೆಸರು ದೇಶ ವಿದೇಶಗಳಲ್ಲಿ ಹೆಸರುವಾಸಿಯಾಗಿದೆ ಎಂದರು.

ತಂತ್ರಿ ಸಾಮ್ರಾಟ್‌ ಸಲೀಲ್‌ ಭಟ್‌, ಕಲ್ಕೂರ ಪ್ರತಿಷ್ಠಾನದ ಅಧ್ಯಕ್ಷ ಪ್ರದೀಪ್‌ ಕುಮಾರ್‌ ಕಲ್ಕೂರ, ಮಣಿ ಕೃಷ್ಣಸ್ವಾಮಿ ಅಕಾಡೆಮಿ ಕಾರ್ಯದರ್ಶಿ ಪಿ. ನಿತ್ಯಾನಂದ ರಾವ್‌, ಗೋಮತಿದಾಸ್‌, ಡಾ| ಕದ್ರಿ ಗೋಪಾಲನಾಥ್‌ ಅವರ ಪತ್ನಿ ಸರೋಜಿನಿ ಉಪಸ್ಥಿತರಿದ್ದರು. ಗೋಪಾಲನಾಥ್‌ ಅವರ ಪುತ್ರ, ಟ್ರಸ್ಟ್‌ನ ಕಾರ್ಯದರ್ಶಿ ಮಣಿಕಾಂತ್‌ ಕದ್ರಿ ಸ್ವಾಗತಿಸಿದರು. ಭವಾನಿ ಲೋಕೇಶ್‌ ನಿರೂಪಿಸಿದರು.

ಬಳಿಕ ಪಂಡಿತ್‌ ವಿಶ್ವಮೋಹನ್‌ ಭಟ್‌ ಹಾಗೂ ಸಲೀಲ್ ಭಟ್‌ ಅವರಿಂದ ಮೋಹನ ವೀಣಾ ಮತ್ತು ಸಾತ್ವಿಕ ವೀಣಾ ಜುಗಲ್ ಬಂದಿ ಜರಗಿತು. ಪಂಡಿತ್‌ ಹಿಮಾಂಶು ಮಹಾಂತ್‌ ತಬಲಾದಲ್ಲಿ ಸಾಥ್‌ ನೀಡಿದರು.