ಬಾಯ್ದೆರೆದ ಮ್ಯಾನ್‌ಹೋಲ್‌ ಕಾಮಗಾರಿ ಪೂರ್ಣ

Team Udayavani, Jun 3, 2018, 10:51 AM IST

ಮಹಾನಗರ: ಕಳೆದ ಮೂರು ದಿನಗಳಿಂದ ನಗರದ ಅನೇಕ ಕಡೆಗಳಲ್ಲಿ ರಸ್ತೆ ಮಧ್ಯೆಯೇ ಅರೆಬರೆ ಮ್ಯಾನ್‌ಹೋಲ್‌ ಕಾಮಗಾರಿ ನಡೆಸುತ್ತಿದ್ದ ಮಹಾನಗರ ಪಾಲಿಕೆ ಇದೀಗ ಎಚ್ಚೆತ್ತುಕೊಂಡು ಕಾಮಗಾರಿ ಪೂರ್ಣಗೊಳಿಸಿದೆ.

ಕುಂಟುತ್ತಾ ಸಾಗುತ್ತಿದ್ದ ಕಾಮಗಾರಿ ಯಿಂದಾಗಿ ನಗರದ ಬಂಟ್ಸ್‌ ಹಾಸ್ಟೆಲ್‌ನ ಅಭಿಮಾನ್‌ ರೆಸಿಡೆನ್ಸಿ ಎದುರು ಮ್ಯಾನ್‌ ಹೋಲ್‌ಗ‌ಳು ಬಾಯಿ ತೆರೆದುಕೊಂಡು ಅಪಾಯದ ಸ್ಥಿತಿಯಲ್ಲಿತ್ತು. ಈ ಬಗ್ಗೆ ಉದಯವಾಣಿ ‘ಸುದಿನ’ ಮಹಾಮಳೆಗೆ ತಲೆನೋವಾಗಿ ಪರಿಣಮಿಸಿರುವ ಮ್ಯಾನ್‌ ಹೋಲ್‌ಗ‌ಳು’ ಎಂಬ ಶೀರ್ಷಿಕೆಯಡಿ ಶುಕ್ರವಾರ ವಿಶೇಷ ವರದಿ ಪ್ರಕಟಿಸಿತ್ತು. ಇದರಿಂದ ಎಚ್ಚೆತ್ತುಕೊಂಡ ಪಾಲಿಕೆಯು ತರಾತುರಿಯಲ್ಲಿ ಕಾಮಗಾರಿ ಪೂರ್ಣಗೊಳಿಸಿದೆ.

ನಗರದ ಬಿಜೈ ಮಾರುಕಟ್ಟೆ ಬಳಿ ಇರುವಂತಹ ಮ್ಯಾನ್‌ಹೋಲ್‌ ಒಂದರಲ್ಲಿ ಕಾಮಗಾರಿ ಪ್ರಯುಕ್ತ ಕಳೆದೆ ಕೆಲವು ದಿನಗಳಿಂದ ಮ್ಯಾನ್‌ಹೋಲ್‌ಗೆ ಮುಚ್ಚಲಾಗುವ ಮುಚ್ಚಳವನ್ನು ತೆರೆದಿಡಲಾಗಿತ್ತು. ಇದರಿಂದ ನೀರು ತುಂಬಿ ಗಲೀಜು ನೀರು ರಸ್ತೆಗೆ, ಅಕ್ಕ ಪಕ್ಕದ ಅಂಗಡಿಗಳಿಗೆ ಹರಿಯುತ್ತಿತ್ತು. ಅಕ್ಕಪಕ್ಕದಲ್ಲಿ ಓಡಾಡುತ್ತಿದ್ದ ಮಂದಿ ಮೂಗು ಮುಚ್ಚಿಕೊಂಡು ಓಡಾಡುತ್ತಿದ್ದರು. ಕೊನೆಗೂ ಎಚ್ಚೆತ್ತ ಪಾಲಿಕೆಯು ತ್ವರಿತ ಗತಿಯ ಮ್ಯಾನ್‌ಹೋಲ್‌ ಕಾಮಗಾರಿ ನಡೆಸುತ್ತಿದೆ.