ಸೋರುತ್ತಿದೆ ಸುಳ್ಯ ಸಂತೆ ಮಾರುಕಟ್ಟೆ

Team Udayavani, Jul 21, 2017, 6:40 AM IST

ಸುಳ್ಯ: ಸುಳ್ಯ ಎಪಿಎಂಸಿ ಯಾರ್ಡ್‌ನಲ್ಲಿರುವ ತರಕಾರಿ ಮಾರುಕಟ್ಟೆಯ ಛಾವಣಿ ಅಲ್ಲಲ್ಲಿ ತೂತು ಬಿದ್ದಿದ್ದು, ಮಳೆ ನೀರು ಸೋರುತ್ತಿದೆ. ಇದರಿಂದ ವ್ಯಾಪಾರಸ್ಥರ ವಹಿವಾಟಿಗೆ ತೊಡಕುಂಟಾಗಿದೆ.

ಈ ಹಿಂದೆ ಸುಳ್ಯ ನಗರ ಪಂಚಾಯತ್‌ಇದರ ತರಕಾರಿ ಮಾರುಕಟ್ಟೆ ನಗರ ಪಂಚಾಯತ್‌ ಎದುರು ಇರುವ ಕಟ್ಟಡದಲ್ಲಿ ನಡೆಯುತ್ತಿದ್ದು, ಇಲ್ಲಿ ಜಾಗ ಇಕ್ಕಟ್ಟು ಆಗಿರುವುದನ್ನು ಕಂಡು. ಅದನ್ನು ವಿಶಾಲವಾದ ವ್ಯವಸ್ಥೆ ಇರುವ ಎಪಿಎಂಸಿ ಯಾರ್ಡ್‌ಗೆ ವರ್ಗಾಯಿಸಲಾಯಿತು. ಮೊದಲು ಎರಡೂ ಕಡೆ ಸಂತೆ ನಡೆಯುತ್ತಿತ್ತು.

ರವಿವಾರ ನಗರ ಪಂಚಾಯತ್‌ ವ್ಯವಸ್ಥೆಯ ಸಂತೆ ಮಾರುಕಟ್ಟೆಯಲ್ಲಿ ಸಂತೆ ನಡೆಯುತ್ತಿದ್ದು, ಬುಧವಾರ ಎಪಿಎಂಸಿ ಯಾರ್ಡ್‌ನಲ್ಲಿ ನಡೆಯುತ್ತಿತ್ತು. ಗ್ರಾಹಕರ ಕೊರತೆ ಕಂಡು ಬಂದ ಕಾರಣ ಸುಳ್ಯ ನಗರ ಪಂಚಾಯತ್‌ನ ಸಂತೆಯನ್ನು ರದ್ದುಪಡಿಸಲಾಯಿತು.

ಸಂತೆಯ ಸಂದರ್ಭ ಎಪಿಎಂಸಿ ಯಾರ್ಡ್‌ ವ್ಯಾಪಾರಸ್ಥರಿಗೆ, ಗ್ರಾಹಕರಿಗೆ ಇಬ್ಬರಿಗೂ ಅನುಕೂಲವಾಗಿದೆ.  ಆದರೆ ಸೋರುತ್ತಿರುವ ಛಾವಣಿಯನ್ನು ಸರಿಪಡಿಸಬೇಕೆಂದು ತರಕಾರಿ ಮಳಿಗೆಯವರು ಆಗ್ರಹಿಸಿದ್ದಾರೆ.