‘ಮನೆ ಮನೆಗೆ ಮಳೆಕೊಯ್ಲು’ ಉದಯವಾಣಿ ಅಭಿಯಾನಕ್ಕೆ ಯಶಸ್ವಿ ಎರಡು ತಿಂಗಳು

Team Udayavani, Aug 9, 2019, 5:55 AM IST

ಮಹಾನಗರ: ಪಶ್ಚಿಮ ಘಟ್ಟಗಳ ತಪ್ಪಲಲ್ಲಿರುವ ದಕ್ಷಿಣ ಕನ್ನಡ ಜಿಲ್ಲೆಯಲ್ಲಿ ನೀರು ಎಂದೂ ಬತ್ತದ ಅಕ್ಷಯಪಾತ್ರೆಯಂತಿತ್ತು. ಆದರೆ ನಿರಂತರ ಕಾಡು ನಾಶ, ಗಿಡ ಮರಗಳ ಮರೆ ಮಾಚಿ ಕಾಂಕ್ರಿಟ್ ಕಾನನದ ಬೆಳವಣಿಗೆಯಿಂದಾಗಿ ಮೂರ್‍ನಾಲ್ಕು ವರ್ಷಗಳಿಂದೀಚೆಗೆ ನೀರಿಗಾಗಿ ಜಿಲ್ಲೆಯ ಜನತೆ ಹಾಹಾಕಾರ ಅನುಭವಿಸುವಂತಾಗಿದೆ.

ಕಳೆದ ಬೇಸಗೆಯಲ್ಲಂತೂ ಜಿಲ್ಲೆಯ ಜನತೆಯನ್ನು ಅದರಲ್ಲಿಯೂ ನಗರದವರಿಗೆ ನೀರಿನ ಅಭಾವ ಬಹಳ ತೀವ್ರವಾಗಿ ಬಿಸಿ ಮುಟ್ಟಿಸಿತ್ತು. ಬೇಸಗೆಯಲ್ಲಿ ಮನೆಗೆ ಕುಡಿಯುವ ನೀರು ಬರದಿದ್ದಾಗ ಅದಕ್ಕೆ ಆಡಳಿತ ವ್ಯವಸ್ಥೆಯನ್ನು ದೂರುವ ಬದಲು ಪರ್ಯಾಯವಾಗಿ ನೀರಿನ ಮೂಲದತ್ತ ಜಾಗೃತರಾಗುವುದು ಪ್ರತಿ ನಾಗರಿಕರ ಕರ್ತವ್ಯ. ಏಕೆಂದರೆ, ವಾರ್ಷಿಕ 3,500 ಲೀಟರ್‌ ಮಳೆ ಬೀಳುವ ದಕ್ಷಿಣ ಕನ್ನಡ ಜಿಲ್ಲೆಯಲ್ಲಿ ಬೇಸಗೆಯಲ್ಲಿ ನೀರಿಲ್ಲ ಅಂದರೆ, ನಾವೆಲ್ಲಿ ಎಡವಿದ್ದೇವೆ ಎಂಬ ಗಂಭೀರ ಚಿಂತನೆಯೂ ಅಗತ್ಯ. ವ್ಯರ್ಥವಾಗಿ ಹರಿದು ಹೋಗುವ ಮಳೆ ನೀರನ್ನು ಇಂಗಿಸುವ ಮೂಲಕ ಅಂತರ್ಜಲ ವೃದ್ಧಿಸುವುದಕ್ಕೆ ನಾವೆಲ್ಲರೂ ಒಟ್ಟಾಗಿ ಪ್ರಯತ್ನಿಸಬೇಕಿದೆ. ಅದಕ್ಕಾಗಿ ಎರಡು ತಿಂಗಳ ಹಿಂದೆ ‘ಉದಯವಾಣಿ’ ಪ್ರಾರಂಭಿಸಿದ್ದ ಅಭಿಯಾನವೇ ‘ಮನೆ ಮನೆಗೆ ಮಳೆಕೊಯ್ಲು’.

ಜನರಲ್ಲಿ ಜಲ ಸಂರಕ್ಷಣೆ ಬಗ್ಗೆ ಅರಿವು ಮೂಡಿಸುವ ಸಲುವಾಗಿ ‘ಉದಯವಾಣಿ’ಯು ಜೂನ್‌ 8ರಂದು ಪ್ರಾರಂಭಿಸಿದ್ದ ಈ ಅಭಿಯಾನವು ಇದೀಗ ಯಶಸ್ವಿಯಾಗಿ ಎರಡು ತಿಂಗಳುಗಳನ್ನು ಪೂರ್ಣಗೊಳಿಸಿದೆ. ಈ ಅಭಿಯಾನವು ಸಾವಿರಾರು ಜನರನ್ನು ಜಲ ಸಂರಕ್ಷಣೆಯತ್ತ ಜಾಗೃತಗೊಳಿಸಿದೆ. ಹಲವಾರು ಮನೆ, ಸಂಘ-ಸಂಸ್ಥೆ, ಚರ್ಚ್‌, ದೇವಸ್ಥಾನ, ಸಮುದಾಯ, ಶಾಲೆ-ಕಾಲೇಜುಗಳಲ್ಲಿ ಮಳೆಕೊಯ್ಲು ವ್ಯವಸ್ಥೆ ಕಳೆದ ಎರಡು ತಿಂಗಳಿನಿಂದ ಅಳವಡಿಕೆಯಾಗುತ್ತಿರುವುದು ಗಮನಾರ್ಹ.

ದ.ಕ. ಜಿಲ್ಲಾ ಪಂಚಾ ಯತ್‌ ಸಹ ಯೋಗದಲ್ಲಿ ನಿರ್ಮಿತಿ ಕೇಂದ್ರ ದವರು ಜಿಲ್ಲೆಯಾ ದ್ಯಂತ ಅಲ್ಲಲ್ಲಿ ಮಳೆ ಕೊಯ್ಲು ಮಾಹಿತಿ ಕಾರ್ಯ ಕ್ರಮ-ಪ್ರಾತ್ಯಕ್ಷಿಕೆ, ಮನೆ-ಮನೆಗೆ ಭೇಟಿ, ತರಬೇತಿ ಕಾರ್ಯಕ್ರಮಗಳನ್ನು ಆಯೋಜಿಸುವ ಮೂಲಕ ಈಗಾಗಲೇ ಸಾವಿರಾರು ಮಂದಿಗೆ ಮಳೆಕೊಯ್ಲಿನ ಅಗತ್ಯ-ಅನುಕೂಲತೆಯನ್ನು ಮನದಟ್ಟು ಮಾಡಿಕೊಡುವಲ್ಲಿ ಯಶಸ್ವಿಯಾಗಿದ್ದಾರೆ. ಸದ್ಯಕ್ಕೆ 293 ಮಂದಿ ನಿರ್ಮಿತಿ ಕೇಂದ್ರಕ್ಕೆ ಕರೆ ಮಾಡಿ ಮಳೆಕೊಯ್ಲು ಬಗ್ಗೆ ಮಾಹಿತಿ ಕೇಳಿದ್ದು, 105 ಮನೆಗಳಿಗೆ ಈವರೆಗೆ ಭೇಟಿ ನೀಡಲಾಗಿದೆ. ಉಳಿದವರಿಗೆ ಫೋನ್‌ನಲ್ಲೇ ಅಳವಡಿಸಿಕೊಳ್ಳಲು ಮಾರ್ಗದರ್ಶ ಮಾಡಲಾಗಿದೆ.

ಮಳೆಕೊಯ್ಲು ಕಾರ್ಯಾಗಾರದಲ್ಲಿ ಮಾಹಿತಿ ನೀಡುವಂತೆ 47 ಆಹ್ವಾನಗಳು ಬಂದಿದ್ದು, ಈ ಪೈಕಿ 37 ಕಡೆ ಮಾಹಿತಿ ಕಾರ್ಯಕ್ರಮ ನೀಡಲಾಗಿದೆ ಎಂದು ನಿರ್ಮಿತಿ ಕೇಂದ್ರದ ಯೋಜನಾ ನಿರ್ದೇಶಕ ರಾಜೇಂದ್ರ ಕಲ್ಬಾವಿ ಹೇಳಿದ್ದಾರೆ.

ಅಭಿಯಾನದಿಂದ ಸ್ಫೂರ್ತಿಗೊಂಡು ಬೆಳ್ತಂಗಡಿಯ ಮುಂಡಾಜೆಯಲ್ಲಿ ‘ನೀರಿಂಗಿಸೋಣ’ ಎಂಬ ತಂಡವೊಂದು ಅಸ್ತಿತ್ವಕ್ಕೆ ಬಂದಿದ್ದು, ಇಡೀ ಗ್ರಾಮದಲ್ಲಿ ಈಗ ಜಲಾಂದೋಲನದ ಕಾರ್ಯಕ್ರಮಗಳು ನಡೆಯುತ್ತಿವೆ. ಪೊಳಲಿ ಸರಕಾರಿ ಶಾಲೆಗೆ ಬಿರುವೆರ್‌ ಕುಡ್ಲ ಸಂಘಟನೆಯು ತಮ್ಮ ಖರ್ಚಿನಲ್ಲಿ ಮಳೆಕೊಯ್ಲು ವ್ಯವಸ್ಥೆ ಮಾಡಿಕೊಟ್ಟಿದೆ. ಅಲ್ಲದೆ, ಹಲವಾರು ವಿದ್ಯಾಸಂಸ್ಥೆ, ಸಮುದಾಯ ಸಂಘಟನೆಗಳು, ಪ್ರಾರ್ಥನಾ ಮಂದಿರಗಳು ಸ್ವಯಂಪ್ರೇರಿತವಾಗಿ ಅಲ್ಲಲ್ಲಿ ಮಳೆಕೊಯ್ಲು ಅರಿವು ಕಾರ್ಯಕ್ರಮಗಳನ್ನು ಆಯೋಜಿಸಿ ಉದಯವಾಣಿಯ ಈ ಅಭಿಯಾನವನ್ನು ಮತ್ತಷ್ಟು ಪರಿಣಾಮಕಾರಿಯಾಗಿ ಜನರಿಗೆ ತಲುಪಿಸುವುದಕ್ಕೆ ಪ್ರಯತ್ನಿಸಿರುವುದು ಗಮನಾರ್ಹ.

ಈ ಹಿನ್ನೆಲೆಯಲ್ಲಿ ‘ಮನೆ ಮನೆಗೆ ಮಳೆಕೊಯ್ಲು’ ಅಭಿಯಾನವು ಇದೇರೀತಿ ಮತ್ತಷ್ಟು ಜಲ ಸಾಕ್ಷರತೆಗೆ ಪೂರಕವಾದ ಜನಾಂದೋಲನದೊಂದಿಗೆ ಮುಂದುವರಿಯಲಿದೆ.

ಆ ಮೂಲಕ, ಇಡೀ ಜಿಲ್ಲೆಯಲ್ಲಿ ಇನ್ನಷ್ಟು ಮನೆಗಳನ್ನು ಜಲ ಸಾಕ್ಷರತೆಗೊಳಿಸುವ ಪ್ರಯತ್ನಕ್ಕೆ ಈ ಅಭಿಯಾನವು ವೇದಿಕೆಯಾಗಲಿದೆ.

‘ಮನೆ ಮನೆಗೆ ಮಳೆಕೊಯ್ಲು’ ಅಭಿಯಾನವು ಈಗ ಯಶಸ್ವಿಯಾಗಿ ಎರಡು ತಿಂಗಳು ಪೂರ್ಣಗೊಳಿಸಿದ ಹಿನ್ನೆಲೆಯಲ್ಲಿ ಜಿಲ್ಲೆಯ ಕೆಲವು ಪ್ರಮುಖರು, ಧಾರ್ಮಿಕ ನೇತಾರರು ಅಭಿಯಾನಕ್ಕೆ ಮೆಚ್ಚುಗೆ ವ್ಯಕ್ತಪಡಿಸಿ ತಮ್ಮ ಸಂದೇಶದ ಮೂಲಕ ಮತ್ತಷ್ಟು ಜನರನ್ನು ಈ ದಿಸೆಯಲ್ಲಿ ಪ್ರೇರಣೆಗೊಳಿಸುವ ಆಶಯ ವ್ಯಕ್ತಪಡಿಸಿದ್ದಾರೆ.