ಸಿಸಿ ಕೆಮರಾ ಕಣ್ಗಾವಲಿನಲ್ಲಿ ಪಿಯು ಪರೀಕ್ಷೆ 

Team Udayavani, Mar 2, 2018, 12:03 PM IST

ಪುತ್ತೂರು: ಸುಳ್ಯದ 3 ಹಾಗೂ ಪುತ್ತೂರು ತಾಲೂಕಿನ 9 ಕೇಂದ್ರಗಳಲ್ಲಿ ಗುರುವಾರದಿಂದ ದ್ವಿತೀಯ ಪಿಯು ಪರೀಕ್ಷೆ ಆರಂಭಗೊಂಡಿದೆ.

ಪರೀಕ್ಷೆ ನಡೆಯುವ ಆಯಾ ಕೇಂದ್ರಗಳ ವಿದ್ಯಾರ್ಥಿಗಳು ಬೇರೆ ಕೇಂದ್ರದಲ್ಲಿ ಪರೀಕ್ಷೆ ಬರೆಯಲು ವ್ಯವಸ್ಥೆ ಮಾಡಿಕೊಡಲಾಗಿತ್ತು. ಹಿಂದಿನ ಬಾರಿಯ ಕೆಲ ಗೊಂದಲಗಳನ್ನು ಗಮನದಲ್ಲಿಟ್ಟುಕೊಂಡು, ಈ ಸಲ ಎಲ್ಲ ಕೇಂದ್ರಗಳ ಪರೀಕ್ಷಾ ಕೊಠಡಿಗಳಿಗೆ ಸಿಸಿ ಕೆಮರಾ ಅಳವಡಿಸಲಾಗಿತ್ತು. ಮಾತ್ರವಲ್ಲ, ಆಯಕಟ್ಟಿನ ಪ್ರದೇಶಗಳಿಗೂ ಸಿಸಿ ಕಣ್ಗಾವಲು ಹಾಕಲಾಗಿತ್ತು.

ವಿದ್ಯಾರ್ಥಿಗಳ ಅನುಕೂಲದ ದೃಷ್ಟಿ ಯಿಂದ ಕಾಲೇಜು ಕೇಂದ್ರದಲ್ಲೇ ಎಲ್ಲ ವ್ಯವಸ್ಥೆಗಳನ್ನು ಮಾಡಲಾಗಿತ್ತು. ಕೇಂದ್ರಗಳು ಬೇರೆ ಕಡೆ ಇರುವುದರಿಂದ, ಸಾರಿಗೆ ಸಂಪರ್ಕವಾಗಿ ಸರಕಾರಿ ಬಸ್ಸನ್ನೇ ಆಶ್ರಯಿಸಲಾಯಿತು. ಹಾಲ್‌ ಟಿಕೆಟ್‌ ತೋರಿಸಿ, ಉಚಿತ ಪ್ರಯಾಣದ ವ್ಯವಸ್ಥೆ ಮಾಡಿದ್ದು ಅನುಕೂಲವಾಯಿತು.