‘ಸರಕಾರಿ ಶಾಲೆಗಳಿಗಂಟಿದ್ದ ಕೊಳೆ ನಿವಾರಣೆಯಾಗುತ್ತಿದೆ’

Team Udayavani, May 30, 2019, 6:00 AM IST

ಶಾಲಾ ಪ್ರಾರಂಭೋತ್ಸವದಲ್ಲಿ ಹಾರಾಡಿ ಶಾಲೆಗೆ ಸೇರ್ಪಡೆಗೊಂಡ ವಿದ್ಯಾರ್ಥಿಗಳಿಗೆ ಆರತಿ ಬೆಳಗಿ, ತಿಲಕವನ್ನಿಟ್ಟು ಶಾಲೆಗೆ ಸ್ವಾಗತಿಸಲಾಯಿತು.

ಬಡಗನ್ನೂರು: ಸರಕಾರಿ ಶಾಲೆಗಳ ಮೇಲಿದ್ದ ಕೊಳೆ ನಿವಾರಣೆ ಯಾಗುವ ಕಾಲ ಕೂಡಿಬಂದಿದೆ. ರಾಜ್ಯ ಸರಕಾರ ಹೊಸದಾಗಿ ಎರಡು ವರ್ಷಗಳಿಂದ ಚಾಲ್ತಿಗೆ ತಂದಿರುವ ಕರ್ನಾಟಕ ಪಬ್ಲಿಕ್‌ ಸ್ಕೂಲ್ ಯೋಜನೆಯಿಂದ ಪೋಷಕರು ಸರಕಾರಿ ಶಾಲೆಗೆ ಹೆಜ್ಜೆ ಹಾಕುವಂತೆ ಮಾಡಿದೆ. ಸರಕಾರಿ ಶಾಲೆಗಳು ಉಳಿಯಬೇಕಾದರೆ ಜನರ ಸಹಭಾಗಿತ್ವ ಅಗತ್ಯ. ಶಾಲೆಗಳು ಗ್ರಾಮದ ಶ್ರದ್ಧಾ ಕೇಂದ್ರಗಳಾಗಬೇಕು ಎಂದು ಪುತ್ತೂರು ಶಾಸಕ ಸಂಜೀವ ಮಠಂದೂರು ಹೇಳಿದರು.

ಅವರು ಕುಂಬ್ರ ಸ.ಪ.ಪೂ. ಕಾಲೇಜಿನಲ್ಲಿ ಮೇ 29ರಂದು ಕರ್ನಾಟಕ ಪಬ್ಲಿಕ್‌ ಸ್ಕೂಲ್ ಅನ್ನು ಉದ್ಘಾಟಿಸಿ ಮಾತನಾಡಿದರು. ಕಳೆದ ಶೈಕ್ಷಣಿಕ ಅವಧಿಯಲ್ಲಿ ರಾಜ್ಯದಲ್ಲಿ ಬೆರಳೆಣಿಕೆಯಷ್ಟು ಪಬ್ಲಿಕ್‌ ಸ್ಕೂಲ್ ಅನ್ನು ಸರಕಾರ ಸಾಂಕೇತಿಕವಾಗಿ ಆರಂಭ ಮಾಡಿತ್ತು. ಅದು ಯಶಸ್ವಿಯಾದ ಕಾರಣ ಈ ಬಾರಿ ಎಲ್ಲ ತಾಲೂಕುಗಳಲ್ಲಿ ಪಬಿಕ್‌ ಸ್ಕೂಲ್ ಆರಂಭಿಸಲಾಗಿದೆ. ಆಂಗ್ಲ ಮಾಧ್ಯಮ ಎಲ್ಕೆಜಿಯಿಂದ ಶಿಕ್ಷಣ ಆರಂಭಗೊಳ್ಳುತ್ತದೆ. ಉತ್ತಮ ಬೇಡಿಕೆ ಇದ್ದು, ಮಕ್ಕಳ ದಾಖಲಾತಿಯಲ್ಲಿ ಗಣನೀಯ ಪ್ರಮಾಣದಲ್ಲಿ ಏರಿಕೆಯನ್ನು ಕಂಡಿದೆ. ಸರಕಾರಿ ಶಾಲೆಯನ್ನು ಉಳಿಸುವ ಜವಾಬ್ದಾರಿಯೂ ನಮ್ಮ ಮೇಲಿದೆ. ಆಂಗ್ಲ ಮಾಧ್ಯಮದ ಜತೆಗೆ ಕನ್ನಡ ಮಾಧ್ಯಮಕ್ಕೂ ಒತ್ತು ನೀಡುವಂತಾಗಬೇಕು ಎಂದು ಹೇಳಿದರು.

ಕುಂಬ್ರ ಸ.ಪ.ಪೂ. ಕಾಲೇಜಿನ ಕಾರ್ಯಾಧ್ಯಕ್ಷ ನಿತೀಶ್‌ ಕುಮಾರ್‌ ಶಾಂತಿವನ, ತಾ.ಪಂ. ಸ್ಥಾಯೀ ಸಮಿತಿ ಅಧ್ಯಕ್ಷ ಹರೀಶ್‌ ಬಿಜತ್ರೆ, ಕ್ಲಸ್ಟರ್‌ ಸಿಆರ್‌ಪಿ ಶಶಿಕಲಾ, ಉಪಪ್ರಾಂಶುಪಾಲೆ ಪೂರ್ಣಿಮಾ ಶೆಟ್ಟಿ, ಕುಂಬ್ರ ಶಾಲಾ ಎಸ್ಡಿಎಂಸಿ ಅಧ್ಯಕ್ಷ ವಸಂತ ಪೂಜಾರಿ ಉಪಸ್ಥಿತರಿದ್ದರು. ಕರ್ನಾಟಕ ಪಬ್ಲಿಕ್‌ ಸ್ಕೂಲ್ನ ಪ್ರಿನ್ಸಿಪಾಲ್ ದುಗ್ಗಪ್ಪ ಎನ್‌. ಪ್ರಸ್ತಾವಿಕ ಮಾತನಾಡಿದರು. ಕುಂಬ್ರ ಹಿ.ಪ್ರಾ. ಶಾಲೆ ಮುಖ್ಯ ಶಿಕ್ಷಕಿ ಗೋದಾವರಿ ಪಿ. ಸ್ವಾಗತಿಸಿದರು. ಉಪನ್ಯಾಸಕ ಶ್ರೀನಿವಾಸ್‌ ವಂದಿಸಿ, ಕಾರ್ಯಕ್ರಮ ನಿರೂಪಿಸಿದರು.

ಪರಿಮಿತಿ ಇಲ್ಲ
ಕನಿಷ್ಠ 30 ಮಕ್ಕಳು ಇರಬೇಕು ಎನ್ನುವುದು ಸರಕಾರದ ನಿಯಮ. ಆದರೆ ಎಲ್ಕೆಜಿಯಿಂದ 1ನೇ ತರಗತಿಗೆ ಎಷ್ಟೇ ಮಕ್ಕಳು ಬಂದರೂ ಅವರನ್ನು ದಾಖಲಾತಿ ಮಾಡಿಕೊಳ್ಳಬೇಕಾಗುತ್ತದೆ. ಒಂದನೇ ತರಗತಿಗೆ ಸರಕಾರ ಶಿಕ್ಷಕರನ್ನು ನೇಮಕ ಮಾಡುತ್ತದೆ. ಎಲ್ಕೆಜಿಗೆ ಪೋಷಕರೇ ಈ ಬಾರಿ ಶಿಕ್ಷಕರನ್ನು ನೇಮಿಸಿಕೊಳ್ಳಬೇಕಾಗುತ್ತದೆ. ಎಲ್ಲರೂ ಒಟ್ಟಾಗಿ ಈ ಕಾರ್ಯವನ್ನು ಮಾಡಿದರೆ ನಮ್ಮ ಮಕ್ಕಳಿಗೆ ಅದರಿಂದ ಪ್ರಯೋಜನವಾಗಲಿದೆ ಎಂದು ಶಾಸಕರು ಹೇಳಿದರು. ತರಗತಿ ಕೋಣೆಗಳ ಕೊರತೆ ಇದ್ದಲ್ಲಿ ಹೊಸ ಕೊಠಡಿಗಳನ್ನು ನಿರ್ಮಾಣ ಮಾಡಲಾಗುವುದು. ಶಾಲಾ ಪೋಷಕರ, ಹಳೆ ವಿದ್ಯಾರ್ಥಿಗಳು, ಎಸ್ಡಿಎಂಸಿ,ಊರಿನ ಸಂಘ ಸಂಸ್ಥೆಗಳನ್ನು ಜತೆಯಗಿ ಸೇರಿಸಿ ಶಾಲೆಯನ್ನು ಅಭಿವೃದ್ಧಿ ಮಾಡಲು ಚಿಂತನೆ ನಡೆಸಲಾಗಿದೆ ಎಂದು ಶಾಸಕ ಸಂಜೀವ ಮಠಂದೂರು ಹೇಳಿದರು.