ಭೋರ್ಗರೆಯುತ್ತಿರುವ ನೇತ್ರಾವತಿ : ಹತ್ತು ಮೀಟರ್ ಅಪಾಯದ ಮಟ್ಟದಲ್ಲಿ ಜೀವನದಿ

Team Udayavani, Aug 9, 2019, 8:29 PM IST

ಬಂಟ್ವಾಳ : ಪಶ್ಚಿಮ ಘಟ್ಟದ ವಿವಿಧ ಕಡೆಗಳಲ್ಲಿ ಭಾರೀ ಮಳೆಯಾಗುತ್ತಿರುವ ಕಾರಣ ನೇತ್ರಾವತಿ ಮತ್ತು ಕುಮಾರಾಧಾರ ನದಿಗಳಿಗೆ ಭಾರೀ ಪ್ರಮಾಣದಲ್ಲಿ ನೀರು ಹರಿದುಬರುತ್ತಿರುವ ಕಾರಣ ದಕ್ಷಿಣ ಕನ್ನಡ ಜಿಲ್ಲೆಯಾದ್ಯಂತ ನೇತ್ರಾವತಿ ನದಿ ಉಕ್ಕಿ ಹರಿಯುತ್ತಿದ್ದು. ಹಲವು ಕಡೆಗಳಲ್ಲಿ ನೆರೆ ಪರಿಸ್ಥಿತಿ ಎದುರಾಗಿದೆ. ಬಂಟ್ವಾಳದ ಕಂಚಿಕಾರಪೇಟೆ ಎಂಬಲ್ಲಿರುವ ನೇತ್ರಾವತಿ ನದಿ ನೀರು ಮಟ್ಟ ಮಾಪಕದಲ್ಲಿ ಪ್ರಸ್ತುತ ನೀರಿನ ಮಟ್ಟ 10 ಮೀಟರ್ ಗಳನ್ನು ದಾಟಿದ್ದು, ಇತ್ತೀಚಿನ ವರ್ಷಗಳಲ್ಲಿ ಇದು ದಾಖಲೆಯ ಮಟ್ಟ ಎನ್ನಲಾಗುತ್ತಿದೆ.

ಕರಾವಳಿಯ ಜೀವನಾಡಿಯಂತಿರುವ ಎರಡೂ ನದಿಗಳು ಉಕ್ಕಿ ಹರಿದ ಕಾರಣ ಶುಕ್ರವಾರ ರಾತ್ರಿ ಹೊತ್ತಿಗೆ ಉಪ್ಪಿನಂಗಡಿ ಸಹಸ್ರಲಿಂಗೇಶ್ವರ ದೇವಸ್ಥಾನದಲ್ಲಿ ನೇತ್ರಾವತಿ – ಕುಮಾರಧಾರ ನದಿಗಳ ಸಂಗಮವಾಗಿದೆ.

ಚಾರ್ಮಾಡಿ, ಮುಂಡಾಜೆ, ನಿಡ್ಗಳ್, ಧರ್ಮಸ್ಥಳ, ಉಪ್ಪಿನಂಗಡಿ, ಬಂಟ್ವಾಳ ಸೇರಿದಂತೆ ನೇತ್ರಾವತಿ ನದಿ ಪಾತ್ರಗಳಲ್ಲಿ ಪ್ರವಾಹ ಪರಿಸ್ಥಿತಿ ಎದುರಾಗಿದೆ. ಧರ್ಮಸ್ಥಳದ ದೊಂಡೊಲೆ ಎಂಬಲ್ಲಿ ಪವರ್ ಪ್ರಾಜೆಕ್ಟ್ ಉದ್ದೇಶದಿಂದ ಕಟ್ಟಲಾಗಿದ್ದ ಕಿರು ಆಣೆಕಟ್ಟು ಸಂಪೂರ್ಣ ಜಲಾವೃತಗೊಂಡಿದೆ.

ಕಲ್ಮಂಜದಲ್ಲಿರುವ ಪಜಿರಡ್ಕ ಸಂಗಮ ಕ್ಷೇತ್ರಕ್ಕೆ ನೀರು ನುಗ್ಗಿದೆ. ಉಪ್ಪಿನಂಗಡಿ ಸಂಗಮ ಕ್ಷೇತ್ರದಲ್ಲೂ ನೆರೆ ನೀರಿನ ಮಟ್ಟ ಕ್ಷಣಕ್ಷಣಕ್ಕೂ ಏರುತ್ತಿದೆ. ಇನ್ನು ಕುಮಾರಾಧಾರಾ ನದಿಯ ಉಪನದಿ ಕೆಂಪುಹೊಳೆ ಉಕ್ಕಿ ಹರಿಯುತ್ತಿರುವ ಕಾರಣ ಉದನೆ, ನೇಲ್ಯಡ್ಕಭಾಗಗಳಲ್ಲಿ ರಾಷ್ಟ್ರೀಯ ಹೆದ್ದಾರಿಗೆ ನೀರು ನುಗ್ಗಿ ವಾಹನ ಸಂಚಾರ ಸ್ಥಗಿತಗೊಂಡಿದೆ. ಇನ್ನು ವಳಾಲು ಎಂಬಲ್ಲಿ ನೇತ್ರಾವತಿ ನೀರು ಮಂಗಳೂರು ಬೆಂಗಳೂರು ಹೆದ್ದಾರಿಗೆ ನೆರೆ ನೀರು ನುಗ್ಗಿದೆ.

ಇನ್ನು ಚಾರ್ಮಾಡಿಯಲ್ಲಿ 50ಕ್ಕೂ ಹೆಚ್ಚು ಮನೆಗಳು ಜಲಾವೃತಗೊಂಡಿವೆ. ನೇತ್ರಾವತಿಯ ಹರಿವಿನ ರಭಸವನ್ನು ತಾಳಲಾರದೆ ದಿಡುಪೆ ಸಂಪರ್ಕ ಸೇತುವೆ ಕೊಚ್ಚಿ ಹೋಗಿದೆ. ಮನೆಗಳು ಮತ್ತು ಅಡಿಕೆ ಮರಗಳು ಕಣ್ಣೆದುರೇ ಧರೆಗುರುಳುತ್ತಿವೆ. ಪರಿಹಾರ ಮತ್ತು ರಕ್ಷಣಾ ಕಾರ್ಯಾಚರಣೆಗೂ ಅವಕಾಶ ನೀಡದೆ ಹರಿಯುತ್ತಿದೆ ನೆರೆ ನೀರು.

ತಗ್ಗು ಪ್ರದೇಶದಲ್ಲಿರುವವರು ತಕ್ಷಣವೇ ಸುರಕ್ಷಿತ ಪ್ರದೇಶಗಳಿಗೆ ತೆರಳಬೇಕೆಂದು ದಕ್ಷಿಣ ಕನ್ನಡ ಜಿಲ್ಲಾಧಿಕಾರಿಯವರು ಆದೇಶ ಹೊರಡಿಸಿದ್ದಾರೆ. ನೇತ್ರಾವತಿ ನದೀಪಾತ್ರದಲ್ಲಿ ಮೈಕ್ ಮೂಲಕವೂ ಸ್ಥಳೀಯರಿಗೆ ನೆರೆ ಪರಿಸ್ಥಿತಿಯ ಕುರಿತು ಹಾಗೂ ಮುಂಜಾಗರುಕತಾ ಸೂಚನೆಗಳನ್ನು ನೀಡಲಾಗುತ್ತಿದೆ.

ಶಂಭೂರು ಎ.ಎಂ.ಆರ್. ಆಣೆಕಟ್ಟು ಸಂಪೂರ್ಣ ತುಂಬಿದ್ದು ಅಪಾಯದ ಕರೆಗಂಟೆಯನ್ನು ಆಣೆಕಟ್ಟು ಬಳಿಯ ನಿವಾಸಿಗಳಿಗೆ ಮೊಳಗಿಸಲಾಗಿದೆ. ಹೆಚ್ಚುವರಿ ನೀರನ್ನು 14 ಗೇಟುಗಳ ಮೂಲಕ ಹೊರಬಿಡಲಾಗುತ್ತಿದೆ. ಇನ್ನು ತುಂಬೆಯಲ್ಲಿರುವ ಆಣೆಕಟ್ಟಿನಲ್ಲೂ ಸಹ 30 ಗೇಟುಗಳ ಮೂಲಕ ನೀರನ್ನು ಹೊರಬಿಡಲಾಗುತ್ತಿದೆ.

ಅಜಿಲಮೊಗರುವಿನಲ್ಲಿ ನೇತ್ರಾವತಿ ನದಿಯಿಂದ ಉಂಟಾಗಿರುವ ನೆರೆ ಪರಿಸ್ಥಿತಿಯನ್ನು ಬಂಟ್ವಾಳ ಕ್ಷೇತ್ರದ ಶಾಸಕ ರಾಜೇಶ್ ನಾಯ್ಕ್ ಅವರು ಭೇಟಿ ನೀಡಿ ಅಲ್ಲಿನ ನಿವಾಸಿಗಳನ್ನು ಸುರಕ್ಷಿತ ಪ್ರದೇಶಗಳಿಗೆ ಕರೆದೊಯ್ಯಲು ಅಧಿಕಾರಿಗಳಿಗೆ ಸೂಕ್ತ ಸಲಹೆ ಸೂಚನೆ ನೀಡಿದ್ದಾರೆ. ಇನ್ನು ಮಾಜೀ ಶಾಸಕ ರಮಾನಾಥ್ ರೈ ಅವರೂ ಸಹ ಬಂಟ್ವಾಳದ ಬಡ್ಡಕಟ್ಟೆ, ಜಕ್ರಿಬೆಟ್ಟು ಪ್ರವಾಹ ಪೀಡಿತ ಪ್ರದೇಶಗಳಿಗೆ ಭೇಟಿ ನೀಡಿ ಪರಿಸ್ಥಿತಿಯ ಅವಲೋಕನ ನಡೆಸಿದ್ದಾರೆ. ಯಾವುದೇ ಪರಿಸ್ಥಿತಿಯನ್ನು ಎದುರಿಸಲು ದಕ್ಷಿಣ ಕನ್ನಡ ಜಿಲ್ಲಾಡಳಿತ ಸಂಪೂರ್ಣ ಸಿದ್ಧತೆಯನ್ನು ಮಾಡಿಕೊಂಡಿದೆ.

ಒಟ್ಟಿನಲ್ಲಿ ಕಳೆದ ಬೇಸಗೆಯಲ್ಲಿ ಸಂಪೂರ್ಣ ಸೊರಗಿ ಹೋಗಿದ್ದ ಜೀವನದಿ ನೇತ್ರಾವತಿ ಬಳಿಕ ಮಳೆಗಾಲ ಪ್ರಾರಂಭವಾದರೂ ಜುಲೈವರೆಗೆ ಮೈದುಂಬಿರಲಿಲ್ಲ. ಆದರೆ ಕಳೆದ ಕೆಲವು ದಿನಗಳಿಂದ ಮಳೆಯ ಆರ್ಭಟ ಜೋರಾಗಿರುವುದರಿಂದ ನೇತ್ರಾವತಿ ಮೈದುಂಬಿಕೊಂಡಿರುವುದು ಮಾತ್ರವಲ್ಲದೇ ತನ್ನ ಇಕ್ಕೆಲಗಳಲ್ಲಿ ನೆರೆ ಪರಿಸ್ಥಿತಿಯನ್ನೂ ತಂದೊಡ್ಡಿದ್ದಾಳೆ.

ಸಚಿತ್ರ ಮಾಹಿತಿ: ಕಿರಣ್ ಸರಪಾಡಿ, ಚೈತ್ರೇಶ್