ದೀಪಕ್‌ ರಾವ್‌ ಕೊಲೆ ಪ್ರಕರಣ: ಮತ್ತೆ ಇಬ್ಬರ ಬಂಧನ 

Team Udayavani, Jan 16, 2018, 11:15 AM IST

ಮಂಗಳೂರು: ಕಾಟಿಪಳ್ಳದ  ದೀಪಕ್‌ ರಾವ್‌ ಕೊಲೆ ಪ್ರಕರಣಕ್ಕೆ ಸಂಬಂಧಿಸಿ ಪಣಂಬೂರು ಮತ್ತು ಸಿಸಿಬಿ ಪೊಲೀಸರು ಮತ್ತಿಬ್ಬರನ್ನು ಬಂಧಿಸಿದ್ದಾರೆ.  ಕಾಟಿಪಳ್ಳ 2ನೇ ಬ್ಲಾಕ್‌ನ ನಿವಾಸಿ ಗಳಾದ ಅಬ್ದುಲ್‌ ಅಜೀಜ್‌ ಯಾನೆ ಅಜೀಜ್‌ (42) ಮತ್ತು ಅಬ್ದುಲ್‌ ಅಜೀಂ ಯಾನೆ ಅಜೀಂ (34) ಬಂಧಿ ತರು. ಇದರೊಂದಿಗೆ ಈ ಪ್ರಕರಣದಲ್ಲಿ ಬಂಧಿತರಾದವರ ಸಂಖ್ಯೆ 6 ಕ್ಕೆರಿದೆ. 

ಅಜೀಜ್‌  ಪ್ರಕರಣದ ಪ್ರಮುಖ ಸೂತ್ರಧಾರಿಯಾಗಿದ್ದು, ಆಯುಧ ಗಳನ್ನು ಪೂರೈಸಿದ್ದ.  ಅಜೀಂ ಆರೋಪಿ ಗಳು ಪರಾರಿಯಾಗಲು ಅನುಕೂಲ ವಾಗುವಂತೆ ರಸ್ತೆ  ಮಾಹಿತಿ ಹಾಗೂ ವಾಹನಗಳ ವ್ಯವಸ್ಥೆ ಮಾಡಿಕೊಟ್ಟಿದ್ದ  ಎಂಬ ಸಂಗತಿ ವಿಚಾರಣೆ ವೇಳೆ ಗೊತ್ತಾಗಿದೆ ಎಂದು ಮೂಲಗಳು ತಿಳಿಸಿವೆ. ಆರೋಪಿಗಳ ವಿಚಾರಣೆಯ ವೇಳೆ ಈ ಕೃತ್ಯದಲ್ಲಿ ಮತ್ತಷ್ಟು ಮಂದಿ ಶಾಮೀಲಾಗಿರುವ ಬಗ್ಗೆ ಮಾಹಿತಿ ಲಭಿಸಿದ್ದು, ಪೊಲೀ ಸರು ತನಿಖೆಯನ್ನು ಮತ್ತಷ್ಟು ತೀವ್ರಗೊಳಿಸಿದ್ದಾರೆ.

ಈ ಪ್ರಕರಣದಲ್ಲಿ ಈಗಾಗಲೇ ಮೊಹಮದ್‌ ನೌಶಾದ್‌, ಮೊಹಮದ್‌ ಇಶಾìನ್‌ ಯಾನೆ ಇಶಾì, ಮೊಹಮದ್‌ ನವಾಜ್‌ ಯಾನೆ ಪಿಂಕಿ ನವಾಜ್‌ ಮತ್ತು ರಿಜ್ವಾನ್‌ಯಾನೆ ಇಜ್ಜು  ಯಾನೆ ರಿಜ್ಜು ಅವರನ್ನು  ಕೊಲೆ ಕೃತ್ಯ ನಡೆದ ದಿನದಂದೇ (ಜ. 3) ರಾತ್ರಿ ಬಂಧಿಸಲಾಗಿತ್ತು. 

ಅವರಲ್ಲಿ  ಪಿಂಕಿ ನವಾಜ್‌ ಮತ್ತು ರಿಜ್ವಾನ್‌ ಅವರ ಕಾಲುಗಳಿಗೆ ಕಾರ್ಯಾಚರಣೆ  ವೇಳೆ ಗುಂಡು ತಗುಲಿದ್ದರಿಂದ ಆಸ್ಪತ್ರೆಗೆ ದಾಖಲಾಗಿದ್ದು, ಈಗಲೂ ಚಿಕಿತ್ಸೆ ಪಡೆಯುತ್ತಿದ್ದಾರೆ.
ಮೊದಲು ಬಂಧಿತರಾದವರು ವಿಚಾರಣೆ  ವೇಳೆ  ನೀಡಿದ ಮಾಹಿತಿ ಹಿನ್ನೆಲೆಯಲ್ಲಿ  ಸೋಮವಾರ ಮತ್ತಿಬ್ಬರನ್ನು  ಬಂಧಿಸಲಾಗಿದೆ. 

ಪಣಂಬೂರು ಪೊಲೀಸ್‌ ಠಾಣೆಯ ಇನ್ಸ್‌ಪೆಕ್ಟರ್‌ ರಫೀಕ್‌ ಮತ್ತು ಸಿಬಂದಿ ಹಾಗೂ ಸಿಸಿಬಿ ಘಟಕದ ಪೊಲೀಸ್‌ ಇನ್ಸ್‌ಪೆಕ್ಟರ್‌ ಶಾಂತಾರಾಮ ಮತ್ತು ಸಿಬಂದಿ ಕಾರ್ಯಾಚರಣೆ ನಡೆಸಿ ಆರೋಪಿಗಳನ್ನು ಬಂಧಿಸಿದ್ದಾರೆ.