Mangaluru ಕಾಲೇಜಿನ ಶೌಚಗೃಹದಲ್ಲಿ ಮೊಬೈಲ್‌ ಇಟ್ಟು ಚಿತ್ರೀಕರಣಕ್ಕೆ ಯತ್ನ; ಬಾಲಕನ ಬಂಧನ

Team Udayavani, May 9, 2024, 12:48 AM IST

ಮಂಗಳೂರು: ನಗರದ ಖಾಸಗಿ ಮೆಡಿಕಲ್‌ ಕಾಲೇಜಿನ ಮಹಿಳೆಯರ ಶೌಚಗೃಹದಲ್ಲಿ ಮೊಬೈಲ್‌ ಇಟ್ಟು ಚಿತ್ರೀಕರಣಕ್ಕೆ ಯತ್ನಿಸಿದ ಘಟನೆ ನಡೆದಿದ್ದು ಆರೋಪಿ ಅಪ್ರಾಪ್ತ ವಯಸ್ಸಿನ ಬಾಲಕನನ್ನು ಪೊಲೀಸರು ಬಂಧಿಸಿದ್ದಾರೆ.

ಸೋಮವಾರ ಮಧ್ಯಾಹ್ನ ಶೌಚಾಲಯದಲ್ಲಿ ಯಾರೂ ಇಲ್ಲದ ವೇಳೆ ನಿರಂತರವಾಗಿ ಮೊಬೈಲ್‌ ರಿಂಗಣಿಸುತ್ತಿತ್ತು. ಇದರಿಂದ ಅನುಮಾನಗೊಂಡ ಕಾಲೇಜಿನ ಭದ್ರತಾ ಸಿಬಂದಿ ಹೋಗಿ ನೋಡಿದಾಗ ಮೊಬೈಲ್‌ ಸಿಕ್ಕಿತು. ಕೂಡಲೇ ಪೊಲೀಸರಿಗೆ ತಿಳಿಸಲಾಯಿತು. ಪೊಲೀಸರು ಸಿಸಿ ಕೆಮರಾ ಪರಿಶೀಲಿಸಿದರು. ಆಗ ಬಾಲಕನ ಚಹರೆ ತಿಳಿಯಿತು.

ಚಿಕಿತ್ಸೆಗೆ ಬರುತ್ತಿದ್ದ
ಆರೋಪಿ ಬಾಲಕ ಈ ಹಿಂದೆ ಹಲವು ಬಾರಿ ಹಲ್ಲಿನ ಚಿಕಿತ್ಸೆಗೊಂದು ತಾಯಿಯ ಜತೆಗೆ ಕಾಲೇಜಿನ ಡೆಂಟಲ್‌ ವಿಭಾಗಕ್ಕೆ ಬರುತ್ತಿದ್ದ. ಸೋಮವಾರ ಒಬ್ಬನೇ ಬಂದಿದ್ದ. ಆತ ಕಾಪು ಮೂಲದವನಾಗಿದ್ದು ವಿದ್ಯಾರ್ಥಿಯಾಗಿದ್ದಾನೆ. ಬಾಲಕ (17)ನನ್ನು ಪೊಲೀಸರು ಬಾಲಾಪರಾಧ ನ್ಯಾಯಾಲಯಕ್ಕೆ ಹಾಜರುಪಡಿಸಿದ್ದಾರೆ.

ಮೊಬೈಲ್‌ನ್ನು ಪೊಲೀಸರು ವಶಕ್ಕೆ ಪಡೆದುಕೊಂಡಿದ್ದು ಅದರಲ್ಲಿ ಯಾವುದೇ ವೀಡಿಯೋ, ಪೊಟೋ ದಾಖಲಾಗಿಲ್ಲ ಎಂದು ತಿಳಿದುಬಂದಿದೆ. ಮಂಗಳೂರು ನಗರ ಉತ್ತರ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.