ವಚನ, ದಾಸ ಸಾಹಿತ್ಯ ಮನೆ ಮನೆಗೆ ತಲುಪಿಸೋಣ: ಪೇಜಾವರ ಶ್ರೀ

Team Udayavani, Jan 5, 2025, 6:27 AM IST

ಮಂಗಳೂರು: ವಚನ ಸಾಹಿತ್ಯ, ದಾಸ ಸಾಹಿತ್ಯವನ್ನು ಉಳಿಸಿ, ಬೆಳೆಸಿ ಮನೆ ಮನೆಗೆ ತಲುಪಿಸುವ ಹೊಣೆ ನಮ್ಮೆಲ್ಲರ ಮೇಲಿದೆ ಎಂದು ಪೇಜಾವರ ಮಠಾಧೀಶರಾದ ಶ್ರೀ ವಿಶ್ವಪ್ರಸನ್ನ ತೀರ್ಥ ಸ್ವಾಮೀಜಿ ಹೇಳಿದರು.

ಶನಿವಾರ ಪುರಭವನದಲ್ಲಿ “ರಾಜ್ಯಮಟ್ಟದ ವಚನ ಸಾಹಿತ್ಯ ಸಮ್ಮೇಳನ’ದಲ್ಲಿ ಸಾನಿಧ್ಯ ವಹಿಸಿದ್ದ ಆಶೀರ್ವಚನ ನೀಡಿದ ಅವರು, ವಚನ ಸಾಹಿತ್ಯದಲ್ಲಿನ ತತ್ವಗಳನ್ನು ಬದುಕಿನಲ್ಲಿ ಅನುಷ್ಠಾನಿಸಿದರೆ ಜೀವನದಲ್ಲಿ ಪರಿಪೂರ್ಣತೆ ದೊರೆಯಲು ಸಾಧ್ಯ ಎಂದರು.
ವಚನ ಸಾಹಿತ್ಯ, ದಾಸ ಸಾಹಿತ್ಯದಿಂದ ಸಮಾಜದಲ್ಲಿ ಬಹು ದೊಡ್ಡ ಕ್ರಾಂತಿಯಾಗಿದೆ. ಸರಳ ಶಬ್ದಗಳ ಮೂಲಕ ವಚನಗಳು ಜನರ ಮನಮುಟ್ಟಿವೆ ಎಂದ ಅವರು, ನಮ್ಮ ಮಾತು ಮತ್ತೂಬ್ಬರನ್ನು ಕೆರಳಿಸುವಂತಿರಬಾರದು. ಇತರರ ಮಾತಿನಿಂದ ನಾವೂ ಉದ್ವೇಗಕ್ಕೆ ಒಳಗಾಗಬಾರದು. ಸಮಚಿತ್ತದಿಂದ ಬದುಕನ್ನು ಸಾಗಿಸಿದರೆ ಅದೇ ಭಗವಂತನ ಆರಾಧನೆ. ಶಾಸ್ತ್ರಗಳಲ್ಲಿ ಅಡಕವಾಗಿದ್ದ ತತ್ವಗಳನ್ನು ಕಾಲ ಕಾಲಕ್ಕೆ ಶರಣರು, ದಾಸರು ಮನೆ ಮನೆಗೆ ಮುಟ್ಟಿಸಿದರು ಎಂದು ವಿವರಿಸಿದರು.

ಬೆಂಗಳೂರಿನ ಬಸವ ಸಮಿತಿ ಅಧ್ಯಕ್ಷ ಡಾ| ಅರವಿಂದ ಜತ್ತಿ ಅವರ ಅಧ್ಯಕ್ಷತೆಯ ಸಮ್ಮೇಳನವನ್ನು ಅಕ್ಕಮಹಾದೇವಿ ವೀರಶೈವ ಮಹಿಳಾ ಸಂಘ ಸಂಘಟಿಸಿತ್ತು. ಜಿಲ್ಲಾ ಕಸಾಪ ಮಾಜಿ ಅಧ್ಯಕ್ಷ ಮಾಜಿ ಅಧ್ಯಕ್ಷ ಪ್ರದೀಪ್‌ ಕುಮಾರ್‌ ಕಲ್ಕೂರ, ಮಹಾಸಂಘದ ಸ್ಥಳೀಯ ಅಧ್ಯಕ್ಷೆ ಸುಮಾ ಅರುಣ್‌ ಮಾನ್ವಿ , ಶ್ರೀನಿವಾಸ ಸಮೂಹ ವಿದ್ಯಾಸಂಸ್ಥೆಗಳ ನಿರ್ದೇಶಕಿ ವಿಜಯಲಕ್ಷ್ಮೀ ಆರ್‌. ರಾವ್‌ ಮತ್ತಿತರರು ಭಾಗವಹಿಸಿದ್ದರು.