ರಾಜ್ಯದಲ್ಲಿ 16 ಕೋ. ಅರ್ಜಿ ವಿಲೇ: ಮಥಾಯಿ

Team Udayavani, Oct 18, 2018, 10:32 AM IST

ಬೆಳ್ತಂಗಡಿ: ರಾಜ್ಯದ 73 ಇಲಾಖೆಗಳ 897 ಸೇವೆ ಸಕಾಲದಡಿ ಬರುತ್ತಿದ್ದು, ಈವರೆಗೆ ಇದರ ಮೂಲಕ 16 ಕೋಟಿ ಅರ್ಜಿಗಳು ವಿಲೇವಾರಿಯಾಗಿವೆ. ರಾಜ್ಯದ ನಾಗರಿಕರಿಗೆ ಸರಕಾರ ನೀಡುವ ಈ ಹಕ್ಕಿನ ಕುರಿತು ಅಂತಾರಾಷ್ಟ್ರೀಯ ಮನ್ನಣೆ ಲಭಿಸಿದೆ ಎಂದು ರಾಜ್ಯ ಸಕಾಲ ಮಿಷನ್‌ನ ಆಡಳಿತಾಧಿಕಾರಿ ಕೆ. ಮಥಾಯಿ ಹೇಳಿದರು.

ಅವರು ಬುಧವಾರ ಇಲ್ಲಿನ ಮಿನಿ ವಿಧಾನಸೌಧ ಸಭಾಂಗಣದಲ್ಲಿ ರಾಜ್ಯ ಸಕಾಲ ಮಿಷನ್‌ ಸಿಬಂದಿ ಮತ್ತು ಆಡಳಿತ ಹಾಗೂ ಸುಧಾರಣೆ ಇಲಾಖೆ ಮತ್ತು ದ.ಕ. ಜಿಲ್ಲಾಡಳಿತದ ಸಹಯೋಗದಲ್ಲಿ ನಡೆದ ಸಕಾಲ ಯೋಜನೆ ಕುರಿತು ಸಿಬಂದಿ ಹಾಗೂ ಸಾರ್ವಜನಿಕ ಜಾಗೃತಿ ಕಾರ್ಯಕ್ರಮದಲ್ಲಿ ಮಾತನಾಡಿದರು.

ಈ ಯೋಜನೆ ಪ್ರಕಾರ ಅಧಿಕಾರಿ ಕಾಲಮಿತಿಯೊಳಗೆ ಅರ್ಜಿ ವಿಲೇವಾರಿ ಮಾಡದಿದ್ದಲ್ಲಿ ದಿನಕ್ಕೆ 20 ರೂ.ಗಳಂತೆ ದಂಡ ವಿಧಿಸಿ ಅದನ್ನು ಅರ್ಜಿದಾರರಿಗೆ ಪರಿಹಾರ ರೂಪದಲ್ಲಿ ನೀಡಲಾಗುತ್ತಿದೆ. ರಾಜ್ಯದ 20 ಸಾವಿರ ಅಧಿಕಾರಿಗಳ ಕಚೇರಿಯನ್ನು ಸಕಾಲದಡಿ ಗೊತ್ತು ಪಡಿಸಲಾಗಿದೆ. ಸಕಾಲ ಕಾನೂನನ್ನು ಸಮರ್ಪಕವಾಗಿ ಉಪಯೋಗಿಸುವವರ ಸಂಖ್ಯೆ ಕಡಿಮೆ ಇದೆ. ಅರ್ಜಿ ಸಲ್ಲಿಸಿದ ಬಳಿಕ 15 ಡಿಜಿಟ್‌ಗಳ ಜಿಎಸ್‌ಸಿ ಸಂಖ್ಯೆ ನೀಡಲಾಗುತ್ತಿದ್ದು, ಅದರ ಆಧಾರದಲ್ಲಿ ಅಪೀಲು ಹೋಗಲು ಅವಕಾಶವಿರುತ್ತದೆ. ಸಕಾಲಕ್ಕೆ ವಿದೇಶದಲ್ಲೂ ಉತ್ತಮ ಅಭಿಪ್ರಾಯ ವ್ಯಕ್ತವಾಗಿದ್ದು, ಪ್ರಧಾನಮಂತ್ರಿ ಎಕ್ಸಲೆನ್ಸ್‌, ಕಾಮನ್‌ ವೆಲ್ತ್‌, ಗೂಗಲ್‌ ಅವಾರ್ಡ್‌ಗಳು ಲಭ್ಯವಾಗಿವೆ ಎಂದರು.

ಸಕಾಲ ಡಿಐಟಿಸಿ ಮಾಲತಿ, ಬೆಳ್ತಂಗಡಿ ತಹಶೀಲ್ದಾರ್‌ ಮದನ್‌ ಮೋಹನ್‌ ಸಿ., ತಾ.ಪಂ. ಕಾರ್ಯನಿರ್ವಹಣಾಧಿಕಾರಿ ಕುಸುಮಾಧರ್‌, ವಿವಿಧ ಇಲಾಖಾಧಿಕಾರಿಗಳು ಉಪಸ್ಥಿತರಿದ್ದರು.

ನಿವೃತ್ತ ಸೈನಿಕನ ಅಳಲು
ತಾನು ದೇಶದ ಸೇನೆಗೆ ಸಲ್ಲಿಸಿದ ಸೇವೆಯನ್ನು ಪರಿಗಣಿಸಿ ಲಭಿಸಿದ ಭೂಮಿಯ ವ್ಯಾಜ್ಯದ ಕುರಿತು ಅಧಿಕಾರಿಗಳು ತನ್ನನ್ನು ಸತಾಯಿಸುತ್ತಿದ್ದಾರೆ ಎಂದು ಹತ್ಯಡ್ಕ ಗ್ರಾಮ ನಿವಾಸಿ, ನಿವೃತ್ತ ಸೈನಿಕ ಮೋಹನ ಶೆಟ್ಟಿ ಅವರು ಸಕಾಲ ಆಡಳಿತಾಧಿಕಾರಿಯವರ ಮುಂದೆ ತನ್ನ ನೋವನ್ನು ತೋಡಿಕೊಂಡರು. ಈ ಕುರಿತು ತಹಶೀಲ್ದಾರ್‌ ಜತೆ ಮುಖಾಮುಖಿ ಮಾತನಾಡಿ ಸಮಸ್ಯೆ ಬಗೆಹರಿಸೋಣ ಎಂದು ಆಡಳಿತಾಧಿಕಾರಿಯವರು ಭರವಸೆ ನೀಡಿದರು.

ಮೂಲತಃ ಬೆಳ್ತಂಗಡಿಯವರು
ರಾಜ್ಯ ಸಕಾಲ ಮಿಷನ್‌ನ ಆಡಳಿತಾಧಿಕಾರಿ ಕೆ. ಮಥಾಯಿ ಅವರು ಮೂಲತಃ ಬೆಳ್ತಂಗಡಿಯ ಕಕ್ಕಿಂಜೆಯವರು. ಸಕಾಲದಲ್ಲಿ ಇಬ್ಬರು ನಿರ್ದೇಶಕರನ್ನು ಬಿಟ್ಟರೆ ಮಥಾಯಿ ಅವರದು ಪ್ರಮುಖ ಹುದ್ದೆಯಾಗಿದೆ. ಕಕ್ಕಿಂಜೆ, ಮಂಗಳೂರು ಹಾಗೂ ಉಜಿರೆಯಲ್ಲಿ ಶಿಕ್ಷಣ ಪಡೆದಿರುವ ಇವರು, ಕೆಪಿಟಿಯಲ್ಲಿ ಕಲಿಯುತ್ತಿರುವ ವೇಳೆಗೆ ಏರ್‌ಫೋರ್ಸ್‌ಗೆ ನೇಮಕಗೊಂಡಿದ್ದರು. ಅಲ್ಲಿ 18 ವರ್ಷಗಳ ಸೇವೆ ಸಲ್ಲಿಸಿ, ಬಳಿಕ ಮಂಗಳೂರಿನಲ್ಲಿ ನ್ಯಾಯವಾದಿಯಾಗಿ ಕೆಲಸ ನಿರ್ವಹಿಸಿದ್ದರು. 2006ರಲ್ಲಿ ಕೆಎಎಸ್‌ನಲ್ಲಿ ಉತ್ತೀರ್ಣರಾಗಿ ವಿವಿಧ ಜಿಲ್ಲೆಗಳ 7 ತಾಲೂಕುಗಳಲ್ಲಿ ತಹಶೀಲ್ದಾರ್‌ ಆಗಿ ಕರ್ತವ್ಯ ನಿರ್ವಹಿಸಿ, ಕಳೆದೆರಡು ವರ್ಷಗಳಿಂದ ಸಕಾಲದಲ್ಲಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ.

 ಪ್ರಸ್ತಾವನೆ ಇದೆ
ಸಕಾಲದಲ್ಲಿ ಸೇವೆಯ ವಿಳಂಬದ ಕುರಿತು ಪರಿಹಾರಕ್ಕೆ ಸಾರ್ವಜನಿಕರು ದೂರು ನೀಡುವ ಬದಲು ಸ್ವಯಂ ಪ್ರಕರಣ ದಾಖಲಿಸುವ ಕುರಿತು ಕಾನೂನು ತಿದ್ದುಪಡಿ ಹಾಗೂ ಗರಿಷ್ಠ ಪರಿಹಾರ ಮೊತ್ತವನ್ನು 500 ರೂ. ಬದಲು 25 ಸಾವಿರ ರೂ.ಗೆ ಏರಿಕೆ ಮಾಡುವ ಪ್ರಸ್ತಾವನೆ ಇದೆ.
– ಕೆ. ಮಥಾಯಿ
ರಾಜ್ಯ ಸಕಾಲ ಮಿಷನ್‌ನ
ಆಡಳಿತಾಧಿಕಾರಿ