Mulki: ಮಾದಕ ವಸ್ತು ತಡೆ-88 ಪ್ರಕರಣ: 6.80 ಕೋಟಿ ರೂ. ಮೌಲ್ಯದ ವಸ್ತು ನಾಶ: ಕಮಿಷನರ್‌

Team Udayavani, Jan 15, 2025, 11:58 PM IST

ಮೂಲ್ಕಿ: ಮಂಗಳೂರು ಪೊಲೀಸ್‌ ಕಮಿಷನರೇಟ್‌ ವ್ಯಾಪ್ತಿಯಲ್ಲಿ ಮಾದಕ ವಸ್ತುಗಳ ಮಾರಾಟ ಮತ್ತು ಸೇವನೆ ಹಾಗೂ ಸಾಗಾಟಕ್ಕೆ ಸಂಬಂಧಿಸಿ ವಿವಿಧ ಠಾಣಾ ವ್ಯಾಪ್ತಿಯಲ್ಲಿ ಕಾರ್ಯಾಚರಣೆ ನಡೆಸಿ ಒಟ್ಟು 88 ಪ್ರಕರಣಗಳಲ್ಲಿ 37 ಪ್ರಕರಣಗಳಿಗೆ ಸಂಬಂಧಿಸಿದ 6.80 ಕೋಟಿ ರೂ. ಮೌಲ್ಯದ ಮಾದಕ ವಸ್ತುಗಳನ್ನು ನ್ಯಾಯಾಲಯದ ಅನುಮತಿ ಪಡೆದು ಮೂಲ್ಕಿಯ ಕೊಲಾ°ಡು ರೀಸಸ್‌ಸ್ಟೆಬಿಲಿಟಿ ಹೆಲ್ತ್‌ಕೇರ್‌ ಸೊಲ್ಯೂಶನ್ಸ್‌ನಲ್ಲಿ ಸುಟ್ಟು ನಾಶಪಡಿಸಲಾಗಿದೆ ಎಂದು ಕಮಿಷನರ್‌ ಅನುಪಮ್‌ ಅಗರ್‌ವಾಲ್‌ ತಿಳಿಸಿದರು.

ಅವರು ಮೂಲ್ಕಿಯಲ್ಲಿ ಕಮೀಷನರ್‌ ವ್ಯಾಪ್ತಿಯ 13 ಠಾಣೆಗಳ ವಿವಿಧ ಪ್ರಕರಣಗಳಲ್ಲಿ ವಶಪಡಿಸಿಕೊಂಡ ಮಾದಕ ವಸ್ತುಗಳ ನಾಶಪಡಿಸುವ ಕಾರ್ಯಕ್ರಮದ ಮೊದಲು ಮಾಹಿತಿ ನೀಡಿದರು. ಮಾದಕ ವಸ್ತುಗಳ ಸೇವನೆಯ ಕುರಿತು 2024ರಲ್ಲಿ 1,026 ಮಂದಿಯ ಮೇಲೆ ಪ್ರಕರಣಗಳನ್ನು ದಾಖಲಿಸಲಾಗಿದ್ದು, 2025ನೇ ಸಾಲಿನಲ್ಲಿ 25 ಮಂದಿಯ ಮೇಲೆ ಪ್ರಕರಣಗಳನ್ನು ದಾಖಲಿಸಲಾಗಿದೆ.

ಮಂಗಳೂರು ನಗರ ವ್ಯಾಪ್ತಿಯ 13 ಠಾಣೆಗಳಿಗೆ ಸಂಬಂಧಿಸಿ ವಿಲೇವಾರಿ ಮಾಡಲಾಗಿರುವ ಮಾದಕ ವಸ್ತುಗಳಲ್ಲಿ ಗಾಂಜಾ 335 ಕಿಲೋ 460 ಗ್ರಾಂ ಮೌಲ್ಯ 75,00,508 ರೂ. ಹಾಗೂ ಎಂಡಿಎಂಎ 7 ಕಿಲೋ 640 ಗ್ರಾಂ ಮೌಲ್ಯ 6,03,65,050 ರೂ. ಮತ್ತು ಕೊಕೇನ್‌ 16 ಗ್ರಾಂ ಆಗಿದೆ ಎಂದರು.

ಹಂತ-ಹಂತವಾಗಿ ಬಂಧನ
ವೀಸಾ ಅವಧಿ ಮುಗಿದಿದ್ದರೂ ಅನಾವಶ್ಯಕವಾಗಿ ನಮ್ಮ ದೇಶದಲ್ಲಿ ನೆಲೆಸಿರುವ ವಿವಿಧ ದೇಶಗಳ ಪ್ರಜೆಗಳು ಕೂಡ ಮಾದಕ ವಸ್ತು ದಂಧೆಯಲ್ಲಿ ತೊಡಗಿಕೊಂಡಿದ್ದಾರೆ. ಅವರ ಬಂಧನ ಕಾರ್ಯ ಹಂತ-ಹಂತವಾಗಿ ನಡೆಯುತ್ತಿದೆ ಎಂದರು.