ಪ್ರಾರಂಭೋತ್ಸವದಂದೇ ಶಾಲೆಗೆ ಬೀಗ; ವಿದ್ಯಾರ್ಥಿಗಳು ಅತಂತ್ರ

ಹಳೆಯಂಗಡಿ: ಸುಮಾರು 180 ವರ್ಷಗಳ ಇತಿಹಾಸವಿರುವ ಇಲ್ಲಿನ ಹಳೆಯಂಗಡಿಯ ವ್ಯಾಪ್ತಿಯ ಏಕೈಕ ಸರಕಾರಿ ಅನುದಾನಿತ ಯುಬಿಎಂಸಿ ಹಿರಿಯ ಪ್ರಾಥಮಿಕ ಶಾಲೆಯಲ್ಲಿ ಎಂದಿನಂತೆ ಮೇ 29ರಂದು ಪ್ರಾರಂಭೋತ್ಸವ ಆಚರಿಸಬೇಕಾಗಿತ್ತು. ಆದರೆ ಶಾಲೆ ಬಾಗಿಲನ್ನೇ ತೆರೆಯದೇ ಇದ್ದುದರಿಂದ ಇಲ್ಲಿನ ವಿದ್ಯಾರ್ಥಿಗಳು ಅತಂತ್ರರಾಗಬೇಕಾದ ಪರಿಸ್ಥಿತಿ ನಿರ್ಮಾಣವಾಗಿದೆ.

1840ರಲ್ಲಿ ಪ್ರಾರಂಭಗೊಂಡ ಯುಬಿಎಂಸಿ ಶಾಲೆಯು ಪ್ರಸ್ತುತ 1ರಿಂದ 7ರವರೆಗೆ ಕಳೆದ ಶೈಕ್ಷಣಿಕ ವರ್ಷದಲ್ಲಿ 50 ಮಂದಿ ವಿದ್ಯಾರ್ಥಿಗಳು ವಿದ್ಯಾರ್ಜನೆ ನಡೆಸುತ್ತಿದ್ದರು. ಈಗ ಹೊಸದಾಗಿ ದಾಖಲಾತಿ ಸ್ವೀಕರಿಸದೇ, ಈ ಹಿಂದಿನ ತರಗತಿಯಲ್ಲಿ ಕಲಿಯುತ್ತಿದ್ದ ಇಲ್ಲಿನ ವಿದ್ಯಾರ್ಥಿಗಳಿಗೆ ಪ್ರಾರಂಭೊತ್ಸವದಂದು ಪೋಷಕರೊಂದಿಗೆ ಬಂದವರಿಗೆ ಶಾಲೆಗೆ ಬೀಗ ಹಾಕಿ ಸ್ವಾಗತಿಸಿರುವುದನ್ನು ಕಂಡು ಆಶ್ಚರ್ಯವಾಗಿದೆ.

ಕಾರಣ
ಸರಕಾರದಿಂದ ಅನುದಾನಿತ ಶಾಲೆಯ ಮುಖ್ಯೋಪಾಧ್ಯಾಯಿನಿಯಾಗಿ ಐರಿನ್‌ ಕ್ರಿಸ್ತಬೆಲ್ ಅವರು ಕಳೆದ ನವೆಂಬರ್‌ನಲ್ಲಿ ನಿವೃತ್ತರಾಗಿದ್ದರು. ಅವರ ನಿವೃತ್ತಿಯ ಅನಂತರ ಶಾಲೆ ಮುಚ್ಚಬಾರದು ಎಂಬ ಪೋಷಕರ ಒತ್ತಡದಿಂದ ನಾಲ್ಕು ಮಂದಿ ಗೌರವ ಶಿಕ್ಷಕಿಯರ ಎಪ್ರಿಲ್ವರೆಗೆ ಧರ್ಮಾರ್ಥವಾಗಿ ಸೇವೆಯನ್ನು ನೀಡಿದ್ದರು. ಈ ನಡುವೆ ನಿವೃತ್ತಿಯ ಮೊದಲೇ ಒಂದು ವರ್ಷದಿಂದ ಶಾಲೆಗೊಂದು ಶಿಕ್ಷಕರನ್ನು ನೀಡಿ ಎಂದು ಆಡಳಿತ ಮಂಡಳಿ ಸಹಿತ ಮಕ್ಕಳು, ಪೋಷಕರು ಇಲಾಖೆಗೆ ಸಾಕಷ್ಟು ಮನವಿ ಮಾಡಿಕೊಂಡಿದ್ದರೂ ಸಹ ಯಾವುದೇ ಸ್ಪಂದನೆ ಸಿಗಲಿಲ್ಲ.

ಹೀಗಾಗಿ ಆಡಳಿತ ಮಂಡಳಿಯಿಂದ ಬಂದ ಸೂಚನೆಯಂತೆ ಶಾಲೆಯನ್ನು ಬಂದ್‌ ಮಾಡಿ ಮಕ್ಕಳಿಗೆ ಟಿಸಿಯನ್ನು ಕೊಡುವ ನಿರ್ಧಾರವನ್ನು ಕೈಗೊಂಡಿರು ವುದರಿಂದ ಈಗ ಶಾಲೆಗೆ ಬೀಗ ಜಡಿಯಲಾಗಿದೆ.

ಬಡವರ್ಗದ ಶಾಲೆ ಎಂದೇ ಪ್ರಸಿದ್ಧಿ ಯಲ್ಲಿರುವ ಯುಬಿಎಂಸಿ ಶಾಲೆಯಲ್ಲಿ ಲಕ್ಷಾಂತರ ಮಂದಿ ವಿದ್ಯಾರ್ಥಿಗಳು ವಿದ್ಯಾರ್ಜನೆ ನಡೆಸಿದ್ದು, ದೇಶ ವಿದೇಶದಲ್ಲಿ ನೆಲೆಸಿದ್ದಾರೆ. ಒಂದು ಕಾಲದಲ್ಲಿ 20 ಮಂದಿ ಶಿಕ್ಷಕರಿದ್ದರು. ಈ ಶಾಲೆಗೆ ರೋಟರಿ ಸಂಸ್ಥೆಯು 2 ಲಕ್ಷ ರೂ. ವೆಚ್ಚದಲ್ಲಿ ಕಂಪ್ಯೂಟರ್‌ಗಳನ್ನು ಕೊಡುಗೆಯಾಗಿ ನೀಡಿದೆ. ಈ ಶಾಲೆಯಲ್ಲಿ ಅನೇಕ ಸ್ಥಳೀಯ ಸಂಘ ಸಂಸ್ಥೆಗಳು ತಮ್ಮ ಸೇವಾ ಚಟುವಟಿಕೆಯನ್ನು ನಡೆಸಿದೆ. ಚುನಾವಣೆ ವೇಳೆ ಮತದಾನದ ಕೇಂದ್ರವಾಗಿಯೂ ಗುರುತಿಸಲ್ಪಟ್ಟಿದೆ. ಆಡಳಿತ ಮಂಡಳಿಯು ಸಹ ಹತ್ತಿರದಲ್ಲಿಯೇ ಆಂಗ್ಲ ಮಾದ್ಯಮ ಶಾಲೆಯನ್ನು ತೆರೆದಿದೆ. ಸುತ್ತಮುತ್ತಲಲ್ಲಿ ಕನ್ನಡ ಮಾಧ್ಯಮದ ಏಕೈಕ ಸರಕಾರಿ ಶಾಲೆ ಇದಾಗಿದೆ. ಬಡವರ್ಗದ ಮಕ್ಕಳಿಗೆ ಈ ಶಾಲೆಯೇ ಮುಖ್ಯವಾಗಿರುವುದರಿಂದ ವಿದ್ಯಾರ್ಥಿಗಳ ಹೆತ್ತವರು ನಮಗೆ ಟಿಸಿ ಬೇಡ ಶಾಲೆಯನ್ನು ಪುನರಾರಂಭಿಸಿ ಎಂದು ಒತ್ತಾಯಿಸುತ್ತಿದ್ದಾರೆ.