ಜಾಗ ಮಾರಾಟ ಮಾಡುವುದಾಗಿ ಹೇಳಿ 11 ಲ.ರೂ. ವಂಚನೆ

Team Udayavani, Oct 12, 2022, 12:54 AM IST

ಮಂಗಳೂರು: ಜಾಗ ಮಾರಾಟ ಮಾಡುವುದಾಗಿ ಹೇಳಿ 11 ಲ.ರೂ. ಪಡೆದು ವಂಚಿಸಿರುವ ಬಗ್ಗೆ ನೋಯೆಲ್‌ ಡಿ’ಕುನ್ಹಾ ಅವರು ಪೊಲೀಸರಿಗೆ ದೂರು ನೀಡಿದ್ದಾರೆ.

ದುಬಾೖಯಲ್ಲಿ ಬ್ಯಾಂಕ್‌ ಮ್ಯಾನೇಜರ್‌ ಆಗಿ ನಿವೃತ್ತರಾಗಿದ್ದ ನೋಯೆಲ್‌ ಅವರಿಗೆ ನೆಲ್ಸನ್‌ ಡಿ’ಕುನ್ಹಾ ಅವರ ಮೂಲಕ ಆಗ್ನೆಲೊ ಪಿರೇರಾ ಎಂಬಾತನ ಪರಿಚಯವಾಗಿತ್ತು.

ಎಕ್ಸ್‌ಪಾಟ್‌ ಪ್ರಾಜೆಕ್ಟ್ ಆ್ಯಂಡ್‌ ಡೆವಲಪ್‌ಮೆಂಟ್‌ ಪ್ರೈ.ಲಿ. ಸಂಸ್ಥೆಯ ಮೂಲಕ ನೋಯೆಲ್‌ ಅವರಿಗೆ ಜಾಗ ಮಾರಾಟ ಮಾಡುವುದಾಗಿ ಆಗ್ನೆಲೊ ಪಿರೇರಾ ಹೇಳಿದ್ದ. ನೋಯೆಲ್‌ ಅವರು ಕತಾರ್‌ನಿಂದ ಭಾರತಕ್ಕೆ ಬಂದಾಗ ಜಾಗದ ನೋಂದಣಿ ಮಾಡಿಕೊಡುವುದಾಗಿಯೂ ಭರವಸೆ ನೀಡಿದ್ದ. ಅದರಂತೆ ನೋಯೆಲ್‌ ಅವರು ಆಗ್ನೆಲೊ ಪಿರೇರಾ ಅವರಿಗೆ 11 ಲ.ರೂ. ಹಣ ನೀಡಿದ್ದರು.

2019ರಲ್ಲಿ ಲಾಕ್‌ಡೌನ್‌ಗಿಂತ ಮೊದಲು ನೋಯೆಲ್‌ ಭಾರತಕ್ಕೆ ಬಂದಿದ್ದು ಜಾಗ ತೋರಿಸಿಕೊಡುವಂತೆ ಕೇಳಿಕೊಂಡಾಗ ಆರೋಪಿಗಳು ಜಾಗ ತೋರಿಸಲು ನಿರಾಕರಿಸಿ ವಂಚಿಸಿದ್ದಾರೆ. ಕಾನೂನು ಬಾಹಿರವಾಗಿ ನಕಲಿ ದಾಖಲೆಗಳನ್ನು ಸೃಷ್ಟಿಸಿ ಬೇರೆಯವರಿಗೆ ಮಾರಾಟ ಮಾಡಿ ವಂಚಿಸಿದ್ದಾರೆ. ದೂರು ನೀಡಿದರೆ ಕೊಲೆ ಮಾಡುವುದಾಗಿ ಬೆದರಿಸಿದ್ದಾರೆ ಎಂಬುದಾಗಿ ಮಂಗಳೂರು ಪೂರ್ವ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.