Mangaluru: ಕಷ್ಟದ ಸಮಯದಲ್ಲಿ ದಾರಿ ತೋರುವ ದೇವರು: ಡಾ| ಎಲಿಯಾಸ್‌ ಫ್ರ್ಯಾಂಕ್

Team Udayavani, Jan 15, 2025, 11:19 PM IST

ಮಂಗಳೂರು: ದೇವರು ನಮ್ಮ ಕಷ್ಟದ ಸಮಯದಲ್ಲಿ ಕೈಹಿಡಿದು ಸೂಕ್ತ ದಾರಿ ತೋರುತ್ತಾರೆ. ಕಷ್ಟಗಳು ನಮ್ಮನ್ನು ಬಲಿಷ್ಠಗೊಳಿಸುವ ಜತೆಗೆ ನಮ್ಮ ಭರವಸೆಗಳು ಮತ್ತಷ್ಟು ದೃಢಗೊಳ್ಳುತ್ತದೆ ಎಂದು ಪಶ್ಚಿಮ ಬಂಗಾಲದ ಅಸನ್‌ಸೋಲ್ ಧರ್ಮಪ್ರಾಂತ್ಯದ ಧರ್ಮಾಧ್ಯಕ್ಷ ಅ| ವಂ| ಡಾ| ಎಲಿಯಾಸ್‌ ಫ್ರ್ಯಾಂಕ್ ಸಂದೇಶ ನೀಡಿದರು.

ಮಂಗಳೂರಿನ ಬಿಕರ್ನಕಟ್ಟೆ ಬಾಲಯೇಸು ಪುಣ್ಯಕ್ಷೇತ್ರದಲ್ಲಿ ಬುಧವಾರ ಜರಗಿದ ವಾರ್ಷಿಕ ಮಹೋತ್ಸವದ ಬೆಳಗ್ಗಿನ ಮುಖ್ಯ ಬಲಿಪೂಜೆಯ ನೇತೃತ್ವ ವಹಿಸಿ ಸಂದೇಶ ನೀಡಿದರು.

ಕ್ರಿಸ್ತರು ನಮ್ಮನ್ನು ಪ್ರೀತಿಸಿದಂತೆ ನಾವೆಲ್ಲರೂ ಇತರರನ್ನು ಪ್ರೀತಿಸಬೇಕು. ಯೇಸು ನೀಡಿದ ಪ್ರೀತಿಯ ಸಂದೇಶವನ್ನು ಸಮುದಾಯಕ್ಕೆ ಸಾರಬೇಕು ಎಂದರು.

ಬಲಿಪೂಜೆಯಲ್ಲಿ ಅನಾರೋಗ್ಯ ಪೀಡಿತರಿಗಾಗಿ ವಿಶೇಷ ಪ್ರಾರ್ಥನೆ ನಡೆಯಿತು. ಬಳಿಕ ಬಾಲಯೇಸು ಮೂಲಕ ಲಭಿಸಿದ ಆಶೀರ್ವಾದಗಳನ್ನು ಸ್ಮರಿಸಿ ಪರಮ ಪ್ರಸಾದದ ಆರಾಧನೆ ನಡೆಸಲಾಯಿತು. ದಿನದ ಮುಖ್ಯ ಬಲಿಪೂಜೆಯಲ್ಲಿ ಸಾವಿರಾರು ಮಂದಿ ಭಕ್ತರು ಭಾಗವಹಿಸಿದ್ದರು. ಕಾರ್ಮೆಲ್‌ ಸಭೆ ಹಾಗೂ ಮಂಗಳೂರು ಧರ್ಮಪ್ರಾಂತ್ಯದ ಹಲವಾರು ಧರ್ಮಗುರುಗಳು ಬಲಿಪೂಜೆಯಲ್ಲಿ ಭಾಗಿಗಳಾಗಿದ್ದರು.

ಸಂಜೆ ನಡೆದ ಸಮಾರೋಪ ಬಲಿಪೂಜೆಯನ್ನು ಕಾರ್ಮೆಲ್‌ ಸಭೆಯ ವಂ| ರುಡಾಲ್ಫ್ ಡಿ’ಸೋಜಾ ನೆರವೇರಿಸಿ ಪ್ರವಚನ ನೀಡಿ, ಇಂದಿನ ಸಮಾಜದಲ್ಲಿ ಮೊಬೈಲ್‌ ಬಳಕೆ ಅಗತ್ಯವಾಗಿದೆ. ಅದೇ ಮಾದರಿಯಲ್ಲಿ ದೇವರನ್ನು ಸ್ಮರಿಸುವ ಅಗತ್ಯವೂ ಅತಿಯಾಗಿದೆ. ಸಣ್ಣ ಕೆಲಸ ಗಳನ್ನು ದೇವರಿಗಾಗಿ ಮಾಡಬೇಕು. ಎಲ್ಲ ಕೆಲಸಗಳನ್ನು ಮಾಡುವ ವೇಳೆ ದೇವರ ಹೆಸರಲ್ಲಿ ಮಾಡಿದಾಗ ಸಾರ್ಥಕತೆ ಪಡೆದುಕೊಳ್ಳಲು ಸಾಧ್ಯ ಎಂದರು.

ಪುಣ್ಯಕ್ಷೇತ್ರದ ನಿರ್ದೇಶಕ ವಂ| ಸ್ಟೀಫನ್‌ ಪಿರೇರಾ, ಸಂತ ಜೋಸೆಫರ ಗುರುಮಠದ ಮಠಾಧಿಪತಿ ವಂ| ಮೆಲ್ವಿನ್‌ ಡಿ’ಕುನ್ಹಾ ಮತ್ತಿತರ ಧರ್ಮಗುರುಗಳು ಬಲಿಪೂಜೆಯಲ್ಲಿ ಭಾಗಿಗಳಾಗಿದ್ದರು.