ಮಂಗಳೂರು ದಕ್ಷಿಣ: ಜಿಲ್ಲಾ ಕೇಂದ್ರದ ಕ್ಷೇತ್ರ

Team Udayavani, Apr 22, 2018, 1:11 PM IST

ಮಂಗಳೂರು ದಕ್ಷಿಣ ಜಿಲ್ಲಾ ಕೇಂದ್ರವನ್ನು ಒಳಗೊಂಡಿರುವ ವಿಧಾನಸಭಾ ಕ್ಷೇತ್ರ. ವಾಣಿಜ್ಯ, ವ್ಯವಹಾರಗಳ ಕೇಂದ್ರವೂ ಆಗಿದೆ. ಸರಕಾರದ ಬಹುತೇಕ ಜಿಲ್ಲಾ ಕಚೇರಿಗಳು ಇಲ್ಲಿವೆ. ಆದುದರಿಂದ ಜಿಲ್ಲೆಯ ಇತರ ಕಡೆಗೆ ಹೋಲಿಸಿದರೆ ಒಂದಷ್ಟು ಹೆಚ್ಚು ಮೂಲಸೌಲಭ್ಯಗಳ ಆವಶ್ಯಕತೆ ಇರುತ್ತದೆ. ಬಹಳಷ್ಟು ನಿರೀಕ್ಷೆಗಳಿರುತ್ತವೆ. ಕಳೆದ ಕೆಲವು ಚುನಾವಣೆಗಳಲ್ಲಿ ನೀಡಿದ್ದ ಅನೇಕ ಭರವಸೆಗಳು ಇನ್ನೂ ಭರವಸೆಗಳಾಗಿಯೇ ಉಳಿದಿವೆ.

ಸುಸಜ್ಜಿತ ಕೇಂದ್ರ ಬಸ್‌ನಿಲ್ದಾಣ
1 ಮಂಗಳೂರಿನಲ್ಲಿ 2 ದಶಕಗಳಿಂದ ಕೇಂದ್ರ ಬಸ್‌ ನಿಲ್ದಾಣ ತಾತ್ಕಾಲಿಕ ನೆಲೆಯಲ್ಲೇ ಇದೆ. ಸುಸಜ್ಜಿತ ಕೇಂದ್ರ ಬಸ್‌ ನಿಲ್ದಾಣ ನಿರ್ಮಾಣಕ್ಕೆ ಪಂಪ್‌ವೆಲ್‌ನಲ್ಲಿ ಜಾಗ ಸ್ವಾಧೀನಪಡಿಸಿದ್ದರೂ ಕೇವಲ ಪ್ರಸ್ತಾವನೆಯಲ್ಲೇ ಉಳಿದುಕೊಂಡಿದೆ.

ಸುಗಮ ಸಂಚಾರಕ್ಕೆ ಮಾಸ್ಟರ್‌ ಪ್ಲಾನ್‌
2 ಸಂಚಾರ ದಟ್ಟಣೆ ಮಂಗಳೂರು ನಗರ ಎದುರಿಸುತ್ತಿರುವ ಪ್ರಮುಖ ಸಮಸ್ಯೆಗಳಲ್ಲೊಂದು. ಇದಕ್ಕೆ ಪರಿಣಾಮಕಾರಿ ಪರಿಹಾರ ಕಲ್ಪಿಸುವ ನಿಟ್ಟಿನಲ್ಲಿ ಮಾಸ್ಟರ್‌ ಪ್ಲಾನ್‌ ರೂಪಿಸಿ ಕಾರ್ಯಾನುಷ್ಠಾನಗೊಳಿಸಬೇಕು.

ಬಹುಅಂತಸ್ತು ಪಾರ್ಕಿಂಗ್‌ ವ್ಯವಸ್ಥೆ
3 ಪಾರ್ಕಿಂಗ್‌ ಸಮಸ್ಯೆ ಮಂಗಳೂರು ನಗರದಲ್ಲಿ ಸಂಚಾರ ಅಸ್ತವ್ಯಸ್ತಕ್ಕೆ ಕಾರಣವಾಗುತ್ತಿದೆ. ಬಹುಅಂತಸ್ತು ಪಾರ್ಕಿಂಗ್‌ ಯೋಜನೆ ರೂಪಿಸಿದ್ದರೂ ಕಾರ್ಯರೂಪಕ್ಕೆ ಬಂದಿಲ್ಲ. ಪ್ರಮುಖ ಪ್ರದೇಶಗಳಲ್ಲಿ ಪಾರ್ಕಿಂಗ್‌ ತಾಣ ಗುರುತಿಸುವುದು ಅಗತ್ಯ.

ನಿರಂತರ ನೀರು
4 ಮಂಗಳೂರು ಮಹಾನಗರ ಪಾಲಿಕೆ ವ್ಯಾಪ್ತಿಯಲ್ಲಿ 24×7 ನೀರು ವಿತರಣೆ ಮಾಡುವ ಪ್ರಸ್ತಾವ ಪಾಲಿಕೆಯಲ್ಲಿದ್ದರೂ ಜಾರಿಯಾಗಿಲ್ಲ. ನಿರಂತರ ನೀರು ಪೂರೈಕೆ ಯೋಜನೆ ತ್ವರಿತವಾಗಿ ಅನುಷ್ಠಾನವಾಗಬೇಕು.

ಸುಸಜ್ಜಿತ ರಂಗಮಂದಿರ
5 ಮಂಗಳೂರು ನಗರದ ಹಲವು ವರ್ಷಗಳ ಕನಸು ಆಗಿರುವ ಜಿಲ್ಲಾ ಸುಸಜ್ಜಿತ ರಂಗಮಂದಿರ ಯೋಜನೆ ಅನುಷ್ಠಾನ ಇನ್ನೂ ಆಗಿಲ್ಲ. ಕರಾವಳಿಯ ಕಲೆ, ಸಂಸ್ಕೃತಿಗೆ ಪ್ರೋತ್ಸಾಹ ನೀಡಲು ರಂಗಮಂದಿರ ನಿರ್ಮಾಣದಿಂದ ಸಾಧ್ಯ.

ಐಟಿ ಹಬ್‌ ಆಗಿ ಅಭಿವೃದ್ಧಿ
6 ಮಂಗಳೂರು ನಗರವನ್ನು ಕರ್ನಾಟಕದ ಎರಡನೇ ಐಟಿ ಹಬ್‌ ಆಗಿ ಅಭಿವೃದ್ಧಿ ಪಡಿಸುವ ಭರವಸೆ ಕಳೆದ 10 ವರ್ಷಗಳಿಂದ ಕೇಳಿಬರುತ್ತಿದೆ. ಆದರೆ ಆ ನಿಟ್ಟಿನಲ್ಲಿ ಹೇಳಿಕೊಳ್ಳುವಂತಹ ಪ್ರಗತಿ ಆಗಿರುವುದು ಕಂಡುಬರುತ್ತಿಲ್ಲ

ಸುಗಮ ಸಂಚಾರ
7 ಮಂಗಳೂರು ನಗರದಲ್ಲಿ ಸುಗಮ ಸಂಚಾರವೇ ದುಸ್ತರ ಎನ್ನುವ ಪರಿಸ್ಥಿತಿ ಇದೆ. ವಾಹನಗಳು ಮತ್ತು ಪಾದಚಾರಿಗಳ ಸುಗಮ ಸಂಚಾರಕ್ಕಾಗಿ ಪ್ರಮುಖ ಪ್ರದೇಶಗಳಲ್ಲಿ ಫ್ಲೈ ಓವರ್‌, ಅಂಡರ್‌ಪಾಸ್‌ ನಿರ್ಮಾಣ ಅಗತ್ಯವಿದೆ.

ಜಿಲ್ಲಾಸ್ಪತ್ರೆ ಉನ್ನತೀಕರಣ
8 ಲೇಡಿಗೋಶನ್‌ ಹಾಗೂ ಜಿಲ್ಲಾ ವೆನ್ಲಾಕ್‌ ಆಸ್ಪತ್ರೆಗಳಿಗೆ 8 ಜಿಲ್ಲೆಗಳಿಂದ ರೋಗಿಗಳು ಬರುತ್ತಾರೆ. ಆದರೆ ಅಲ್ಲಿ ಹಾಸಿಗೆಗಳ ಕೊರತೆಯಿಂದಾಗಿ ರೋಗಿಗಳಿಗೆ ಸಮರ್ಪಕ ಸೇವೆ ಸಾಧ್ಯವಾಗುತ್ತಿಲ್ಲ. ಅಲ್ಲಿ ಸೌಲಭ್ಯಗಳ ಹೆಚ್ಚಳವಾಗಬೇಕು.

ಸುಸಜ್ಜಿತ ಮಾರುಕಟ್ಟೆ
9 ಹಂಪನಕಟ್ಟೆ ಸಮೀಪದ ಕೇಂದ್ರ ಮಾರುಕಟ್ಟೆಯ ಅಭಿವೃದ್ಧಿ ಯೋಜನೆ ಕಾರ್ಯಗತವಾಗಬೇಕು. ನಗರದೊಳಗಿನ ಉಪಮಾರುಕಟ್ಟೆಗಳ ನಿರ್ಮಾಣ ಹಾಗೂ ಅಭಿವೃದ್ಧಿ ಕಾರ್ಯವೂ ತ್ವರಿತವಾಗಿ ನಡೆಯಬೇಕು.

ಜಲ ಪ್ರವಾಸೋದ್ಯಮ
10 ಮಂಗಳೂರಿನಲ್ಲಿ ಜಲಪ್ರವಾಸೋದ್ಯಕ್ಕೆ ವಿಪುಲ ಅವಕಾಶಗಳಿವೆ. ಆದರೆ ಸರಿಯಾದ ಯೋಜನೆಯಿಲ್ಲ. ಅವಕಾಶಗಳ ಸದ್ಬಳಕೆಯಾಗುವ ನಿಟ್ಟಿನಲ್ಲಿ ಸರಿಯಾದ ನೀಲನಕಾಶೆ ಸಿದ್ಧಪಡಿಸಿ ಕಾರ್ಯಾನುಷ್ಠಾನಗೊಳಿಸಬೇಕು.

ಸಣ್ಣ ಕ್ರೀಡಾಂಗಣಗಳ ಅಭಿವೃದ್ಧಿ
11 ಮಂಗಳೂರು ನಗರ ಆಟದ ಮೈದಾನಗಳ ಕೊರತೆ ಎದುರಿಸುತ್ತಿದೆ. ನಗರವಾಸಿಗಳ ಕ್ರೀಡಾ ಸ್ಫೂರ್ತಿಯನ್ನು ಹೆಚ್ಚಿಸುವ ನಿಟ್ಟಿನಲ್ಲಿ ಕೆಲವು ಆಯ್ದ ತಾಣಗಳಲ್ಲಿ ಸಣ್ಣ ಕ್ರೀಡಾಂಗಣಗಳು ನಿರ್ಮಾಣವಾಗಲಿ.

ಬಂಡವಾಳ ಆಕರ್ಷಣೆ
12 ಮಂಗಳೂರಿನಲ್ಲಿ ಹೂಡಿಕೆಗೆ ಸಾಕಷ್ಟು ಅವಕಾಶಗಳಿವೆ. ಆದರೆ ಹೂಡಿಕೆದಾರರನ್ನು ಆಕರ್ಷಿಸುವ ಯತ್ನಗಳು ಸಾಲುತ್ತಿಲ್ಲ. ಹೂಡಿಕೆದಾರರನ್ನು ಸೆಳೆದು ಅವರು ಉದ್ದಿಮೆಗಳನ್ನು ಸ್ಥಾಪಿಸಲು ಮನ ಮಾಡುವಂತಹ ಯೋಜನೆ ರೂಪಿಸಬೇಕು