Mangaluru: ಬೀಗ ಒಡೆದು ಮನೆಗೆ ನುಗ್ಗಿ ಸೊತ್ತುಗಳಿಗೆ ಹಾನಿ; ದೂರು ದಾಖಲು

Team Udayavani, Sep 29, 2023, 9:39 PM IST

ಮಂಗಳೂರು: ಮನೆಯವರು ಇಲ್ಲದ ವೇಳೆ ಕಿಡಿಗೇಡಿಗಳು ಬೀಗ ಒಡೆದು ಒಳಗೆ ಪ್ರವೇಶಿಸಿ ವಸ್ತುಗಳನ್ನು ಹಾನಿಗೊಳಿಸಿದ ಘಟನೆ ಬರ್ಕೆ ಪೊಲೀಸ್‌ ಠಾಣಾ ವ್ಯಾಪ್ತಿಯ ಬೋಳೂರಿನಲ್ಲಿ ಸಂಭವಿಸಿದೆ.

ಬೋಳೂರಿನ ರತ್ನಾಕರ ಪುತ್ರನ್‌ ತನ್ನ ಮನೆಯಲ್ಲಿ ನೀರಿನ ವ್ಯತ್ಯಯ ಇರುವುದರಿಂದ ಸುಮಾರು 11 ತಿಂಗಳುಗಳಿಂದ ತನ್ನ ಮಗಳ ಮನೆಯಲ್ಲಿ ವಾಸ್ತವ್ಯವಿದ್ದು ಪ್ರತೀದಿನ ಬಂದು ಸ್ವಚ್ಛ ಮಾಡಿ ಬೀಗ ಹಾಕಿ ಹೋಗುತ್ತಿದ್ದರು.

ಸೆ. 28ರಂದು ಬೆಳಗ್ಗೆ 11 ಗಂಟೆಗೆ ಬಂದು ಮನೆಗೆಲಸ ಮುಗಿಸಿ ಸಂಜೆ ಬೀಗ ಹಾಕಿ ಮಗಳ ಮನೆ ಇರುವ ಅಶೋಕನಗರಕ್ಕೆ ತೆರಳಿದ್ದರು. ಅದೇ ದಿನ ಸಂಜೆ 7 ಗಂಟೆಗೆ ಅವರ ಮನೆಯ ಹಿಂಬದಿಯಲ್ಲಿ ವಾಸವಿರುವ ವಸಂತ ಅವರು ಕರೆ ಮಾಡಿ ಮನೆಯ ಬಾಗಿಲು ತೆರೆದಿದ್ದು, ಇನ್ವರ್ಟರ್‌ ಬ್ಯಾಟರಿ ಹೊರಗೆ ಇರುವುದನ್ನು ತಿಳಿಸಿದರು.

ರತ್ನಾಕರ ಅವರು ಮನೆಗೆ ಹೋಗಿ ನೋಡಿದಾಗ ಯಾರೋ ಕಿಡಿಗೇಡಿಗಳು ಸಂಜೆ 6ರಿಂದ 7 ಗಂಟೆಯ ನಡುವೆ ಬಾಗಿಲಿನ ಬೀಗ ಒಡೆದು ಮನೆಯೊಳಗೆ ಪ್ರವೇಶಿಸಿ ಟಿ.ವಿ., ಗಡಿಯಾರ, ದಿನಬಳಕೆಯ ವಸ್ತುಗಳನ್ನು ಪುಡಿ ಮಾಡಿ ಅಂದಾಜು 30,000 ರೂ. ನಷ್ಟವುಂಟು ಮಾಡಿರುವುದು ಕಂಡುಬಂದಿದೆ.