ಹರೇಕಳ ಹಾಜಬ್ಬರ ಶಾಲೆಗೆ ದತ್ತಿನಿಧಿ ಪ್ರದಾನ

Team Udayavani, May 3, 2018, 10:11 AM IST

ಮಹಾನಗರ: ‘ಹಾಜಬ್ಬರಶಾಲೆ’ ಎಂದೇ ಹೆಸರಾಗಿರುವ ಹರೇಕಳ ನ್ಯೂ ಪಡ್ಪು ಜಿಲ್ಲಾ ಪಂಚಾಯತ್‌ ಸಂಯುಕ್ತ ಪ್ರೌಢಶಾಲೆಗೆ ಕೊಟ್ಟಾಯಂ ಜಿಲ್ಲೆಯ ಪಾಲ ಸೈಂಟ್‌ ತೋಮಸ್‌ ಹೈಯರ್‌ ಸೆಕಂಡರಿ ಶಾಲೆ ರೂ.15,000 ಮೊತ್ತದ ದತ್ತಿನಿಧಿಯನ್ನು ಒದಗಿಸಲಿದೆ.

ನ್ಯೂ ಪಡ್ಪು ಶಾಲೆಯಲ್ಲಿ ಬುಧವಾರ ಜರಗಿದ ಎರಡು ದಿನಗಳ ಸಾಂಸೃತಿಕ ವಿನಿಮಯ ಕಾರ್ಯಕ್ರಮದ ಉದ್ಘಾಟನಾ ಸಮಾರಂಭದಲ್ಲಿ ಸೈಂಟ್‌ ತೋಮಸ್‌ ಹೈಯರ್‌ ಸೆಕಂಡರಿ ಶಾಲೆಯ ಪ್ರಾಂಶುಪಾಲ ಮ್ಯಾಥ್ಯೂ ಎಂ.ಕುರಿಯೊಕೋಸ್‌ ದತ್ತಿ ನಿಧಿಯನ್ನು ಪ್ರಕಟಿಸಿದರು.

ಎಸೆಸೆಲ್ಸಿಯ ಅಂತಿಮ ಪರೀಕ್ಷೆ ಯಲ್ಲಿ ಆಂಗ್ಲ ಭಾಷೆಯಲ್ಲಿ ಅತ್ಯಧಿಕ ಅಂಕ ಗಳಿಸುವ ವಿದ್ಯಾರ್ಥಿಗೆ ದತ್ತಿನಿಧಿಯ ಬಡ್ಡಿ ಮೊತ್ತವನ್ನು ಪ್ರೋತ್ಸಾಹ ಧನವಾಗಿ ನೀಡಬೇಕು ಎಂದು ಅವರು ವಿನಂತಿಸಿದರು. ಹಾಜಬ್ಬರ ಶಿಕ್ಷಣ ಪ್ರೇಮದಿಂದ ಪ್ರೇರಿತರಾಗಿ ನ್ಯೂ ಪಡ್ಪು ಶಾಲೆಗೆ ರಾಷ್ಟ್ರೀಯ ಸೇವಾ ಯೋಜನೆಯ 25 ವಿದ್ಯಾರ್ಥಿಗಳು ಶಿಕ್ಷಕರೊಂದಿಗೆ ಸಾಂಸ್ಕೃತಿಕ ವಿನಿಯಮಕ್ಕೆ ಆಗಮಿಸಿರುವುದಾಗಿ ಪ್ರಾಂಶುಪಾಲರು ಹೇಳಿದರು.

ಸೈಂಟ್‌ ತೋಮಸ್‌ ಹೈಯರ್‌ ಸೆಕೆಂಡರಿ ಶಾಲೆಯ ವತಿಯಿಂದ ಹರೇಕಳ ಹಾಜಬ್ಬ ಅವರನ್ನು ಸಮ್ಮಾನಿಸಲಾಯಿತು. ಕರ್ನಾಟಕ ಜಾನಪದ ವಿಶ್ವವಿದ್ಯಾನಿಲಯದ ಮಾಜಿ ಕುಲಪತಿ ಮತ್ತು ಮಂಗಳೂರು ವಿಶ್ವವಿದ್ಯಾನಿಲಯದ ವಿಶ್ರಾಂತ ಪ್ರಾಧ್ಯಾಪಕ ಡಾ| ಕೆ. ಚಿನ್ನಪ್ಪ ಗೌಡ ಮತ್ತು ಪತ್ರಕರ್ತ ಡಾ| ರೊನಾಲ್ಡ್‌ ಅನಿಲ್‌ ಫೆರ್ನಾಂಡಿಸ್‌ ಉಪಸ್ಥಿತರಿದ್ದರು.

ಹರೇಕಳ ಹಾಜಬ್ಬ ಮಾತನಾಡಿ, ಮಾಧ್ಯಮಗಳು ತನ್ನ ಶಿಕ್ಷಣ ಸೇವೆಗೆ ಬೆಂಬಲ ನೀಡಿವೆ. ಶಿಕ್ಷಣ ಎಂಬುದು ಒಂದು ರೀತಿಯ ಬೆಳಕು. ಅದು ಮಕ್ಕಳ ಪಾಲಿಗೆ ದಾರಿದೀಪವಾಗಬೇಕು ಎಂದು ಹೇಳಿದರು. ನ್ಯೂ ಪಡ್ಪು ಶಾಲೆಯ ಶಾಲಾಭಿವೃದ್ಧಿ ಮತ್ತು ಮೇಲುಸ್ತುವಾರಿ ಸಮಿತಿ ಸದಸ್ಯರಾದ ಯೂಸುಫ್‌, ಶಾಂತಾ, ಶಿಕ್ಷಕಿ ಸುಶೀಮಾ, ಸೈಂಟ್‌ ತೋಮಸ್‌ ಶಾಲೆಯ ಉಪನ್ಯಾಸಕ ಡಾ| ನಿಜಾಯ್‌ ಜೋಸ್‌ ಉಪಸ್ಥಿತರಿದ್ದರು. ನ್ಯೂ ಪಡ್ಪು ಸಂಯುಕ್ತ ಪ್ರೌಢ ಶಾಲೆಯ ಮುಖ್ಯ ಶಿಕ್ಷಕಿ ರೂಪಾ ಸ್ವಾಗತಿಸಿದರು. ಸೈಂಟ್‌ ತೋಮಸ್‌ ಹೈಯರ್‌ ಸೆಕಂಡರಿ ಶಾಲೆಯ ಎನ್ನೆಸ್ಸೆಸ್‌ ಅಧಿಕಾರಿ ಸಾಬು ತೋಮಸ್‌ ವಂದಿಸಿದರು.