ಉದಯವಾಣಿ ಭೇಟಿಯಿಂದ ಎಚ್ಚೆತ್ತ ಪಂಚಾಯತ್‌: ಕಸ ತೆರವು

Team Udayavani, Dec 9, 2017, 11:54 AM IST

ಎಡಪದವು: ತೆಂಕ ಎಡಪದವು ಗ್ರಾಮದ ಟೆಂಪೊ ಪಾರ್ಕ್‌ ಬಳಿಯ ತೋಡಿನಲ್ಲಿ ತುಂಬಿದ್ದ ತ್ಯಾಜ್ಯವನ್ನು ಎಡಪದವು ಗ್ರಾಮ ಪಂಚಾಯತ್‌ ತೆರವುಗೊಳಿಸಿದ್ದು, ಟೆಂಪೋ ಚಾಲಕ-ಮಾಲಕರು ಹಾಗೂ ಸ್ಥಳೀಯರಿಗೆ ಕೊಂಚ ರಿಲೀಫ್ ಸಿಕ್ಕಂತಾಗಿದೆ.

ತೆಂಕ ಎಡಪದವು ಗ್ರಾಮದ ಟೆಂಪೋ ಪಾರ್ಕ್‌ ಬಳಿ ತೋಡಿನಲ್ಲಿ ತ್ಯಾಜ್ಯ ರಾಶಿ ಬಿದ್ದು ದುರ್ವಾಸನೆ ಬೀರುತ್ತಿತ್ತು. ಹಲವು ತಿಂಗಳಿಂದ ಈ ಸಮಸ್ಯೆಯಿದ್ದರೂ ಗ್ರಾ.ಪಂ. ಸ್ಪಂದಿಸಿರಲಿಲ್ಲ. ಈ ಬಗ್ಗೆ ಗ್ರಾ.ಪಂ. ಆಡಳಿತ ಹಾಗೂ ಪೊಲೀಸ್‌ ಠಾಣೆಗೆ ದೂರು ನೀಡಿದರೂ ಕಸ ಬೀಳುವುದು ತಪ್ಪಲಿಲ್ಲ. ಇದರಿಂದ ಬೇಸತ್ತ ಟೆಂಪೋ ಚಾಲಕ- ಮಾಲಕರು “ಉದಯವಾಣಿ’ಗೆ ಕರೆ ಮಾಡಿದ್ದರು.

ಪ್ರತಿನಿಧಿ ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲಿಸಿದ್ದಲ್ಲದೆ, ಸ್ಥಳೀಯರ ಅಭಿಪ್ರಾಯ ಸಂಗ್ರಹಿಸಿರುವುದನ್ನು ಅರಿತ ಗ್ರಾ.ಪಂ. ಆಡಳಿತ ಮಧ್ಯಾಹ್ನವೇ ಜೆಸಿಬಿ ತರಿಸಿ ತುರ್ತಾಗಿ ಕಸ ತೆರವು ಮಾಡಿದೆ.

ಸತ್ತ ಪ್ರಾಣಿಗಳನ್ನೂ ಹಾಕುತ್ತಿದ್ದರು
ಕಸದ ಜತೆಗೆ ಸತ್ತ ನಾಯಿ, ಬೆಕ್ಕು, ಇಲಿ, ಹೆಗ್ಗಳ, ಕೋಳಿ ಹಾಗೂ ಮೀನಿನ ತ್ಯಾಜ್ಯವನ್ನೂ ಎಸೆಯುತ್ತಿದ್ದರು. ಇದು ದುರ್ವಾಸನೆ ಬೀರುತ್ತಿದ್ದು, ಉಸಿರುಗಟ್ಟಿದಂತೆ ಆಗುತ್ತಿತ್ತು ಎಂದು ಟೆಂಪೋ ಚಾಲಕ-ಮಾಲಕರು ವಿವರಿಸಿದರು. ಪೊಲೀಸ್‌ ಠಾಣೆಗೆ ನೀಡಿದ ದೂರಿನ ಯಥಾಪ್ರತಿಯನ್ನೂ ತೋರಿಸಿದರು. ಈ ಕುರಿತು ಎಡಪದವು ಗ್ರಾ.ಪಂ. ಮ ಪಂಚಾಯತ್‌ ಅಭಿವೃದ್ಧಿ ಅಧಿಕಾರಿ ಭೋಗಮಲ್ಲಣ್ಣ ಅವರನ್ನು ದೂರವಾಣಿಯಲ್ಲಿ ವಿಚಾರಿಸಿದಾಗ, ತಕ್ಷಣವೇ ಕಸ ತೆರವು ಮಾಡಿಸುವುದಾಗಿ ಹೇಳಿ, ಜೆಸಿಬಿ ತರಿಸಿದರು. ಉದಯವಾಣಿ’ಯ ಸಕಾಲಿಕ ಸ್ಪಂದನೆಯಿಂದ ಸಮಸ್ಯೆ ಬಗೆಹರಿದಿರುವುದಕ್ಕೆ ಟೆಂಪೋ ಚಾಲಕ – ಮಾಲಕರು ಕೃತಜ್ಞತೆ ಸಲ್ಲಿಸಿದ್ದಾರೆ. ಮುಂದೆ ಈ ಸ್ಥಳವನ್ನು ಸ್ವಚ್ಛವಾಗಿಡುವುದಕ್ಕೆ ಗ್ರಾ.ಪಂ. ಕಾಳಜಿ ವಹಿಸಬೇಕು, ಸಾರ್ವಜನಿಕರೂ ಸಹಕರಿಸಬೇಕು ಎಂದು ಮನವಿ ಮಾಡಿದ್ದಾರೆ.