Mangaluru CCB: ಎಂಡಿಎಂಎ ಡ್ರಗ್ಸ್‌ ಮಾರಾಟ: ಮೂವರ ಬಂಧನ

Team Udayavani, Nov 6, 2023, 9:04 PM IST

ಮಂಗಳೂರು: ನಿಷೇಧಿತ ಮಾದಕ ವಸ್ತು ಎಂಡಿಎಂಎ ಮಾರಾಟ ಮಾಡುತ್ತಿದ್ದ ಮೂವರನ್ನು ಮಂಗಳೂರು ಸಿಸಿಬಿ ಪೊಲೀಸರು ಬಂಧಿಸಿದ್ದಾರೆ.

ಸೋಮವಾರದಂದು ನಗರದ ಫ‌ಳ್ನೀರ್‌ನ ಲಾಡ್ಜ್ ಬಳಿಯಲ್ಲಿ ಎಂಡಿಎಂಎ ಮಾರಾಟ ಮಾಡುತ್ತಿರುವ ಬಗ್ಗೆ ಖಚಿತ ಮಾಹಿತಿ ಮೇರೆಗೆ ದಾಳಿ ನಡೆಸಿದ ಪೊಲೀಸರು ಆರೋಪಿಗಳನ್ನು ಬಂಧಿಸಿ 75,000 ರೂ. ಮೌಲ್ಯದ 15 ಗ್ರಾಂ ನಿಷೇಧಿತ ಎಂಡಿಎಂಎ, ಡಿಜಿಟಲ್‌ ತೂಕಮಾಪನ, ಮೊಬೈಲ್‌ ಪೋನ್‌ಗಳು ಸಹಿತ 95,000 ರೂ. ಮೌಲ್ಯದ ಸೊತ್ತುಗಳನ್ನು ವಶಪಡಿಸಿಕೊಂಡಿದ್ದಾರೆ.

ಪ್ರಮೋದ್‌ ಎಂ.ಜಿ ಆಲಿಯಾಸ್‌ ಡಿಸ್ಕ್(30), ಮೊಹಮ್ಮದ್‌ ರಶೀದ್‌ ಎಂ.ಝಡ್‌ ಆಲಿಯಾಸ್‌ ರಾಶೀ(41) ಮತ್ತು ದರ್ಶನ್‌ ಎಸ್‌.(24) ಬಂಧಿತರು. ಇವರೆಲ್ಲರೂ ಮಡಿಕೇರಿಯವರು.

ಕ್ರಿಮಿನಲ್‌ ಹಿನ್ನೆಲೆ
ಪ್ರಮೋದ್‌ ಎಂ.ಜಿ ಮೇಲೆ ಸುಳ್ಯ ಪೊಲೀಸ್‌ ಠಾಣೆಯಲ್ಲಿ ಕೊಲೆ ಪ್ರಕರಣ, ಮಂಗಳೂರು ನಗರದ ಬರ್ಕೆ ಠಾಣೆಯಲ್ಲಿ ಕೊಲೆಯತ್ನ, ಮಡಿಕೇರಿ ನಗರ ಪೊಲೀಸ್‌ ಠಾಣೆಯಲ್ಲಿ ಸುಲಿಗೆ, ದರೋಡೆ ಪ್ರಕರಣಗಳು ದಾಖಲಾಗಿವೆ.

ಮೊಹಮ್ಮದ್‌ ರಾಶೀದ್‌ ಎಂ.ಝಡ್‌ ಮೇಲೆ ಭಾಗಮಂಡಲ ಪೊಲೀಸ್‌ ಠಾಣೆಯಲ್ಲಿ ದರೋಡೆ ಪ್ರಕರಣ, ಮಡಿಕೇರಿ ನಗರ ಠಾಣೆಯಲ್ಲಿ ಕೊಲೆ, ದರೋಡೆ, ಸುಲಿಗೆ ಪ್ರಕರಣಗಳು ದಾಖಲಾಗಿವೆ. ದರ್ಶನ್‌ ಎಸ್‌. ಮೇಲೆ ಮಡಿಕೇರಿ ನಗರ ಪೊಲೀಸ್‌ ಠಾಣೆಯಲ್ಲಿ ಕೊಲೆಯತ್ನ ಪ್ರಕರಣ ದಾಖಲಾಗಿದೆ.