Dec. 26: ವೆಂಕಟರಮಣ ದೇಗುಲದಲ್ಲಿ ಪ್ರತಿಷ್ಠಾ ಹುಣ್ಣಿಮೆ ಮಹೋತ್ಸವ

Team Udayavani, Dec 24, 2023, 11:15 PM IST

ಮೂಲ್ಕಿ: ಒಳಲಂಕೆ ಮೂಲ್ಕಿ ಶ್ರೀ ವೆಂಕಟರಮಣ ದೇವಸ್ಥಾನದಲ್ಲಿ ಸಂಭ್ರಮದ ಪ್ರತಿಷ್ಠಾ ಹುಣ್ಣಿಮೆ ಮಹೋತ್ಸವ ಡಿ. 26ರಂದು ಶ್ರೀ ಸಂಸ್ಥಾನ ಕಾಶಿ ಮಠಾಧೀಶ ಶ್ರೀ ಸಂಯಮೀಂದ್ರ ತೀರ್ಥ ಶ್ರೀಗಳ ಉಪಸ್ಥಿತಿಯಲ್ಲಿ ಕ್ಷೇತ್ರದ ಸಾವಿರಾರು ಭಕ್ತರ ಪಾಲ್ಗೊಳ್ಳುವಿಕೆಯಲ್ಲಿ ಜರಗಲಿದೆ ಎಂದು ದೇಗುಲದ ಆಡಳಿತ ಮಂಡಳಿಯ ಪ್ರಕಟನೆ ತಿಳಿಸಿದೆ.

ಆ ದಿನ ಮುಂಜಾನೆ ಕೊಟೇಶ್ವರದಲ್ಲಿ ಮೊಕ್ಕಾಂ ಇರುವ ಶ್ರೀ ಸಂಯಮೀಂದ್ರ ತೀರ್ಥರು ಕ್ಷೇತ್ರಕ್ಕೆ ಆಗಮಿಸುವರು. ಪಾದಪೂಜೆ ನಡೆದ ಅನಂತರ ಶ್ರೀಗಳಿಂದ ಪ್ರಾರ್ಥನೆ, ಶ್ರೀ ಉಗ್ರನರಸಿಂಹ ದೇವರಿಗೆ ಪಂಚಾಮೃತ ಹಾಗೂ ಸೀಯಾಳ ಅಭಿಷೇಕ ನಡೆಯಲಿದೆ. ಆಬಳಿಕ 10ಕ್ಕೆ ಶ್ರೀಗಳ ಬೀಳ್ಕೊಡುಗೆ ಅನಂತರ ನಿರಂತರವಾಗಿ ಸಂಜೆ 3.30ರ ವರೆಗೆ ಸೀಯಾಳ, ಕನಕಾಭಿಷೇಕ ಮತ್ತು ಗಂಗಾಭಾಗೀರಥಿ ಅಭಿಷೇಕ ನಡೆಯಲಿದೆ.

ಸಂಜೆ 6.30ಕ್ಕೆ ಮಹಾ ನೈವೇದ್ಯ ಅನಂತರ ಭೂರಿ ಸಮಾರಾಧನೆ ನಡೆದು ರಜತ ರಥೋತ್ಸವ, ಮಹಾ ರಥೋತ್ಸವ ನಡೆಯಲಿದೆ.

ಅಭಿಷೇಕಕ್ಕೆ ಸೀಯಾಳ ಅರ್ಪಿಸುವವರು 5ಕ್ಕಿಂತ ಹೆಚ್ಚಿನ ಹರಕೆ ಇದ್ದವರು ಉಳಿದ ಮೊತ್ತವನ್ನು ನಗದು ರೂಪದಲ್ಲಿ ನೀಡಿ ರಶೀದಿ ಮಾಡಿಸುವಂತೆ ಪ್ರಕಟನೆ ತಿಳಿಸಿದೆ.