ಸಹನಾ ರಾವ್‌: ನೃತ್ಯ, ಚಿತ್ರ, ಸಂಗೀತದ ಹೊಸ ಭರವಸೆ 

Team Udayavani, Dec 21, 2017, 4:08 PM IST

ಸೂರ್ಯ ಇಡೀ ಜಗತ್ತಿಗೇ ತನ್ನ ಪ್ರಭೆಯನ್ನು ಚೆಲ್ಲುತ್ತಾನೆ. ಆತನ ಆಸರೆಯಲ್ಲಿ ಬದುಕುತ್ತಿರುವ ನಾವೂ ನಮ್ಮ ಸುಪ್ತ ಪ್ರತಿಭೆಯನ್ನು ಬೆಳಗಿಸಲು ಹರಸಾಹಸ ಪಡುತ್ತೇವೆ. ನಮ್ಮ ಆಸಕ್ತಿ, ಪ್ರಯತ್ನದ ಅನುಸಾರ ಕಲೆ ನಮಗೊಲಿಯುತ್ತದೆ. ಬೆಳಕಿನ ಕಿರಣ ಸೋಕಿದ ಮಣಿಯಂತೆ ಬೆಳಗುತ್ತದೆ. ಅಂಥ ಸಾಧನೆಯ ಪಥದಲ್ಲಿ ಹೆಜ್ಜೆಯೂರುತ್ತಿರುವ ಪ್ರತಿಭೆಗಳಲ್ಲಿ ಸಹನಾ ರಾವ್‌ ಗಮನಾರ್ಹ ಸಾಧನೆ ಮಾಡುತ್ತಿದ್ದಾರೆ.

ಉಜಿರೆಯ ಶ್ರೀ ಧರ್ಮಸ್ಥಳ ಆಂಗ್ಲ ಮಾಧ್ಯಮ ಶಾಲೆ, ಪುತ್ತೂರಿನ ವಿವೇಕಾನಂದ ಆಂಗ್ಲ ಮಾಧ್ಯಮ ಶಾಲೆಯಲ್ಲಿ ಪ್ರಾಥಮಿಕ ಹಾಗೂ ಪ್ರೌಢ ಶಿಕ್ಷಣವನ್ನು ಪೂರೈಸಿದ ಸಹನಾ, ಸದ್ಯ ಪುತ್ತೂರಿನ ಸಂತ ಫಿಲೋಮಿನಾ ಕಾಲೇಜಿನಲ್ಲಿ ಅಂತಿಮ ಬಿಎಸ್ಸಿ ವಿದ್ಯಾರ್ಥಿನಿ. ಈ ವರೆಗಿನ ಎಲ್ಲ ಪ್ರಮುಖ ಪರೀಕ್ಷೆಗಳನ್ನು ಉನ್ನತ ಶ್ರೇಣಿಯಲ್ಲೇ ತೇರ್ಗಡೆಯಾಗಿರುವ ಅವರು ಕಲಿಕೆಯೊಂದಿಗೆ ನೃತ್ಯ, ಚಿತ್ರಕಲೆ, ಸಂಗೀತ ಇತ್ಯಾದಿಗಳಲ್ಲೂ ತಮ್ಮ ಪ್ರತಿಭೆ ತೋರಿಸಿದ್ದಾರೆ. ಯಾವುದೇ ವಿಷಯವನ್ನು ಕಲಿಯಲು, ತನ್ನದಾಗಿಸಿಕೊಳ್ಳಲು ಆಸಕ್ತಿ, ಅಭ್ಯಾಸ ಇದ್ದರೆ ಸಾಕು ಎಂಬುದನ್ನು ಸಾಬೀತು ಮಾಡಿದ್ದಾರೆ.

ಬೆಳ್ತಂಗಡಿಯ ವಿದುಷಿ ವಿದ್ಯಾ ಮನೋಜ್‌ ಹಾಗೂ ವಿದ್ವಾನ್‌ ಬಾಲಕೃಷ್ಣ ಮಂಜೇಶ್ವರ ಅವರಿಂದ ಭರತನಾಟ್ಯ ಅಭ್ಯಾಸ ಮಾಡುತ್ತಿರುವ ಸಹನಾ, ಬಾಲಿವುಡ್‌ ಹಾಗೂ ಕಥಕ್‌ ನೃತ್ಯವನ್ನು ಅತ್ಯಂತ ಮೋಹಕವಾಗಿ ಪ್ರದರ್ಶಿಸುತ್ತಾರೆ. ಶಾಸ್ತ್ರೀಯ ಸಂಗೀತದಲ್ಲೂ ಆಸಕ್ತಿ ಹೊಂದಿರುವ ಅವರು, ವಿದುಷಿ ಶ್ಯಾಮಲಾ ನಾಗರಾಜ್‌ ಮಡಂತ್ಯಾರು ಹಾಗೂ ವಿದ್ವಾನ್‌ ರಾಮಕೃಷ್ಣ ಭಟ್‌ ಪುತ್ತೂರು ಅವರಲ್ಲಿ ಅಭ್ಯಾಸಿಸಿದ್ದಾರೆ. ಹಾರ್ಮೋನಿಯಂ, ಕೀಬೋರ್ಡ್‌ ಇತ್ಯಾದಿಗಳಲ್ಲೂ ಕೈಯಾಡಿಸಿ ಸೈ ಎನ್ನಿಸಿಕೊಂಡಿದ್ದಾರೆ. ಗಣಿಯಿಂದ ಹೊರತೆಗೆದ ಅದಿರು ಚಿನ್ನವಾಗುವಂತೆ ಅವಕಾಶಗಳ ಸದ್ಬಳಕೆಯಿಂದ ತಮ್ಮ ಪ್ರತಿಭೆಯನ್ನು ಬೆಳಗಿಸಿಕೊಂಡಿದ್ದಾರೆ ಸಹನಾ.

ಪುತ್ತೂರಿನ ಸಂತ ಫಿಲೋಮಿನಾ ಕಾಲೇಜಿನ ಅರ್ಥಶಾಸ್ತ್ರ ವಿಭಾಗದ ಸಹಾಯಕ ಪ್ರಾಧ್ಯಾಪಕ ಪ್ರೊ| ದಿನಕರ ರಾವ್‌ ಹಾಗೂ ವಾಣಿ ರಾವ್‌ ದಂಪತಿ, ತಮ್ಮ ಪುತ್ರಿಯ ಎಲ್ಲ ಸಾಹಸಗಳಿಗೂ ಬೆನ್ನೆಲುಬಾಗಿ ನಿಂತು ಪ್ರೋತ್ಸಾಹ ನೀಡುತ್ತಿದ್ದಾರೆ. ಚಿಗುರಾಡುತ್ತಿರುವ ಗಿಡದಲ್ಲಿ, ಪಡುವ ಪ್ರಯತ್ನದ ಪಥದಲ್ಲಿ ಸಹನಾ ಯಶಸ್ಸಿನ ಶಿಖರವೇರಲಿ

ಹವ್ಯಾಸ ಹಲವು
ಚಿತ್ರಕಲೆಯ ಸೀನಿಯರ್‌ ಗ್ರೇಡ್‌ ಪರೀಕ್ಷೆಯಲ್ಲಿ ವಿಶಿಷ್ಟ ಶ್ರೇಣಿಯಲ್ಲಿ ಉತ್ತೀರ್ಣರಾಗಿರುವ ಅವರು, ವಿಶ್ವ ಗ್ರಾಹಕ ದಿನಾಚರಣೆ ಅಂಗವಾಗಿ ಶಿವಮೊಗ್ಗದ ಶ್ರೀ ರವಿವರ್ಮ ಅಕಾಡೆಮಿ ಟ್ರಸ್ಟ್‌ ನಡೆಸಿದ ರಾಜ್ಯಮಟ್ಟದ ಚಿತ್ರಕಲಾ ಸ್ಪರ್ಧೆಯಲ್ಲಿ ಪ್ರಥಮ ಸ್ಥಾನ ಗಳಿಸಿದ್ದಾರೆ. ಉತ್ತಮ ಛಾಯಾಗ್ರಾಹಕಿಯೂ ಆಗಿರುವ ಅವರು, ಎಸ್‌.ಆರ್‌. ಫೋಟೋಗ್ರಾಫಿಯನ್ನು ಹವ್ಯಾಸವಾಗಿ ರೂಢಿಸಿಕೊಂಡಿದ್ದಾರೆ.

ಇದರೊಂದಿಗೆ ನಟನೆ, ಡಬ್‌ಸ್ಮಾಷ್‌ ಕಲೆಗಳನ್ನೂ ಕಲಿತಿದ್ದಾರೆ. ನಾಯಕತ್ವ ಗುಣ ಬೆಳೆಸಿಕೊಂಡಿದ್ದು, ಯಾವುದೇ ಸನ್ನಿವೇಶವನ್ನು ಎದುರಿಸಬಲ್ಲೆ ಎನ್ನುವ ಆತ್ಮವಿಶ್ವಾಸವಿದೆ. ವಾಹನ ಚಾಲನೆ, ಸೈಕ್ಲಿಂಗ್‌, ನಾಣ್ಯ ಹಾಗೂ ಅಂಚೆ ಚೀಟಿ ಸಂಗ್ರಹ, ರೇಡಿಯೋ ಕೇಳುವುದು ಇತ್ಯಾದಿ ಹವ್ಯಾಸಗಳನ್ನು ಇಷ್ಟಪಟ್ಟು ಬೆಳೆಸಿಕೊಂಡಿದ್ದಾರೆ.
ಲಿಖಿತಾ ಗುಡ್ಡೆಮನೆ
ಉದಯವಾಣಿ ವಿದ್ಯಾರ್ಥಿ
ಪತ್ರಕರ್ತ ಯೋಜನೆಯ ಶಿಕ್ಷಣಾರ್ಥಿ