ರಿಕ್ಷಾ ಚಾಲಕರು, ಸಾರ್ವಜನಿಕರಿಗೆ ಸಂಚಾರ ಮಾಹಿತಿ ಕಾರ್ಯಾಗಾರ 

Team Udayavani, Nov 30, 2017, 10:48 AM IST

ಸ್ಟೇಟ್‌ಬ್ಯಾಂಕ್‌ : ಲಯನ್ಸ್‌ ಕ್ಲಬ್‌ ಮಂಗಳೂರು ನೇತ್ರಾವತಿ ಹಾಗೂ ಮಂಗಳೂರು ನಗರ ಪೊಲೀಸ್‌ ಜಂಟಿ ಆಶ್ರಯದಲ್ಲಿ ಇತ್ತೀಚೆಗೆ ಇಲ್ಲಿನ ರಾವ್‌ ಆ್ಯಂಡ್‌ ರಾವ್‌ ರಿಕ್ಷಾ ನಿಲ್ದಾಣದಲ್ಲಿ ಮಾಹಿತಿ ಕಾರ್ಯಾಗಾರ ಜರಗಿತು.

ನಗರ ಪೊಲೀಸ್‌ ಅಪರಾಧ ಮತ್ತು ಸಂಚಾರ ಉಪ ಪೊಲೀಸ್‌ ಆಯುಕ್ತೆ ಉಮಾ ಪ್ರಶಾಂತ್‌ ಉದ್ಘಾಟಿಸಿದರು. ಅಧ್ಯಕ್ಷತೆ ವಹಿಸಿದ್ದ ಸಂಚಾರ ಉಪ ವಿಭಾಗದ ಸಹಾಯಕ ಪೊಲೀಸ್‌ ಆಯುಕ್ತ ಮಂಜುನಾಥ ಶೆಟ್ಟಿ ಅವರು ಚಾಲಕರು ಮತ್ತು ಸಾರ್ವಜನಿಕರಿಗೆ ಸಾರಿಗೆ ಸಂಬಂಧಿತ ಮಾಹಿತಿ ನೀಡಿದರು.

ಸಂಬಂಧ ವೃದ್ಧಿಯಾಗಲಿ
ಮುಖ್ಯ ಅತಿಥಿ ಸೆಂಟ್ರಲ್‌ ಉಪ ವಿಭಾಗದ ಸಹಾಯಕ ಪೊಲೀಸ್‌ ಆಯುಕ್ತ ಉದಯ ಎಂ. ನಾಯಕ್‌ ಅವರು ರಿಕ್ಷಾ ಚಾಲಕರು ಮತ್ತು ಪೊಲೀಸ್‌ ಇಲಾಖೆಗಳ ನಡುವಿನ ಸಂಬಂಧ ವೃದ್ಧಿ ಹಾಗೂ ನಗರದ ಪ್ರವಾಸೋದ್ಯಮ ಅಭಿವೃದ್ಧಿಯಲ್ಲಿ ರಿಕ್ಷಾ ಚಾಲಕರು ನಿರ್ಣಾಯಕ ಪಾತ್ರ ವಹಿಸಬೇಕು ಎಂದರು. ಸ್ಥಳೀಯ ಕಾರ್ಪೊರೇಟರ್‌ ದಿವಾಕರ ಪಾಂಡೇಶ್ವರ ಅವರು ಕಾರ್ಯಕ್ರಮದ ಬಗ್ಗೆ ಶ್ಲಾಘನೆ ವ್ಯಕ್ತಪಡಿಸಿದರು.

ಲಯನ್ಸ್‌ ಕ್ಲಬ್‌ ನೇತ್ರಾವತಿ ಅಧ್ಯಕ್ಷೆ ಸಬಿತಾ ಶೆಟ್ಟಿ ಪ್ರಸ್ತಾವನೆಗೈದರು. ವಿಮಾ ಸಲಹೆಗಾರ ಪೀಟರ್‌ ಆ್ಯಂಟನಿ ಪಿಂಟೊ, ಉತ್ತರ ಸಂಚಾರ ಪೊಲೀಸ್‌ ಠಾಣೆಯ ನಿರೀಕ್ಷಕ ಮೋಹನ್‌ ಕೊಟ್ಟಾರಿ ಉಪಸ್ಥಿತರಿದ್ದರು. ರಾವ್‌ ಆ್ಯಂಡ್‌ ರಾವ್‌ ಆಟೋ ಫ್ರೆಂಡ್ಸ್‌ ಅಧ್ಯಕ್ಷ ಸಂತೋಷ್‌ ಕುಮಾರ್‌ ಕೊಲ್ಯ ಸ್ವಾಗತಿಸಿ, ಗೀತಾ ಕಲ್ಯಾಣಪುರ ವಂದಿಸಿದರು. ಪ್ರತೀಶ್‌ ಗೌರೀಶ್‌ ನಿರ್ವಹಿಸಿದರು.