ಇಂಧನ ಉಳಿತಾಯ ಉತ್ತೇಜಿಸಲು ಸೈಕಲ್‌ ರ‍್ಯಾಲಿ

Team Udayavani, Dec 18, 2017, 9:50 AM IST

ಮಹಾನಗರ: ಎಂಆರ್‌ ಪಿಎಲ್‌- ಒಎನ್‌ಜಿಸಿಯ ಇಂಧನ ಮತ್ತು ಅನಿಲ ಉಳಿತಾಯ ಮಾಸಾಚರಣೆ- ಸಕ್ಷಮ್‌ ಅಂಗವಾಗಿ ಮಂಗಳೂರು ಬೈಸಿಕಲ್‌ ಕ್ಲಬ್‌ ಸಹಯೋಗದಲ್ಲಿ ರವಿವಾರ ಸೈಕ್ಲೋ ಥೋನ್‌-ಸೈಕಲ್‌ ರ‍್ಯಾಲಿ ನಡೆಯಿತು. ಸಂಸದ ನಳಿನ್‌ ಕುಮಾರ್‌ ಕಟೀಲ್‌, ಶಾಸಕ ಜೆ.ಆರ್‌.ಲೋಬೋ ರ‍್ಯಾಲಿಗೆ ಹಸಿರು ನಿಶಾನೆ ತೋರಿ ಚಾಲನೆ ನೀಡಿದರು.

ಪೆಟ್ರೋಲಿಯಂ ಮತ್ತು ನೈಸರ್ಗಿಕ ಅನಿಲ ಸಚಿವಾಲಯ ಅಧೀನದ ಪೆಟ್ರೋಲಿಯಂ ಉಳಿತಾಯ ಸಂಶೋಧನ ಸಂಸ್ಥೆಯ ಉಪಕ್ರಮವಾಗಿ ದೇಶಾದ್ಯಂತ ನಡೆಯುತ್ತಿರುವ ಅಭಿಯಾನದ ಭಾಗವಾಗಿ ಇದನ್ನು ನಡೆಸಲಾಯಿತು. ಪೆಟ್ರೋಲಿಯಂ ಉತ್ಪನ್ನಗಳ ಉಳಿತಾಯ, ಮಿತಬಳಕೆಗೆ ಪ್ರೋತ್ಸಾಹಿಸಿ, ಸೈಕ್ಲಿಂಗ್‌ಗೆ ಹೆಚ್ಚಿನ ಉತ್ತೇಜನ ನೀಡುವ ಉದ್ದೇಶದಿಂದ ಈ ರ‍್ಯಾಲಿ ಹಮ್ಮಿಕೊಳ್ಳಲಾಗಿದ್ದು, ಮಕ್ಕಳೂ ಸೇರಿದಂತೆ ನೂರಾರು ಮಂದಿ ಪಾಲ್ಗೊಂಡರು.

ದೇಶದ 77 ನಗರಗಳಲ್ಲಿ ಈ ರೀತಿ ಸೈಕಲ್‌ ರ‍್ಯಾಲಿ ಹಮ್ಮಿಕೊಳ್ಳಲಾಗಿತ್ತು. ಮಂಗಳೂರಿನ ಸೈಕಲ್‌ ಯಾತ್ರೆಗೆ ಭಾರತ್‌ ಸ್ಕೌಟ್ಸ್‌ ಮತ್ತು ಗೈಡ್‌ ಸಂಸ್ಥೆ ಸಹಯೋಗ ನೀಡಿದ್ದು, 250ರಷ್ಟು ಮಕ್ಕಳು, 35ರಷ್ಟು ಎಂಬಿಸಿ ಸೈಕ್ಲಿಸ್ಟ್‌ಗಳು, ಎಂಆರ್‌ಪಿಎಲ್‌ ಉದ್ಯೋಗಿಗಳು, ಶಾಲಾ ವಿದ್ಯಾರ್ಥಿಗಳೂ ಪಾಲ್ಗೊಂಡರು.