ಪೊಲೀಸ್‌ ಠಾಣೆ ಎದುರು ಜಮಾಯಿಸಿದ ಜನ

Team Udayavani, Oct 9, 2017, 12:37 PM IST

ಬೆಳ್ತಂಗಡಿ: ಅನ್ಯಧರ್ಮದ ಯುವತಿ ಹಿಂದೂ ಯುವಕ ಪ್ರೀತಿಸಿ ಓಡಿ ಹೋಗುತ್ತಿದ್ದಾಗ ಪೊಲೀಸರ ಕ್ಷಿಪ್ರ ಕಾರ್ಯಾಚರಣೆಯಲ್ಲಿ ಸೆರೆಯಾದರು. ಈ ಪ್ರಕರಣದಲ್ಲಿ ಎರಡೂ ಧರ್ಮದ ನೂರಾರು ಯುವಕರು ಠಾಣೆ ಮುಂದೆ ಜಮಾಯಿಸಿದ ಘಟನೆ ರವಿವಾರ ನಡೆದಿದೆ.

ತಾಲೂಕಿನ ಮಂಜೊಟ್ಟಿ ನಿವಾಸಿ 19ರ ಯುವಕ ಹಾಗೂ ನಾವೂರು ನಿವಾಸಿ 20ರ ಹರೆಯದ ಯುವತಿ ಕಳೆದ ಐದು ವರ್ಷಗಳಿಂದ ಪರಸ್ಪರ ಪ್ರೀತಿಸುತ್ತಿದ್ದರು. ಯುವಕ ಬೆಂಗಳೂರಿನಲ್ಲಿ ಉದ್ಯೋಗದಲ್ಲಿದ್ದ. ಯುವತಿ ಕಾಲೇಜು ವಿದ್ಯಾಭ್ಯಾಸ ನಡೆಸುತ್ತಿದ್ದ. 

ಇದೀಗ ಕಾಲೇಜು ವ್ಯಾಸಂಗ ಮುಗಿದಿದ್ದು ಪ್ರೀತಿ ವಿಚಾರ ಮನೆಯವರಿಗೆ ತಿಳಿದಿದ್ದ ಕಾರಣ ಈಕೆಯ ಕುರಿತು ಜಾಗರೂಕತೆ ನಡೆಸುತ್ತಿದ್ದರು. ಆದರೆ ಶನಿವಾರ ಯುವಕನ ಸ್ನೇಹಿತರ ಸಹಾಯದಿಂದ ಯುವತಿ ಮನೆಯಿಂದ ಪರಾರಿಯಾಗಿದ್ದಾಳೆ. ಮನೆಯವರು ಪೊಲೀಸರಿಗೆ ಅಪಹರಣ ದೂರು ನೀಡಿದ್ದಾರೆ. ಪೊಲೀಸರು ಮೊಬೈಲ್‌ ಲೊಕೇಶನ್‌ ಪತ್ತೆ ಮಾಡಿದಾಗ ಹಾಸನದಲ್ಲಿ ತೆರಳುತ್ತಿರುವುದು ತಿಳಿಯಿತು.

ತತ್‌ಕ್ಷಣ ಹಾಸನ ಪೊಲೀಸರ ನೆರವಿನಿಂದ ಇವರು ಹೋಗುತ್ತಿದ್ದ ಕಾರನ್ನು ಪತ್ತೆ ಹಚ್ಚಲಾಯಿತು. ರವಿವಾರ ಬೆಳ್ತಂಗಡಿ ಠಾಣೆಗೆ ಇಬ್ಬರನ್ನು ಕರೆ ತರಲಾಯಿತು. ಈ ಸಂದರ್ಭ ಠಾಣೆಯ ಸುತ್ತ ಎರಡೂ ಕಡೆಯವರು ಜಮಾಯಿಸಿದರು. ಬಿಜೆಪಿ ಜಿಲ್ಲಾ ಯುವಮೋರ್ಚಾ ಅಧ್ಯಕ್ಷ ಹರೀಶ್‌ ಪೂಂಜಾ ಹಾಗೂ ಎಸ್‌ಡಿಪಿಐ ಮುಖಂಡ ಅಕºರ್‌ ಬೆಳ್ತಂಗಡಿ ಆಗಮಿಸಿ ಉದ್ವಿಗ್ನ ಸ್ಥಿತಿಗೆ ತೆರಳುವ ಸಾಧ್ಯತೆಯಿದ್ದ ಎರಡೂ ಪಂಗಡದವರನ್ನು ಸಮಾಧಾನಪಡಿಸಿದ‌ರು. ನಾವು ಸ್ವ ಇಚ್ಛೆಯಿಂದ ಬೆಂಗಳೂರಿಗೆ ಹೋಗುತ್ತಿದ್ದು ಅಪಹರಣವಲ್ಲ. ಕಳೆದ ಐದು ವರ್ಷಗಳಿಂದ ಪ್ರೀತಿಸುತ್ತಿದ್ದೇವೆ ಎಂದು ಹೇಳಿಕೆ ನೀಡಿದ ಅವರಿಂದ ಮುಚ್ಚಳಿಕೆ ಬರೆಸಿಕೊಂಡು ಇಬ್ಬರನ್ನೂ ಅವರವರ ಮನೆಯವರ ಜತೆಗೆ ಕಳುಹಿಸಲಾಯಿತು.