ಮೇರಿಹಿಲ್‌: ತಂತಿಗಳ ಮೇಲಿನ ತೆಂಗಿನ ಗರಿಗಳ ತೆರವಿಗೆ ಆಗ್ರಹ

Team Udayavani, May 24, 2018, 1:57 PM IST

ಮಹಾನಗರ : ನಗರದ ಮೇರಿಹಿಲ್‌ ಪಿಂಟೊಗಾರ್ಡನ್‌ ಬಳಿ ವಿದ್ಯುತ್‌ ತಂತಿಗಳ ಮೇಲೆ ತೆಂಗಿನಮರದ ಗರಿಗಳು ತಾಗುತ್ತಿದೆ ಎಂದು ಮೆಸ್ಕಾಂಗೆ ದೂರು ನೀಡಿದರೂ ಅದನ್ನು ತೆರವುಗೊಳಿಸಿಲ್ಲ ಎಂದು ಸ್ಥಳೀಯರು ಆರೋಪಿಸಿದ್ದಾರೆ. ಮುಂಗಾರು ಮುಂಜಾಗ್ರತೆ ಸುದಿನ ಅಭಿಯಾನಕ್ಕೆ ಸ್ಪಂದಿಸಿರುವ ಓದುಗರು ತಮ್ಮ ಭಾಗದ ವಿದ್ಯುತ್‌ ತಂತಿಗಳ ಸಮಸ್ಯೆಗಳನ್ನು ಉದಯವಾಣಿಗೆ ತಿಳಿಸಿದ್ದಾರೆ.

ತೆಂಗಿನಗರಿಯ ಜತೆಗೆ ಮರದ ರೆಂಬೆಗಳೂ ತಾಗುತ್ತಿದ್ದು, ಅದನ್ನು ತೆರವುಗೊಳಿಸದೇ ಇರುವುದರಿಂದ ಪದೇ ಪದೇ ವಿದ್ಯುತ್‌ ಪೂರೈಕೆಯಲ್ಲಿ ತೊಂದರೆ ಉಂಟಾಗುತ್ತಿದೆ. ಕೆಲದಿನಗಳ ಹಿಂದೆ ವಿದ್ಯುತ್‌ ತಂತಿಯ ಮೇಲೆ ಮರ ಬಿದ್ದು, ವಿದ್ಯುತ್‌ ಕಂಬ ತುಂಡಾದ ಘಟನೆಯೂ ನಡೆದಿತ್ತು.

ಪ್ರಸ್ತುತ ಕಂಬ ಬದಲಿಸಿ ಬಿದ್ದ ಮರವನ್ನು ಹಾಗೇ ಬಿಡಲಾಗಿದೆ. ಹೀಗಾಗಿ ಈ ಕುರಿತು ಸಂಬಂಧಪಟ್ಟವರು ಗಮನಹರಿಸಿ ಸಮಸ್ಯೆ ಬಗೆಹರಿಸಲಿ ಎಂದು ಸ್ಥಳೀಯ ನಿವಾಸಿ ವಸಂತ್‌ ಮೇರಿಹಿಲ್‌ ಆಗ್ರಹಿಸಿದ್ದಾರೆ.