ಮಠ – ದೇಗುಲ ವಿವಾದ: ಸುಬ್ರಹ್ಮಣ್ಯ ಬಂದ್‌ ಯಶಸ್ವಿ

Team Udayavani, Mar 8, 2019, 1:00 AM IST

ಸುಬ್ರಹ್ಮಣ್ಯ: ಕುಕ್ಕೆ ಸುಬ್ರಹ್ಮಣ್ಯ ದೇವಸ್ಥಾನವನ್ನು ಸಂಪುಟ ಶ್ರೀ ನರಸಿಂಹ ಸ್ವಾಮಿ ಮಠದ ಆಡಳಿತಕ್ಕೆ ಒಪ್ಪಿಸುವಂತೆ ಮಠದ ಪರ ವಕೀಲರೊಬ್ಬರು ಸರಕಾರ ಮತ್ತು ಧಾರ್ಮಿಕ ದತ್ತಿ ಇಲಾಖೆಗೆ ನೋಟಿಸ್‌ ನೀಡಿರುವ ಕ್ರಮ ವಿರೋಧಿಸಿ ಮತ್ತು ದೇವಸ್ಥಾನವನ್ನು ಮಠಕ್ಕೊಪ್ಪಿಸದಂತೆ ಸರಕಾರ ವನ್ನು ಆಗ್ರಹಿಸಿ ಕುಕ್ಕೆ ದೇವಸ್ಥಾನ ಭಕ್ತರ ಹಿತಾರಕ್ಷಣಾ ವೇದಿಕೆ ಗುರುವಾರ ನೀಡಿದ್ದ ಸುಬ್ರಹ್ಮಣ್ಯ ಬಂದ್‌ ಶಾಂತಿಯುತವಾಗಿ ನಡೆಯಿತು.

ಬಹುತೇಕ ಅಂಗಡಿ ಮುಂಗಟ್ಟುಗಳು ಸ್ವಯಂ ಪ್ರೇರಿತವಾಗಿ ಬೆಳಗ್ಗೆ 6ರಿಂದ ಸಂಜೆ 5ರ ತನಕ ಮುಚ್ಚಿದ್ದವು. ಬಂದ್‌ಗೆ ಆಟೋ ಚಾಲಕ-ಮಾಲಕರು, ಟ್ಯಾಕ್ಸಿ ಮೊದಲಾದ ಖಾಸಗಿ ಬಾಡಿಗೆ ವಾಹನಗಳ ಪೈಕಿ ಹೆಚ್ಚಿನವರು ಬೆಂಬಲ ವ್ಯಕ್ತಪಡಿಸಿದರು. ಸರಕಾರಿ ಬಸ್‌ ಓಡಾಟ ಸಹಜ ಸ್ಥಿತಿಯಲ್ಲಿತ್ತು. ರಾಷ್ಟ್ರೀಯ ಬ್ಯಾಂಕ್‌, ಸರಕಾರಿ ಕಚೇರಿ, ಸರಕಾರಿ ಮತ್ತು ಖಾಸಗಿ ಶಾಲೆಗಳು ಎಂದಿನಂತೆ ಕಾರ್ಯಾಚರಿಸಿದವು. ದೇವಸ್ಥಾನದ ಆಡಳಿತಕ್ಕೆ ಒಳಪಟ್ಟ ಶಿಕ್ಷಣ ಸಂಸ್ಥೆಗಳು ಮಧ್ಯಾಹ್ನದ ತನಕ ಕಾರ್ಯಾಚರಿಸಿದವು. ಮಧ್ಯಾಹ್ನ ಬಳಿಕ ಕೆಲವು ವಿದ್ಯಾರ್ಥಿಗಳು ರಜೆಯ ಮೇಲೆ ತೆರಳಿದರು.

ಗೊಂದಲ
ಬಂದ್‌ಗೆ ಅವಕಾಶ ನೀಡದಂತೆ ಮಠದ ಪರ ವಕೀಲರು ಉಚ್ಚ ನ್ಯಾಯಾಲಯದ ಮೆಟ್ಟಿಲೇರಿದ್ದರು. ಆದರೆ ನ್ಯಾಯಾಲಯವು ಬಂದ್‌ ತಡೆ ಬೇಡಿಕೆಯನ್ನು ನಿರಾಕರಿಸಿತ್ತು. ಬಲಾತ್ಕಾರದ ಬಂದ್‌ಗೆ ಅವಕಾಶ ನೀಡದಂತೆ ಸರಕಾರಕ್ಕೆ ಸೂಚಿಸಿತ್ತು. ಅದರಂತೆ ಶಾಂತಿಯುತ ಬಂದ್‌ ನಡೆಸಲು ಪೊಲೀಸರು ಅನುಮತಿ ನೀಡಿದ್ದರು. ಹೀಗಾಗಿ ಬುಧವಾರ ರಾತ್ರಿ ಯಿಂದ ಗೊಂದಲ ಏರ್ಪಟ್ಟಿತ್ತು. ಶಾಂತಿಯುತ ಬಂದ್‌ ನಡೆಸುವಂತೆ ಮತ್ತು ಸಾರ್ವಜನಿಕ ಆಸ್ತಿಪಾಸ್ತಿ ಗಳಿಗೆ ತೊಂದರೆ ಆಗಿ ಅಶಾಂತಿ ಸೃಷ್ಟಿಯಾದಲ್ಲಿ ಸಂಘಟಕರ ಮೇಲೆ ಕಾನೂನು ಕ್ರಮ ಜರಗಿಸುವ ಎಚ್ಚರಿಕೆಯನ್ನು ಬುಧವಾರ ರಾತ್ರಿಯೇ ಪೊಲೀಸರು ನೀಡಿದ್ದರು. ಮುಂಜಾಗ್ರತ ಕ್ರಮವಾಗಿ ಪೊಲೀಸ್‌ ಮತ್ತು ಗೃಹ ರಕ್ಷಕ ಸಿಬಂದಿಯನ್ನು ನಿಯೋಜಿಸಲಾಗಿತ್ತು.

ಮಠಕ್ಕೆ ಭದ್ರತೆ
ಸಂಪುಟ ಶ್ರೀ ಮಠ ಹಾಗೂ ಮಠದ ಆಡಳಿತದ ಹೊಟೇಲು, ಅಂಗಡಿಗಳಿಗೆ ಪೊಲೀಸ್‌ ಭದ್ರತೆ ಒದಗಿಸಲಾಗಿತ್ತು.