ಕರಾವಳಿಯ ಕರಕುಶಲಕರ್ಮಿಗಳ ನೋಂದಣಿ: ರೂಪಾ ಮೌದ್ಗಿಲ್‌ ಕರೆ

Team Udayavani, Jan 11, 2023, 6:40 AM IST

ಮಂಗಳೂರು: ರಾಜ್ಯ ಕರಕುಶಲ ನಿಗಮದಿಂದ ಕುಶಲ ಕರ್ಮಿಗಳಿಗೆ ಹಲವು ರೀತಿಯ ಪ್ರೋತ್ಸಾಹ ನೀಡಲಾಗುತ್ತಿದೆ. ಆದ ರೂ ದ.ಕ., ಉಡುಪಿ ಭಾಗದ ಕುಶಲ ಕರ್ಮಿಗಳ ಸಂಖ್ಯೆ ಕಡಿಮೆ ಇದೆ. ಕರಾವಳಿ ಭಾಗದವರು ನಿಗಮದಲ್ಲಿ ನೋಂದಣಿ ಮಾಡುವ ಮೂಲಕ ತಮ್ಮ ಕರಕುಶಲ ವಸ್ತುಗಳನ್ನು ವಿವಿಧೆಡೆ ಪರಿಚಯಿಸಬೇಕು ಎಂದು ನಿಗಮದ ವ್ಯವಸ್ಥಾಪಕ ನಿರ್ದೇಶಕಿ ರೂಪಾ ಮೌದ್ಗಿಲ್‌ ಹೇಳಿದರು.

“ಗಾಂಧಿ ಶಿಲ್ಪ ಬಜಾರ್‌’ ಉದ್ಘಾಟನೆ ಸಮಾರಂಭದಲ್ಲಿ ಅವರು ಸುದ್ದಿಗಾರರ ಜತೆ ಮಾತನಾಡಿ, ಪ್ರಸ್ತುತ ನಿಗಮದಲ್ಲಿ 3 ಸಾವಿರದಷ್ಟು ಮಂದಿ ನೋಂದಣಿ ಮಾಡಿದ್ದಾರೆ. ಅವರಿಗೆ ತರಬೇತಿ ನೀಡುವುದಲ್ಲದೇ, ಅವರ ಉತ್ಪನ್ನಗಳಿಗೆ ಮೇಳಗಳು, ಕಾವೇರಿ ಶೋರೂಂ ಇತ್ಯಾದಿ ಮೂಲಕ ಮಾರುಕಟ್ಟೆ ಒದಗಿಸಲಾಗುತ್ತದೆ. ಇದು ಉಚಿತ. ಉತ್ಪನ್ನಗಳ ಮಾರಾಟದಿಂದ ಬಂದ ಹಣವೂ ಅವರಿಗೆ ನೀಡಲಾಗುತ್ತದೆ ಎಂದರು.

ಮಂಗಳೂರಿನಲ್ಲಿ ಮಳಿಗೆ 
ಮಂಗಳೂರಿನಲ್ಲಿ ಕರಕುಶಲ ವಸ್ತುಗಳ ಮಾರಾಟಕ್ಕೆ ಜಾಗ ಹುಡು ಕುತ್ತಿದ್ದೇವೆ. ದಿಲ್ಲಿ, ಹೈದರಾಬಾದ್‌, ಕೊಲ್ಕತ್ತಾ, ಗುಜರಾತ್‌ ನಲ್ಲಿ ಕಾವೇರಿ ಮಳಿಗೆಗಳಿವೆ. ಚೆನ್ನೈನಲ್ಲಿ “ಕಾವೇರಿ’ ಶೋರೂಂ 2 ತಿಂಗಳಲ್ಲಿ ಆರಂಭವಾಗಲಿದೆ. ಇದು ಹೊರ ರಾಜ್ಯದಲ್ಲಿ ಐದನೇ ಮಳಿಗೆ. ರಾಜ್ಯ ದಲ್ಲೂ 13 ಕಡೆಗಳಲ್ಲಿ ಕರಕುಶಲ ಸಂಕೀರ್ಣಗಳಿವೆ ಎಂದರು.

ಸಾಗರದಲ್ಲಿರುವ ನಿಗಮದ ಶಿಲ್ಪ ಗುರುಕುಲ ಕೋರ್ಸ್‌ಗಳನ್ನು ಈಗಿನ ಅಗತ್ಯಕ್ಕೆೆ ತಕ್ಕಂತೆ ಮೇಲ್ದರ್ಜೆಗೇರಿಸಿ, ಶಿಲ್ಪ ತರಬೇತಿಯ ಕೋರ್ಸ್‌ಗಳನ್ನು 10 ತಿಂಗಳಿಗೆ ಇಳಿಸಲಾಗುತ್ತದೆ. ಪ್ರಸ್ತುತ 40 ಮಂದಿ ವಿದ್ಯಾರ್ಥಿ ಗಳು ಮರ ಮತ್ತು ಶಿಲ್ಪ ಕೆತ್ತನೆಯ ತರಬೇತಿ ಪಡೆಯುತ್ತಿದ್ದಾರೆ ಎಂದರು.

ರಾಜ್ಯದಲ್ಲಿ ಶ್ರೀಗಂಧದಲ್ಲಿ ಕೆತ್ತನೆ ಮಾಡುವ ಸಾವಿರದಷ್ಟು ಕರಕುಶಲ ಕರ್ಮಿಗಳಿದ್ದಾರೆ. ಅವರಿಗೆ ಉತ್ತೇಜನ ನೀಡಲು ಶ್ರೀಗಂಧದ ಸಸಿಗಳನ್ನು ಶೇ. 50ರ ದರದಲ್ಲಿ ವಿತರಿಸಲಾಗುತ್ತಿದೆ. ಅದೇ ರೀತಿ ಬಿದಿರಿ ಕಲೆಗೆ ಬಳಸುವ ಸತು ಮತ್ತು ಬೆಳ್ಳಿಯನ್ನು ಕೂಡ ಶೇ. 50ರ ದರದಲ್ಲಿ ನೀಡಲಾಗುತ್ತಿದೆ ಎಂದು ಮಾಹಿತಿ ನೀಡಿದರು.